Mavingu 8 - Tshwa Bible

A wutivi gi khongotela vanhu.

¹ A wutlhari a gi huweleli ke? i kuzwisisa a ku tlakusi a gezu ga kona ke?

² Gi yima matshanwini ma tlakukileko omu mahanzakanyeni ya tisoko.

³ Gi vitana lomu tinyangweni ni lomu wuenghenweni ga muti, i lomu tivatini, giku:

⁴ Nza mu vitana nwina vavanuna gezu ga mina gi lava varisanyana va vanhu.

⁵ Nwina zipumbu gonzani wutlhari, a nwina mu nga tlharihangiko hlotani mbilu ya kupimisisa.

⁶ Ingisani, hakuva nzi lava ku wulawula timhaka ta hombe; nomu wa mina wu ta wulawula zo lulama.

⁷ Hakuva a nomu wa mina wu ta wulawula lisine, akuva a kubiha manyala ka nomu wa mina.

⁸ Tontlhe a timhaka ta nomu wa mina ti lulamile, ku na xilo xa hava ni xa khohlakalo ka tona.

⁹ Ti le kubaseni ka loyi a zwisisako, a zwala ka lava va kumileko wutivi.

¹⁰ Amukelani a gonziselelo ya mina, na ku nga hi siliva, i wutivi ku hunza nzalama yo saseka.

¹¹ Hakuva a wutlhari gi hunza maribye ya lisima, i zontlhe lezi zi navelekako a zi na ku fanana na gona.

¹² Mina wutlhari nzi akelene ni kutlhariha, zi kumile wutivi ga maalakanyo ya wutlhari.

¹³ A ku chava Jehova ku venga kubiha; ina nza venga matshanza, kutikulisa, ni mahanyela yo biha, i nomu wu khohlakalisako.

¹⁴ A wusungukati ni makungo ma nene zi kumeka ka mina, i mina kupimisisa, nzi na ni ntamu.

¹⁵ Hi kota ya mina a tihosi ta fuma, i tihosana ta yimisa nongameto.

¹⁶ Hi kota ya mina a tihosana ta fuma, ahombe ni vontlhe valamuli va misava.

¹⁷ Nzi ranza lava va nzi ranzako; ava va nzi lavisisako va nzi kuma.

¹⁸ A wukosi ni kudzunzeka zi na mina, na, a wukosi gi nga mbheliko ni kululama.

¹⁹ A mbhanzo wa mina wu hunza nzalama, ina, a nzalama leyi yi hlutilweko, i bhinzu gi humako hi ka mina gi nene ku hunza siliva.

²⁰ Nzi famba ndleleni ya kululama, omu xikari ka tisoko ta kulamula ku lulamileko:

²¹ Kasi ku nyika tshomba ka lava va nzi ranzako, zi ta tata mabako yabye.

²² Jehova i lo nzi vanga kusanguleni ka ndlela yakwe, i mahlweni ka mitiro yakwe ya kale.

²³ Nzi yimisilwe xikhatini xi nga hiko na masangulo, i mahlweni a misava na yi nga se kuva kona.

²⁴ Nzi lo pswalwa a mabimbi na ma nga se kuva kona; i mahlweni na ku nga se kuva kona zibuka za mati.

²⁵ Nzi lo pswalwa a zitsunga na zi nga se ku huma, i zitsungana na zi nga se ku humelela.

²⁶ Hi mahlweni na a nga se nga vanga misava ni nhova, ambu ni masangulo ya tshuri wa misava,

²⁷ A xikhati lexi a nga lulamisela matilo, nzi wa hi kona; aha a nga maha a ranzani gi enzelekela nghohe ya ndengelenge:

²⁸ Laha a nga yimisa marefu le hehla, xikhati lexi a nga tiyisa a zibuka za mati:

²⁹ A xikhati lexi a nga yimisa mbhingano wa bimbi, ezaku mati ma nga hambunyeti a xileletelo xakwe, xikhati a nga yimisa a ziseketelo za misava: Joba 38:10; Jer. 5:22

³⁰ Nzi wa hi zinwe naye, kukotisa xigogo xa mitiro zi mu tsakisa siku ni siku, a nzi tsaka xontlhe xikhati mahlweni kakwe;

³¹ Nzi lo hlakana lomu ku nga ni wuakelo, zi tsaka zinwe ni vana va vanhu.

³² Hikwalaho vana vanga, nzi ingiseni! a katekile lava va hlayisako tindlela ta mina.

³³ Zwanani gonziselelo, mu ta tlhariha, u nga yi aleni.

³⁴ I katekile loyi a nzi zwako, oyi wontihe masiku a cuwukisako tinyangweni ta mina; oyi a rinzelako timhanzeni ta tivati ta mina.

³⁵ Hakuva loyi a nzi kumako i kumile wutomi, ta kuma thomo ka Jehova. 1 Joh. 5:11

³⁶ Kanilezi loyi a nzi goheleko, i onha muhefemulo wakwe, ontlhe lava va nzi vengako, va ranza kufa.