Mateu 10 - Tshwa Bible

Jesu a hlawula 12 wa vapizani.

¹ I lo vitana a vapizani vakwe va khume ni vambiri, a va nyika ntamu wa ku hlula a mimoya ya kubiha ni ku yi humesa; ni ku chuma tontlhe tixaka ta tinghumbe ni tixaka tontlhe ta mababyi. Mar. 3:13, 14; 6:7; Lu. 6:13

² A mavito ya vapostoli va khume ni vambiri hi lawa: A wo ranga hi Simoni, a vitwako Pedro, na Andreu nakulobye; na Jakobe a nʼwana Zabedi, na Johani nakulobye; Joh. 1:42

³ Filipu, na Bartolomeu; Tomasi, na Mateu muhlengisi; Jakobe a nʼwana Alfeu, na Tadeu;

⁴ na Simoni muKanani, na Judasi Iskarioti, loyi a nga tokometa Jesu. Lu. 6:15; Miti. 1:13; Joh. 13:26

⁵ Jesu i lo ruma lava va khume ni vambiri, a va laya, aku: Mu ngayi ka vamatiko, hambu ku enghena ka muti wa vaSamaria. 2 Tih. 17:24; Xip. 4:15

⁶ Kanilezi yanani ka tiyivu ti lahlekileko ta yindlu ya ka Israeli. Isa. 53:6; Miti. 13:46

⁷ Kufambeni ka nwina kanelani muku: A mufumo wa tilo wu tshinele. Lu. 9:2; Xip. 3:2

⁸ Hanyisani lava va babyako, mu vuxa a vafileko, mu basisa tihlokonho, mu humesa madimoni. Mu amukele hi matsenya, nyikani hi matsenya.

⁹ Mu nga weleli mali ya nzalama ni siliva ni suku lomu mabhandeni ya nwina. Mar. 6:8; Lu. 9:3; 10:4

¹⁰ Mu nga teki kwama pfhumbeni ga nwina, hambu mabhaji mambiri, hambu zilato ni nhonga; hakuva a xitiri xi fanelwe hi kuga ka xona. Lu. 10:7; 1 Kor. 9:7; 1 Tim. 5:18

¹¹ Kani hi wihi muti ni mutana mu to enghena ka wona, mu ta wutisa lezaku himani a faneleko ku mu amukela; tshamani ka yena mu kala mu suka.

¹² Laha na mu enghenile ndlwini mu ta yi losetela.

¹³ Loku a yindlu yi fanele, a kurula ka nwina a ku tshame ka yona; kanilezi loku yi nga faneli, ngha kurula ka nwina ku tlhelela ka nwina.

¹⁴ Kani hi wihi a ta nga kala ku mu amukela, hambu ku ingisa a timhaka ta nwina, a xikhati mu humako ka yindlu leyo kutani muti lowo, phumunhani a ntshuri wa mikonzo ya nwina. Mar. 6:11; Miti. 13:51

¹⁵ Hizinene nziku ka nwina: Hi siku ga kulamula a kutsayiswa ka muti lowo ku ta hunza ka Sodoma ni Gomora.

¹⁶ Langutani, nza mu ruma na mu fanana ni tiyivu xikari ka timhisi; hikwalaho, tlharihani kota tinyoka, mu ku khwatsi mu matuva, mu ngavi na wumbyori. Lu. 10:3; Rom. 16:19; 1 Kor. 14:20

¹⁷ Ti woneleni hi vanhu, hakuva va ta mu nyikela tihubyeni, va mu xupula masinagogeni yabye. Mar. 13:9; Lu. 12:11; Miti. 5:40

¹⁸ Ina, mu ta yisiwa mahlweni ka vafumeli ni tihosi hi kota ya mina, a kuva mu kustumunya ha mina ka vona ni ka vamatiko.

¹⁹ Kanilezi loku va mu nyikela kabye, mu nga kanakani muku mu ta wulawulisa kuyini niku zini mu ta nga wulawula, hakuva zi ta nyikiwa ka nwina hi xikhati lexi mu ta nga wulawula. Ekso. 4:12; Mar. 13:11-13; Lu. 12:11

²⁰ Hakuva a hi nwina mu ta nga wulawula, kanilezi hi Moya wa Raru wa nwina wu to wulawula hi nwina. 2 Sam. 23:2; Miti. 4:8

²¹ A munhu i ta nyikela nakulobye kufeni, ni raru i ta nyikela nʼwana wakwe; a vanana va ta vukela vabeleki vabye, va va dayisa.

²² Mu ta vengiwa hi vanhu vontlhe hi kota ya vito ga mina; kanilezi loyi a timiselako kala magumo, hi yena a ta nga hanyiswa. Lu. 21:17; Mar. 13:13

²³ Kanilezi loku va mu xanisa mutini wo kari, chavelani ka munwani; hakuva hizinene nziku ka nwina: Mu nga ta kala mu mbheta a miti ya vaIsraeli, na Nʼwana wa munhu a nga se ku chikela. Miti. 8:1; Xip. 16:28

²⁴ Mupizani a nga hunzi mugonzisi wakwe, ni nanza a gi hunzi a hosi ya gona.

²⁵ Zi ringene a mupizani loku a kota mugonzisi wakwe, ni nanza loku gi kotisa hosi ya gona. Loku va vitanile a nwinyi wa yindlu vaku hi Belzebuba, a va ngango wakwe va ta hunzeleta ku vitaniswa lezo. Mar. 3:22; Lu. 11:15

²⁶ Kanilezi mu nga va chavi; hakuva a ku na xilo xi fenengetilweko, xi ta nga kala ku funungulwa, ni xi fihlilweko xi ta nga kala ku tibyiwa. Mar. 4:22; Lu. 8:17

²⁷ Lezi nzi mu byelako munyameni, zi wulawuleni kuwonekeleni; ni lezi zi hlebyiwako tindleveni ta nwina, banani hungu ha zona le hehla ka tiyindlu.

²⁸ Mu nga chavi lava va dayako miri, na va nga hi na ntamu a ku daya muhefemulo; kanilezi chavani loyi a nga ni ntamu a ku lovisa a muhefemulo ni miri le Gehena. Lu. 12:4; 1 Ped. 3:14

²⁹ A vamanjingiri vambiri a va xaviswi hi capawu ke? Kasi lezo a nga kona ni munwe wa vona a wako hasi loku a nga zi ranzi a Dadani wa nwina.

³⁰ Kanilezi nwina, hambu ni misisi ya tihloko ta nwina yi hlayilwe. 2 Sam. 14:11; Lu. 21:18; Miti. 27:34

³¹ Hikwalaho mu nga chavi, ma va hunza nguvu a vamanjingiri vanyingi.

³² Kani hi mani loyi a ta nga nzi vumela mahlweni ka vanhu, minawu nzi ta mu vumela mahlweni ka Dadani wa mina loyi a nga le tilweni. Lu. 12:8; Rom. 10:9, 10; Kuv. 3:5

³³ Kanilezi loyi a ta nga nzi ala mahlweni ka vanhu, minawu nzi ta mu ala mahlweni ka Dadani wa mina loyi a nga le tilweni.

³⁴ Mu nga alakanyi muku nzi tile a ku neha kurula misaveni; a nzi telangi ku neha kurula, kanilezi a supado. Lu. 12:49-53

³⁵ Hakuva nzi tele ku ta hambanyisa a munhu ni raru wakwe, a nhanyana ni mamani wakwe, a katamwane ni nwingi wakwe; Mika 7:6

³⁶ ni va le ngangweni wa munhu va ta maha valala vakwe. Tis. 41:9; Joh. 13:18

³⁷ Loyi a ranzako raru kutani nyine a ku hunza mina a nga nzi faneli; ni loyi a ranzako mufana wakwe kutani nhanyana wakwe a ku hunza mina a nga nzi faneli.

³⁸ Loyi a nga rwaliko a xihambano xakwe a nzi lanzela, a nga nzi faneli. Xip. 16:24; Mar. 8:34; Lu. 9:23

³⁹ Loyi a hlayisako a kuhanya kakwe i ta lahlekelwa ha kona; kanilezi loyi a lahlekelweko hi kuhanya kakwe hi kota ya mina i ta ku kuma. Lu. 17:33; Joh. 12:25

⁴⁰ Loyi a mu amukelako, wa nzi amukela mina, ni loyi a nzi amukelako wa amukela loyi a nzi rumileko. Lu. 9:48; Joh. 12:44; Gal. 4:14

⁴¹ Loyi a amukelako muprofeti hi ku mu tiva lezaku muprofeti, i ta amukela a nchachazelo wa muprofeti; ni loyi a amukelako munhu wo lulama hi ku mu tiva lezaku i munhu wo lulama, i ta amukela a nchachazelo wa munhu wo lulama.

⁴² Kani hi mani a nyikako ka munwe wa lava va tsongwani a khokho ga mati yo titimela ntsena, hi ku tiva lezaku mupizani, hizinene nziku ka nwina, a nga ta lahlekelwa hi nchachazelo wakwe. Mar. 9:41; Maheb. 6:10