Marku 16 - Tshwa Bible

A kuvuka ka Jesu hi ka vafileko.

¹ Laha a sabado gi nga hunzile, Maria wa le Magdala, na Maria a nyine wa Jakobe, na Salome, va lo xava mubandwa, kasi va fela ku ya mu tota. Mat. 28:1; Lu. 24:1; Joh. 20:1

² Ni mixo nguvu a siku go ranga ga viki, va loya nkeleni laha gambo gi nga tsuwuka.

³ Va waku xikari kabye: Himani a ta nga hi wumbulutela a ribye gi suka nyangweni ya nkele ke?

⁴ Kanilezi laha va nga languta, va lo wona lezaku a ribye gi wumbulutilwe lenzhako; hakuva gi wa hi ga hombe nguvu.

⁵ Na va enghena nkeleni, va lo wona a jaha gi nga tshamile hi le tlhelweni ga xinene, na gi ambele a nguwo yo basa; vona va lo dzuka. Lu. 24:3; Joh. 20:11, 12

⁶ Gona giku kabye: Mu nga dzuki! Mu lava Jesu wa le Nazareta, loyi a nga belelwe. I vukile, a nga kona laha. Langutani a wutshamu legi va nga mu vekile kona! Mat. 28:5-7

⁷ Fambani, mu ya byela vapizani vakwe na Pedro, muku: Wa mu rangela a kuya Galilea; mu ta mu wona kona, kota lezi a nga wula ka nwina. Mat. 26:32; Xip. 14:28

⁸ Va lo huma hi le nkeleni va tsutsuma, hakuva ya wa rurumela ni ku hlamala; a va nga wulangi nchumu ka munhu, hakuva va wa chava.

⁹ Laha na a vukile ni mpunzu hi siku go ranga ga viki, a ku ranga i lo woneka ka Maria wa le Magdala, loye a nga hlongole ka yena a ntlhanu wa madimoni ni mambiri. Lu. 8:2; Joh. 20:14

¹⁰ Yena i lo famba a ya bikela lava va nga wa mu lanzela, hakuva ya wa hi hlomulweni na va rila,

¹¹ Laha na va zi zwile lezaku wa hanya, niku i mu wonile, a va kholwangi. Lu. 24:11

¹² Anzhako ka lezo i lo woneka hi xinwani xiyimo ka vambiri vabye, laha va nga kari va famba vaya handle ka muti.

¹³ Vona va lo tlhela va ya byela a vanwani, kanilezi a va va kholwangi kambe.

¹⁴ Zonake i lo woneka ka vakhume ni munwe na va tshamile kugeni; i lo va sola hi kungakholwi kabye ni kunonoha ka timbilu tabye, hakuva a va nga kholiswangi hi lavo va nga mu wonile laha na a vukile. Lu. 24:36; Joh. 20:19; 1 Kor. 15:5

¹⁵ Aku ngalo kabye: Fambani misaveni yontlhe, mu ya kanela ivangeli ka vanhu vontlhe. Mat. 28:19; Joh. 15:16; Kol. 1:23

¹⁶ Loyi a kholwako a bapatizwa i ta hanyiswa; kanilezi loyi a nga kholwiko i ta lamuliwa. Joh. 12:48; Miti. 2:38; Rom. 10:9

¹⁷ A ziwoniso zi ta nga mahiwa hi lava va kholwako hi lezi: Hi vito ga mina va ta hlongola madimoni, va wulawula hi tirimi tiswa; Lu. 10:17; Miti. 2:4, 16, 18

¹⁸ va ta khoma tinyoka; hambu loku vanwa a xilo xi dayako, xi nga ta va lamata; va ta tlhateka mandla ka vababyi, va hanya. Miti. 28:5, 8

¹⁹ Laha Hosi Jesu na a wulawulile na vona, i lo tlakuselwa tilweni, aya tshama hi le reveni ga xinene ga Nungungulu. Lu. 24:51

²⁰ Kanilezi vona va lo famba, va ya kanela ivangeli wutshanwini gontlhe; a Hosi yi wa tira zinwe navo, yi tiyisa a mhaka hi ziwoniso lezi zi nga yi heleketa. Amen. Maheb. 2:4