Mavingu 20 - Tshwa Bible

¹ A vinya mutseketseli, ni byala gi vanga maguwa; i wihi loyi a dederekako ha zona a nga tlharihangi. Efe. 5:18

² A kutshisa ka hosi ku khwatsi kudzumadzuma ka nghonyamo; i wihi loyi a yi zangarisako wa vukela muhefemulo wakwe.

³ Wa dzunzeka a munhu loyi a tsikako timholova; anilezi a zipumbu zontlhe zi ti nyiketela ka tona.

⁴ A lolo a gi rimi loku ku hi ni xirami; ikwalaho i tava mukombeli xikhatini xa kuhula, a nga kumi nchumu.

⁵ A xikungo mbilwini ya munhu xi fanana ni mati ya kueta; anilezi a munhu a nga ni kupimisisa i ta makha.

⁶ A linyingi la vanhu li taba hungu hi wunene gabye; anilezi himani a nga kumako a munhu wa kutsumbeka?

⁷ A munhu nene i famba kululameni kakwe; a katekile a vana vakwe va mu lanzelako.

⁸ A hosi leyi yi tshamako xitshanwini xa kulamula, i hluta kubiha hi mahlo ya yona.

⁹ Himani a zi kotako ku wula aku: Nzi basisile a mbilu ya mina, zi hlazilwe xionhweni xa mina ke? 1 Tih. 8:46; 1 Joh. 1:8

¹⁰ A tipimo timbiri ta kubinza ti hambeneko, ni tinwani tipimo ti hambeneko, ontlhe ti hi manyalataniso ka Jehova.

¹¹ Hambu a nwanana i ta tibyiwa hi zimaho zakwe, oku mitiro yakwe yi basile, kutani yi lulamile.

¹² A ndleve yi zwako ni tihlo gi wonako, ontlhe zi mahilwe hi Jehova.

¹³ U nga ranzi ku etlela, u nga ti enghenisa wusiwaneni; ulula a mahlo ya wena u ta xura hi xibaba.

¹⁴ Zi bihile! Zi bihile! ku wula muxavi, onake a ti fambela ndleleni yakwe a ti kukumukisa.

¹⁵ Ku na ni nzalama ni maribye manyingi ya tsengo; anilezi a xa lisima nguvu hi milomu ya wutivi.

¹⁶ Tekani nguwo yakwe hakuva i ti bohile hi nanzu wa munwani; u khomele nanzu hi kota ya vanwani.

¹⁷ A xibaba xa kukhohlisa xa nanziha ka munhu, anilezi anzhako ka xikhati a nomu wakwe wu ta tala hi maribye.

¹⁸ Wontlhelele makungo ma tiyisiwa hi wusungukati; i wusungukati gi nene maha yimpi.

¹⁹ Leyi a fambafambako a hleva wa bhoxa mifihlakalo; ikwalaho u nga ti tlhanganyisi ni loyi a milomu yakwe yi lapitako.

²⁰ Loyi a rukako raru wakwe kutani nyine wakwe, kandiya yakwe yi ta mu timekela munyameni wa hombe. Levi 20:9; Deut. 27:16; Mat. 15:4

²¹ A tshomba leyi yi kumiwako hi xihatla kusanguleni, ugumeseni ka yona yi nga tava ni zikatekiso.

²² U nga wuli uku: Nzi ta tlhelisela kubiha hi kubiha; sumba Jehova, yena i ta ku ponisa. Deut. 32:35; Rom. 12:19; 1 Tes. 5:15

²³ A tipimo ti hambeneko ti hi manyalataniso ka Jehova; i xikalu xi khohlisako a hi xi nene.

²⁴ A mafambela ya munhu ma layiwa hi Jehova; munhu a nga zi kotisa kuyini ku pima tindlela takwe wutsumbu?

²⁵ I ziyo a ku basisa nchumu ka Jehova, i ku kanakana loku u fungile. Mut. 5:1; Mat. 15:5

²⁶ A hosi yi tlharihileko ya hlela va kubiha, i neha tsayiselelo hehla ka vona.

²⁷ A moya wa munhu i kandiya ya Jehova, u lavisisa kontlhe lomu nzeni kakwe. 1 Kor. 2:11

²⁸ A wunene ni kutsumbeka zi lonzowota hosi; xitshamu xakwe xa wuhosi xi tiyiswa hi wunene.

²⁹ A wudzunzo ga majaha hi ntamu wabye; i wumbhuri ga zikhosana hi hloko ya wuvu.

³⁰ A timbirimbi ti bayisako ti hlaza kubiha, i kubiwa ku enghenako lomu nzeni.