Mitiro 2 - Tshwa Bible

Pentekosta.

¹ Laha a siku ga Pentekosta gi nga wa chikele, vona vontlhe va wa tsombene wutshamu ginwe. Levi 23:15; Deut. 16:9

² Hi xitshuketi ku lo zwakala hi le tilweni a kuvumavuma kota a bhubhutsa ga mheho ya ntamu, ku tata a yindlu leyi va nga wa tshamile ka yona. Xip. 4:31

³ Ku lo woneka kabye a tirimi to fanana ni nzilo, ti nga avanyeka ku tshama linwe hehla ka munwe ni munwani.

⁴ Vontlhe va lo tatiswa hi Moya wa ku Basa, va sangula ku wulawula hi tinwani tirimi, kota lezi Moya wu nga va nyika ku wulawula zona. Xip. 1:5; Mar. 16:17; 1 Kor. 12:10; 13:1; 14:2

⁵ Ku wa hi ni vaJuda lava va akileko Jerusalema, va matiko wontihe lahasi ka tilo, va nga vanhu va pinyamileko kukhozeleni. Ekso. 23:17

⁶ Laha ku nga zwakala a kuvumavuma loko, a xidlemo xa vanhu xi lo tsombana, va kanganyiseka, hakuva munwe ni munwani i wo vazwa na va kanela hi lirimi la ka kabye.

⁷ Vontlhelele va lo riwuka, va hlamala, vaku: Xana vontlhe lava va wulawulako a hi va le Galilea ke?

⁸ Zi mahisa kuyini lezaku hi vazwa va wulawula hi lirimi leli munwe ni munwani wa hina a pswalelweko ka lona ke?

⁹ Hina vaPartia, ni vaMedi, ni vaElamita, ni lava va akileko le Mesopotamia, ni le Judia, ni le Kapadokia, le Pontu, ni le Asia,

¹⁰ le Frigia, ni le Pamfilia, le Gipite, ni matlhelo ya Libia kusuhani ka Kirene, ni valuveli va le Roma, a vaJuda ni vaproselita, Ekso. 12:48; Isa. 56:6

¹¹ a va le Kreta, ni vaArabia, hina hontlhe ha vazwa na va kari va wulawula hi tirimi ta hina hi mitiro ya ntamu ya Nungungulu.

¹² Vona vontlhe va lo riwuka, va kanganyiseka, va wutisana vaku: Zi komba yini lezi ke?

¹³ Kanilezi a vanwani va lo tseketsela, vaku: Va vimbelwe hi vinya go tsombela. A kukanela ka Pedro.

¹⁴ Kanilezi Pedro i lo suka, a yima zinwe ni vakhume ni munwe, a tlakusa gezu, a kanela kabye, aku: Nwina madota ya le Judia, na nwina nwentlhe lava mu akileko Jerusalema, ngha na mu tiva lezi, mu ingisa a timhaka ta mina.

¹⁵ A vanhu lava a va popiwangi kota lezi nwina mu alakanyako, hakuva ka ha hi 9 horas wa mixo ntsena.

¹⁶ Kanilezi leyi hi mhaka leyi a nga yi kanela muprofeti Joeli, a ku ngalo:

¹⁷ Ku ta maheka masikwini ya kugumesa, ku wula Nungungulu, Nzi ta chulula a Moya wa mina hehla ka nyama yontlhe; A varisanyana va nwina ni vanhanyana va nwina va ta profeta, A majaha ya nwina ma ta wona ziwoniso, Ni zikhosana za nwina zi ta lora miloro. Isa. 44:3; Ezek. 11:19; 36:27; Joeli 2:28; Zak. 12:10; Xip. 10:45; 21:9

¹⁸ Ina, nzi ta chulula a Moya wa mina masikwini lawo Hehla ka malanza ya mina ya xinuna ni ya xisati; ma ta profeta. Xip. 21:9; 1 Kor. 12:10; 14:1

¹⁹ Nzi ta wonisa zihlamaliso le tilweni, Ni ziwoniso laha hasi misaveni: A nkhata ni nzilo ni hunguva ya musi. Joeli 2:37

²⁰ A gambo gi ta pfhupeliswa, A hweti yi hunzuka yi maha nkhata, Na gi nga se nga chikela a siku ga Hosi, Legi ga hombe ni gi dumileko. Mat. 24:29

²¹ Ku ta maheka lezaku ni wihi a ta nga khongela vitweni ga Hosi i ta hanyiswa. Rom. 10:13

²² Nwina madota ya ka Israeli, ingisani leti timhaka: Jesu wa le Nazareta, loyi a nga mahelwa wumboni mahlweni ka nwina hi Nungungulu, hi mitiro ya ntamu, ni zirewukiso ni ziwoniso, lezi Nungungulu a nga zi maha ha yena xikari ka nwina, kota lezi mu zi tivako nwina wutsumbu; Maheb. 2:4

²³ loyi a nyikelweko ntanwini wa nwina, hi khungo gi tiyileko ga Nungungulu, ni kutiva kakwe ka kale; nwina mu mu belele, mu mu daya hi mandla ya zihunza-milayo. Lu. 24:44; Xip. 4:28

²⁴ Kanilezi Nungungulu i lo mu vuxa, a mu tlhatlha kubayisekeni ka kufa; hakuva zi wa nga koteki lezaku a khomiwa ha kona. Xip. 3:15; 4:10; Rom. 4:24; 8:11; 1 Kor. 15:15; Gal. 1:1; Efe. 1:20; Kol. 2:12

²⁵ Hakuva Davida i kanele ha yena, aku: Nzi lo wona a Hosi mahlweni ka mina xontlhe xikhati, Hakuva yi le reveni ga mina ga xinene, aku kasi nzi nga tsekatsekiswi. Tis. 16:8

²⁶ Hikwalaho a mbilu ya mina yi lo tsaka, ni lirimi la mina li nengela, Ni wona miri wa mina wu ta tshama hi kutsumba.

²⁷ Hakuva u nga ta tsika a muhefemulo wa mina le Hayidesi, Ge hambu ku tsika a Wakubasa wa wena a wona kubola. Lu. 1:35

²⁸ Wena u nzi kangetile a tindlela ta wutomi, U ta nzi xurisa hi kutsaka a mahlweni ka wena.

²⁹ Vamakabye, nzi nga mu byela ziku dlunya hi kokwani Davida, lezaku i file a lahliwa, ni xilahla xakwe xa hi kona xikari ka hina kala ni nyamutlha lezi. Xip. 13:36

³⁰ Makunu lezi a nga hi muprofeti, na a zi tiva lezaku Nungungulu i wa hlambanyile ka yena hi xifungo, lezaku i ta veka munwe wa lixaka lakwe laha xitshanwini xakwe xa wuhosi; 2 Sam. 7:13; Tis. 132:11; Lu. 1:32; Rom. 1:3

³¹ Yena na a wona lezi hi mahlweni, i lo kanela hi kuvuka ka Kristu, lezaku a nga tsikwangi Hayidesi, hambu a nyama yakwe a yi wonangi kubola. Tis. 16:10; Xip. 13:35

³² Jesu loyi, Nungungulu i lo mu vuxa, hina hontlhe hi vakustumunyu va lezo. Xip. 1:8

³³ Na a tlakusilwe hi canja ga xinene ga Nungungulu, na a amukele ka Dadani a Moya wa ku Basa lowu wu tsumbisilweko, i chelile hehla ka hina lezi mu zi wonako ni lezi mu zi zwako. Fil. 2:9; Maheb. 10:12; Joh. 14:26; 15:26; Xip. 1:4; 10:45

³⁴ Hakuva Davida a nga kanzihangi aya matilweni, kanilezi hi yena a nge ngalo: A Hosi yi te ngalo ka hosi ya mina: Tshama hi le reveni ga mina ga xinene, Tis. 110:1; Mat. 22:44; 1 Kor. 15:25; Efe. 1:20

³⁵ Kala nzi veka a valala va wena a kuva Xikhegetelo xa mikonzo ya wena.

³⁶ Hikwalaho ngha yindlu yontlhe ya Israeli yi tiva hi kutiyisilweko, lezaku Nungungulu i mu mahile Hosi ni Kristu, yena Jesu loyi mu nga mu belela. Xip. 5:31

³⁷ Laha na va zi zwile, va lo tlhabyiwa timbilwini, vaku ka Pedro ni ka vanwani vapostoli: Vamakabye, hi ta maha yini ke? Zak. 12:10; Lu. 3:10; Xip. 9:6; 16:30

³⁸ Pedro aku ngalo kabye: Hunzulukani, mu bapatizwa nwentlhelele vitweni ga Jesu Kristu, kutsetselelweni ka zionho za nwina; zonake mu ta amukela a xinyikiwo xa Moya wa ku Basa. Mat. 3:2, 8; Lu. 24:47; Xip. 3:19; 17:30

³⁹ Hakuva xitsumbiso xi ka nwina, ni ka vana va nwina, ni vontlhe lava va nga le kule, ka munwe ni munwani loyi Hosi Nungungulu wa hina a ta nga mu vitana. Rom. 9:8; Joeli 2:28; Efe. 2:13

⁴⁰ I lo va khongotela hi timhaka tinwani to tala, a va luleka, aku: Ti poniseni xizukulwaneni lexi xi gombonyekileko.

⁴¹ Lava va nga amukela a timhaka takwe va lo bapatizwa; hi lego siku ku lo engetelwa a 3,000 wa vanhu lomu bandleni.

⁴² Vona va lo pinyamela kugonziseni ka vapostoli, ni le kutlhanganeni, ni kukhemeni ka xibaba, ni mikhogelweni. Maheb. 10:25

Vapizani va hlengela ka zontlhe.

⁴³ A munwe ni munwani i wa hi ni kuchava mbilwini; a zirewukiso zinyingi ni ziwoniso zi lo mahiwa hi vapostoli, Mar. 16:17

⁴⁴ ni vontlhe lava va nga kholwa va wa hi wutshamu ginwe, va lo hlengela zilo zontlhe. Xip. 4:32

⁴⁵ Va lo xavisa zipetso ni zilo zabye, va zi avela ka vontlhe, kota kuvumala ka munwe ni munwani. Isa. 58:7

⁴⁶ A masiku ni masiku va lo pinyamela hi mbilu yinwe lomu tempeleni, va khema xibaba le kaya, vaga kuga kabye hi kutsaka ni matsenya, Lu. 24:53; Xip. 20:7

⁴⁷ na va bonga Nungungulu, va ranzeka ka vanhu vontlhe; masiku ni masiku a Hosi yi lo engetela ka handla hi lava va nga hanyisilwe. Rom. 14:18; 8:30