Mitiro 1 - Tshwa Bible

A xitsumbiso xa Moya wa ku Basa.

¹ Teofilu, a bhukwini go ranga nzi hlawutele zontlhe lezi Jesu a nga sangula ku zi maha ni ku zi gonzisa, Lu. 1:3

² ku kala siku lego a nga tlakuselwa tilweni, anzhako ka kuva a layile hi Moya wa ku Basa a vapostoli lava a nga va hlawulile. 1 Tim. 3:16; Maheb. 1:3

³ I lo va kombisa hi wukustumunyu ginyingi, lezaku wa hanya anzhako ka kuxaniseka kakwe, na a woneka ka vona a xipimo xa 40 wa masiku, a wulawula hi za mufumo wa Nungungulu. 1 Kor. 15:5

⁴ Laha a nga wa tsombene navo, i lo va layisisa aku: Mu nga suki Jerusalema, kanilezi mu rinzela a xitsumbiso xa Dadani, lexi nzi mu byelileko ha xona; Joh. 14:16

⁵ hakuva Johani, yena i lo bapatiza hi mati, kanilezi nwina mu ta bapatizwa hi Moya wa ku Basa anzhako ka masiku ma tsongwani. Xip. 2:4; 11:16; Joeli 2:28, 29

⁶ Laha va nga wa tsombene, va lo mu wutisa, vaku: Hosi, u ta tlhelisela a mufumo ka Israeli hi lexi xikhati ke? Isa. 1:26; Dan. 7:27; Am. 9:11

⁷ Yena aku ngalo kabye: A zi nyikwangi ka nwina ku tiva a zikhati ni tinguva, lezi Dadani a zi yimisileko hi ntamu wakwe. Deut. 29:29; 1 Tes. 5:1

⁸ Kanilezi mu ta nyikiwa a ntamu, loku wu tile hehla ka nwina a Moya wa ku Basa; zonake mu ta maha vakustumunyu va mina laha Jerusalema, ni le Judia gontlhe, ni le Samaria, ku kala le magemeta-musi ya misava.

Jesu a tlakukela tilweni.

⁹ Ku te loku a wulawulile timhaka leti, i lo tlakuselwa tilweni na va kari va mu langutela; ni refu gi lo mu fihla kuwoneni kabye. Joh. 6:62

¹⁰ Laha va nga ha cuwukisisa tilweni kota lezi a nga kari a famba, a vavanuna vambiri va wa yimile navo, na va ambele a tinguwo to basa; Xip. 10:8

¹¹ vaku ngalo: Vavanuna va le Galilea, hi yini mu yimileko mu cuwuka tilweni ke? Jesu loyi a susilweko ka nwina aya tilweni, i ta wuya kota lezi mu mu wonileko na aya tilweni. Dan. 7:13; Joh. 14:3; 1 Tes. 1:10; 4:16; Kuv. 1:7

¹² Zonake va lo suka le xitsungeni xi tibyiwako ku xa maOliva, lexi xi nga kusuhani ni Jerusalema, i pfhuka wa ku famba hi sabado, va tlhelela Jerusalema. Zak. 14:4; Joh. 11:18

¹³ Laha va nga chikele kona, va lo kanziha ndlwini ya le xitezi, laha va nga kari va tshama kona va Pedro, na Johani, na Jakobe, na Andreu, na Filipu, na Tomasi, na Bartolomeu, na Mateu, na Jakobe nʼwana Alfeu, na Simoni mupinyami, na Judasi nʼwana Jakobe. Xip. 9:37; Lu. 6:15

¹⁴ Vontlhe lava va lo simamisa kukhongeleni hi mbilu yinwe, zinwe ni vavasati, na Maria a nyine wa Jesu ni vanakulobye. Mat. 13:55; Lu. 2:49

Matiasi a hlawuliwa a kuva mupostoli.

¹⁵ Hi lawo masiku Pedro i lo yima xikari ka vamakabye, laha ku nga wa tsombene a tsengo wa 120 wa vanhu, aku ngalo: Kuv. 3:4

¹⁶ Vamakabye, zi wa lavekile lezaku a Mutsalo wu tatiseka, lowu Moya wa ku Basa wu nga profeta hi kale hi nomu wa Davida ha Judasi, loyi a nga wa hi murangeli wa vona lava va nga khoma Jesu. Tis. 41:9; Joh. 18:3

¹⁷ Hakuva i wa hlayilwe zinwe na hina, a amukela xiavelo xakwe ntirweni lowu. Lu. 6:16; Xip. 12:25

¹⁸ Yena i lo ti kumela a simu hi hakhelo ya kubiha kakwe, awa kona hi nghohe, a hanzuka hi laha xikari, ma kubuka a marumbu yakwe wontihe. Mat. 27:5; 2 Ped. 2:15; Tis. 55:23

¹⁹ Zi wa lo tibyiwa hi vontlhe lava va akileko le Jerusalema, lezaku hi lirimi labye a simu legi gi lo chuliwa ku ngalo: I Akeldama; lezo hi ku ngalo: I simu ga nkhata.

²⁰ Hakuva ku tsalilwe bhukwini ga Tisimu lezaku: A muti wakwe a wu mahe rumbi, Ngha ku nga ha tshami munhu ka wona; niku: A xikhundla xakwe a xi tekiwe hi munwani. Tis. 69:25

²¹ Hikwalaho ka vavanuna lava va nga kari va fambafamba na hina xontlhe xikhati lexi Hosi Jesu a nga wa enghena a huma xikari ka hina,

²² kusukela laha a nga bapatizwa hi Johani, ku kala siku lego a nga suswa ka hina aya tilweni, ku laveka lezaku munwe wa vona a yimiswa a kuva kustumunyu zinwe na hina hi kuvuka kakwe. Mar. 1:1

²³ Va lo humesa vambiri, Josefa a vitwako Barsaba, loyi a ginwani vito a nga hi Justusi, na Matiasi.

²⁴ Zonake va lo khongela, vaku ngalo: Hosi, wena loyi u tivako a timbilu ta vanhu vontlhe, komba loyi wena u mu hlawulileko ka lava vambiri, Joh. 2:25; Maheb. 7:13; Kuv. 2:23

²⁵ lezaku a teka xikhundla ntirweni lowu, ni wupostoli legi Judasi a pfhukileko ka gona, a sungwa hi kuya wutshanwini gakwe.

²⁶ Zonake va lo va hlahluveta, ni hlolo yi lo khoma Matiasi. Yena i lo hlayelwa zinwe ni vapostoli va khume ni munwe. Levi 16:8