Mavingu 24 - Tshwa Bible

¹ U nga naveli vanhu va bihileko; e hambu ku navela ku tshama zinwe navo.

² Hakuva a timbilu tabye ti alakanya ku xanisa, i milomu yabye yi wulawula kubiha.

³ A yindlu yi akiwa hi wutlhari, i tiyisiwa hi kupimisisa.

⁴ A tikwaruto ta yona ta tatiswa hi wutivi, i ta tatiwa hi wukosi ga lisima gi tsakisako.

⁵ Loyi a tlharihileko i na ni ntamu; na, a munhu wa wutivi wa ti engetela ntamu.

⁶ Hakuva u ta vuxa yimpi hi wutlhari; i kupona ku kona loku masungukati ma tele.

⁷ A wutlhari gi tlakukile ka xipumbu, gi mu tsanza, ima xi nga ta vulula a nomu wa xona le hubyeni.

⁸ Loyi a alakanyelako ku maha kubiha, ta vitanwa mutshoheteli.

⁹ A maalakanyo ya wupumbu hi xionho; i mutseketseli manyalataniso vanhwini.

¹⁰ Loku wena u rereka sikwini ga khombo, ntamu wa wena wu tsongwani.

¹¹ Tlhatlhisa lava va yisiwako kufeni; hlanguta lava va kokelwako kudaweni.

¹² Loku uku: Languta, a hi zi tivangi; oyi a pimako timbilu a nga zi woni ke? oyi a hlayisako muhefemulo wa wena a nga zi tivi ke? nga ta chachazela munwe ni munwani kota mitiro yakwe ke? Jer. 32:19; Rom. 2:6; Kuv. 22:12

¹³ Nwananga, gana wulombe haku va gi nene; i zihahla za wulombe lezi zi nanzihako kanwini wa wena.

¹⁴ Hizalezo ni wutlhari gi tava tano muhefemulweni wa wena; oku u gi kumile u tava ni nchachazelo, i kutsumba ka wena ku nga tava ka mahala;

¹⁵ O wena wa kubiha, u nga ongozeli a muti wa loyi a lulamileko; nga gohi wutshamu gakwe ga kuhumula.

¹⁶ Hakuva a munhu nene iwa ntlhanu wa zikhati ni zimbiri, a vuka kambe; anilezi a wa kubiha i ta wela makhombyeni.

¹⁷ U nga giyi laha a nala wa wena a wako; gha a mbilu ya wena yi nga tsaki laha yena na a hlulilwe:

¹⁸ A nga zi wona Jehova zi mu tsanwisa; susa a zanga yakwe hehla kakwe.

¹⁹ U nga ti karati hi kota ya vanhu va kubiha; e hambu ku navela a va kubiha:

²⁰ Hakuva a wa kubiha cima a nga ta gi wona ga manziko; kandiya ya wa kubiha yi ta timiwa.

²¹ Nwananga, chava Jehova ni hosi; nga ti tlhanganyisi ni lava va ranzako ku hluwuka. 1 Ped. 2:17

²² Hakuva a khombo gabye gi tata hi xitshuketi; imani a tivako a kulobyiswa ka vona vontlhe?

²³ Leti kambe timhaka ta titlhari, zi sasekangi ku maha xihlawulela kulamuleni.

²⁴ Loyi a wulako ka wa kubiha aku: Wena u lulamile; aloye i ta rukiwa hi vanhu, ni matiko ma ta mu nyenya.

²⁵ Kanilezi lava va mu kawukako va ta xalala, i zikatekiso zi tava hehla kabye.

²⁶ Loyi a hlamulako timhaka ti nene, pswopswa munhu nonwini.

²⁷ Sasisa mitiro ya wena lahandle, sasisa ni simu ga wena; onake aka a yindlu ya wena;

²⁸ U nga kustumunyi u vukela muakelane wa wena handle ka nanzu; ana u ta khohlisa hi milomu ya wena ke?

²⁹ U nga wuli lezaku, Nzi ta maha kakwe khwatsi hi lezi a nga maha ka mina, zi ta tlhelisela munhu khwatsi hi mitiro yakwe.

³⁰ Nzi hunzile hi le sinwini ga lolo; i le xivineni xa loyi a nga hiko na kupimisisa.

³¹ Languta, ku wa khubhunyetilwe hi mizwa; i wusosonya gi wa fenengetile a nghohe ya simu: i libhingo li wa hahlukile.

³² Zonake nzi lo zi wona, nzi ehleketa, zi lo zi cuwukisisa, nzi kuma gonzo ka zona.

³³ Ina, etlelanyana, khudzehela kutsongwani, humbareta mawoko u etlela xikhatanyana:

³⁴ Zonake a wusiwana ga wena gi tata kukotisa a khamba, i kuvumala kukotisa a munhu loyi a hlomileko.