Maheberu 12 - Tshwa Bible

Jesu a Muvangi ni Mumbhelelisi wa kukholwa ka hina.

¹ Hikwalaho kota lezi hi ranzelweko hi xidlemo xa hombe xa vakustumunyu, a hi hoxeni zontlhe lezi zi hi binzisako, hi tsika ni kuonha loku ku hi namarelako, hi tsutsuma hi kutiyisela a kusiyana loku ku vekilweko mahlweni ka hina, 1 Kor. 9:24; Kol. 3:8

² na hi kari hi cuwuka ka Jesu a muvangi ni mumbhelelisi wa kukholwa ka hina, loyi hi kota ya kutsaka loku a nga vekelwe kona a nga timisela a xihambano, a nga khatali hi tingana ta xona; kanilezi makunu i tshamile hi tlhelo ga xinene ga xitshamu xa wuhosi xa Nungungulu. Tis. 110:1; Lu. 24:26

³ Ina, alakanyani yena loyi a nga timisela a kukanetwa ka kunghaho hi vaonhi, lezaku mu nga rereki, mu mbhela ntamu mihefemulweni ya nwina. Mat. 10:24

⁴ Nwina a mu se ngalwa ni kuonha kala ku huma nkhata, 1 Kor. 10:13

⁵ Xana mu rivele a gezu ga kukhongotela, legi gi wulako ka nwina khwatsi hi loku gi wuliwa ka vana? ku ngalo: Nwananga, u nga kanyisi a kulaya ka Hosi, U nga mbheli ntamu loku u kawukwa hi yona; Mav. 3:11

⁶ Hakuva a Hosi yi tsayisa loyi yi mu ranzako, Yiba a nʼwana munwe ni munwani loyi yi mu amukelako. Tis. 94:12

⁷ Timiselani a kutsayiswa, hakuva Nungungulu i maha ka nwina khwatsi hi vana; hakuva hi wihi nʼwana loyi a raru wakwe a nga mu tsayisiko ke? 2 Sam. 7:14

⁸ Kanilezi loku mu nga hi na kutsayiswa, loku vontlhe vanwani va avelweko kona, zonake mu minkova, a mu vana va nene. 1 Ped. 5:9

⁹ Tlhatakumbiri, hi wa hi ni vadadani va nyama lava va nga hi tsayisa, hi wa hi ni xichawo ha vona; xana ngha hi nga ingisi a Dadani wa mimoya, a kuva hi hanya ke? Mitse. 27:16

¹⁰ Kunene vona va lo hi tsayisa xikhatanyana, kota lezi zi nga woneka na zi sasekile ka vona; kanilezi Nungungulu wa hi tsayisa a kuva hi vuneka, kasi hi fela kuva ni kubasa kakwe. 1 Ped. 1:15

¹¹ A kutsayisa kontlhe a ku woneki makunu na ku tsakisa, kanilezi ka xanisa; hambu zi hi tano anzhako ka xikhati ku pswala a mihanzu ya kurula ka vona lava va wundlilweko ha kona, a mhbanzo wa kululama. Jak. 3:18

¹² Hikwalaho, tiyisani a mandla ma rerekileko, ni madzolo laya ma hlekahlekako; Isa. 35:3

¹³ lulametani a tindlela ta mikonzo ya nwina, lezaku lexi xi khwitako xi nga khuyuki, kanilezi xi hanyiswa. Mav. 4:26; Gal. 6:1

¹⁴ Lavani kurula ni vanhu vontlhe, ni kubasiswa loku munhu a nga zi kotiko ku wona Hosi loku a nga hi nako. Mat. 5:8

¹⁵ Ti woneleni lezaku ku ngavi kona munhu a kiyelelwako hi tipswalo ta Nungungulu; lezaku ku nga dzuki ku mila a mutsu wa kubava wu mu karata, ni lezaku a vanyingi va nyenyeziswa ha wona. 2 Kor. 6:1

¹⁶ Ti woneleni lezaku ku ngavi kona a xibhayi, hambu ni munhu a kanyisako, kota Esau loyi a nga xavisa a wutewula gakwe hi ngelo munwe wa zakuga. Gen. 25:33

¹⁷ Hakuva ma zi tiva lezaku anzhako loku a lavile ku kuma a tshomba yakwe ya kukatekiswa, i lo kanetwa hakuva a nga kumangi xikhati ku hunzulusa a mhaka, hambu lezi a nga kombela hi mihloti.

¹⁸ Hakuva nwina a mu tshinelangi ka xitsunga xi khumbiwako, lexi xi vurako nzilo, a mu tshinelangi kuphumeni, ni munyameni, ni ka bhubhutsa ga mheho, Deut. 4:11

¹⁹ ni kuvuma ka mpunzu, ni gezu gi nga kari gi wulawula, lezaku lava va nga gizwa va kombela lezaku gi nga ha wulawuli mhaka ka vona;

²⁰ hakuva va lo binzelwa hi xileletelo lexi xi nge ngalo: Hambu ni xihari loku xi khumba xitsunga xi ta gandliwa hi maribye. Ekso. 19:13

²¹ Hi kota ya kuchaviseka ka lezi zi nga woneka, Mosi aku ngalo: Nza chava nguvu ni ku rurumela.

²² Kanilezi nwina mu tile xitsungeni xa Zioni, ni le mutini wa Nungungulu a hanyako, a Jerusalema ga le tilweni, ni ka tingelosi ti nga hlayiwiko, Fil. 3:20; Kuv. 3:12

²³ ni le hlengeletanweni ya hombe, ni ka bandla ga matewula ma tsalilweko le tilweni, ni ka Nungungulu a nga Mulamuli wa vontlhe, ni ka mimoya ya vanhu va lulamileko va mbhelelisilweko, Lu. 10:20; Fil. 3:12; Kuv. 14:4

²⁴ ni ka Jesu a mutlhanganyisi wa xivumelwano xiswa, ni ka nkhata wa kunwatsekela, lowu wu wulako a timhaka ti nene to hunza a wa Abeli. Ekso. 24:8

²⁵ Cuwukani a ku kala mu nga mu ali loyi a wulawulako. Hakuva loku a vakale va nga ponangi, laha va nga mu ala loyi a nga va laya na hi laha misaveni, nguvunguvu hina hi nga ta pona loku hi mu fularela loyi a layako hi le tilweni;

²⁶ loyi a gezu gakwe gi nga tsekatsekisa a misava a ka xikhati lexo; kanilezi makunu i tsumbisile, aku: Nza ha ta tsekatsekisa misava kanwe kambe, na ku nga hi yona yoce kanilezi ni tilo kambe. Ekso. 19:18; Hag. 2:6

²⁷ A mhaka leyi yaku: A kanwe kambe, yi kombisa a kususiwa ka zilo lezi zi zi kotako ku tsekatsekiswa, kota lezi zi nga zilo zi mahilweko, kasi ku fela ku sala lezi zi nga zi kotiko ku tsekatsekiswa. Mat. 24:35; Kuv. 21:1

²⁸ Hikwalaho kota lezi hi amukelako a mufumo lowu wu nga tsekatsekiswiko, ngha na hi hi ni kubonga, loku hi nga khozelako Nungungulu ha kona hi mu tsakisa, hiva ni xichawo xi basileko ni kururumela,

²⁹ hakuva Nungungulu wa hina i nzilo lowu wu hisako. Isa. 66:15; Deut. 4:24; Tis. 50:3