Maheberu 5 - Tshwa Bible

¹ Hakuva ni wihi wa vapristi va hombe, loku a langilwe xikari ka vanhu, i vekiwa kasi ku yimela vanhu ka zilo za Nungungulu, lezaku a nyikela minyikelo ni miphahlelo hi kota ya zionho. Xip. 2:17; 8:3, 4

² Yena wa zi kota ku timisela ni lava va nga tiviko ni va hambukileko, hakuva na yena wutsumbu i na ni gome;

³ hi kota ya gona, loku a phahlela hi kota ya zionho za vanhu, i yimelwe hi ku phahlela hi kota ya zakwe. Levi 4:3; Xip. 7:27; 9:7

⁴ Kambe a ku na munhu a ti tekelako a xikhundla lexi, sine loku a vitanilwe hi Nungungulu, kota yena Aroni. Ekso. 28:1; 1 Sam. 13:9; Joh. 3:27

⁵ Hizalezo Kristu a nga ti tlakusangi ha yece a kuva mupristi wa hombe, kanilezi i lo yimiswa hi yena loyi a nga ku ngalo kakwe: Wena u Nʼwana wa mina, Nyamutlha nzi ku belekile. Tis. 2:7; Joh. 8:54

⁶ Kota lezi a wulako kambe ka ginwani wutshamu, aku: Wena u mupristi kala kupinzuka Hi tshamela ga Melkizedeki. Tis. 110:4; Xip. 7:17, 21

⁷ A masikwini ya kuhanya kakwe nyameni, Jesu i lo khongela ni ku khongotela hi kurila ka hombe ni mihloti, ka loyi a nga zi kota ku mu hlanguta kufeni; yena i lo zwiwa hilezi a nga hi ni xichawo ka Nungungulu. Tis. 22:1; Mat. 26:37, 39; Mar. 14:33

⁸ Hambu lezi a nga hi Nʼwana, i lo gonza kuingisa hi lezi a nga xaniseka ha zona; Fil. 2:8; Xip. 3:6

⁹ na a mbhelelisilwe i lo maha a muvangi wa kuhanyiswa ka pinzukelwa, ka vontlhe lava va mu ingisako;

¹⁰ na a wulilwe hi Nungungulu lezaku mupristi wa hombe hi tshamela ga Melkizedeki.

¹¹ Hi na ni zinyingi ku wulawula ha yena, kanilezi za tsanza a ku zi tlhamusela, hakuva ma nonoka ku ingisa.

¹² Hakuva hambu lezi mu nga fanekele kale a kuva mu maha vagonzisi, ka ha laveka ka nwina lezaku munhu a mu gonzisa a zigonzo zo ranga za timhaka ta Nungungulu; ma ha hi lava va lavako masi, na ku nga hi kuga ku tiyileko. 1 Kor. 3:1, 2, 3; Xip. 6:1

¹³ Hakuva ni wihi loyi a hanyako hi masi basi, a nga zi koti ku tiva a mhaka ya kululama, hakuva wa ha hi xihlangi. 1 Kor. 13:11; 14:20; Efe. 4:14

¹⁴ Hakuva a kuga ku tiyileko ku fanela a vanhu kulileko, lava ve toloveleko a ku tirisa kupima kabye va kala va zi kota ku hambanyisa a kusaseka ni kubiha. 1 Kor. 2:6; Efe. 4:13; Fil. 3:15