Luka 19 - Tshwa Bible

Zakeu.

¹ Yena i lo enghena Jeriko a tsemakanya muti.

² Laho ku wa hi ni wanuna a vitwako Zakeu, a nga hi hosi ya vahlengisi; i wa fumile.

³ I lo lava ku wona Jesu lezaku ngwa kuyini; kanilezi i wa nga zi koti hi kota ya xidlemo, hakuva i wa komile.

⁴ Yena i lo tsutsuma a ranga mahlweni, a kanziha sinyeni ya nkuwu, kasi a fela ku mu wona; hakuva Jesu i wa hunza hi ndlela leyo.

⁵ Laha Jesu na a chikele ka lego wutshamu, i lo cuwuka le hehla, aku ngalo kakwe: Zakeu, hatlisa u chika; hakuva inyamutlha nzi fanele ku ya tshama ndlwini ya wena.

⁶ I lo hatlisa a chika, a mu amukela hi kutsaka.

⁷ Vontlhe lava va nga zi wona va lo tsanwa, vaku: I hambukele ka munhu a nga muonhi ku ya humula kona. Mat. 9:11; Xip. 5:30

⁸ Kanilezi Zakeu i lo yima, aku ngalo ka Hosi: Languta, Hosi, nzi pambulela zisiwana a khihlanya ga zilo za mina, ni loku nzi ngha nzi mu kalavele xilo munhu, nzi ta xi tlhelisela na xi engetelwe ka mune. Ekso. 22:1; 1 Sam. 12:3; Xip. 3:14

⁹ Jesu aku ngalo ka yena: Inyamutlha a kuhanyiswa ku enghenile ndlwini leyi, kota lezi yenawu a nga nʼwana wa Abrahama. Rom. 4:11, 12, 16; Xip. 13:16

¹⁰ Hakuva a Nʼwana wa munhu i tele ku ta lava ni ku hanyisa lezi zi lahlekileko. Mat. 18:11

Mufananiso wa tipondo.

¹¹ Kota lezi va nga kari vazwa, Jesu i lo engeta a kanela a mufananiso, hakuva i wa tshinela Jerusalema, ni lezi va nga alakanya lezaku a mufumo wa Nungungulu wu ta wonekeliswa zalezo. Miti. 1:6

¹² I te ngalo: A munhu wa hombe i loya matiko wundle, ku ya amukela wuhosi a wuya. Mat. 25:14; Mar. 13:34

¹³ 1 lo vitana a khume ga malanza yakwe, a ma nyika khume ga tipondo, aku ka wona: Bhinzulani ha tona nzi kala nzi wuya.

¹⁴ Kanilezi a vanhu va tiko gakwe va wa mu venga, va ruma a mitsumi hi lenzhako kakwe, vaku: A hi ranzi ku fumiwa hi munhu loyi. Joh. 1:11

¹⁵ Ku te laha a nga wuyile, na a amukele a wuhosi, i lo laya lezaku a ma vitanwe a malanza lawa a nga ma nyikile mali, lezaku a fela ku tiva lezi va bhinzuleko ha yona.

¹⁶ A ga kuranga gi lota, gi taku: Hosi, a pondo ya wena yi bhinzule khume ga tipondo.

¹⁷ Aku ngalo ka gona: U mahile khwatsi, nanza go saseka; lezi u nga tsumbeka ka lezi zi tsongwani, u ta fumela khume ga miti.

¹⁸ A ga wumbiri gi lota, gi taku: Hosi, a pondo ya wena yi bhinzule a ntlhanu wa tipondo.

¹⁹ I te ngalo ka gona kambe: U ta fumela ntlhanu wa miti.

²⁰ Ku lota ginwani gi taku: Hosi, a pondo ya wena hi leyi; nzi wa yi bohele leswini,

²¹ hakuva nzi wa ku chava, hilezi u nga munhu wa lunya; u teka lezi u nga vekangiko, u tshovela lezi u nga byalangiko. Mat. 25:24

²² Yena aku ngalo ka gona: Nanza go biha, nzi ta ku lamula hi magezu ya wena. Wena u wa kari u zi tiva lezaku nzi munhu wa lunya, nzi tekako lezi nzi nga vekangiko, nzi tshovela lezi nzi nga byalangiko; 2 Sam. 1:16; Joba 15:6; Mat. 25:26

²³ Hikuyini u nga kala ku veka mali ya mina bankeni, kasi a kuwuyeni ka mina ngha nzi yi vitanile zinwe ni bhinzu?

²⁴ Zonake i te ngalo ka vona lavo va nga yimile laho: Mu tekeleni a pondo, mu yi nyika ka loye a nga ni khume ga tipondo.

²⁵ Vaku ngalo kakwe: Hosi, i na ni khume ga tipondo.

²⁶ Aku: Nza mu byela lezaku kani himani a nga nazo, i ta nyikiwa zinwani; kanilezi loyi a nga hiko nazo, hambu ni lexi a nga naxo xi ta tekiwa ka yena. Mat. 13:12; 25:29; Mar. 4:25

²⁷ Kanilezi a valala va mina, lava va nga kala va nga zi ranzi aku ngha nzi fuma hehla kabye, va neheni laha, mu va daya mahlweni ka mina.

Jesu a enghena Jerusalema.

²⁸ Loku a mbhetile timhaka leti i lo ranga mahlweni, a kanziha kuya Jerusalema.

²⁹ Ku te laha a nga tshinela Betfage ni Betania, le xitsungeni xi vitwako xa maOliva, i lo ruma vapizani vambiri, Mat. 21:1; Mar. 11:1

³⁰ aku: Fambani ximutaneni xi nga mahlweni ka nwina, mu ta ya kuma a ximbongolana na xi khungilwe, lexi cima xi nga khilelwangiko hi munhu; xi tlhatlheni muta naxo ka mina.

³¹ Loku a munhu a wutisa ku ngalo: Hi yini mu xi tlhatlhako ke? mu taku: A Hosi ya xi lava.

³² Ni lava va nga wa rumilwe va lo famba, va lo ya kuma kota lezi a nga wulile ka vona.

³³ Kota lezi va nga kari va tlhatlha a mbongola, a venyi va yona va te ngalo kabye: Hi yini mu tlhatlhako a mbongola ke?

³⁴ Vaku ngalo: A Hosi ya yi lava.

³⁵ Va lo yi neha ka Jesu, va tlhateka tinguwo tabye hehla ka mbongola, va mu khilelisa Jesu hehla ka yona.

³⁶ Kota lezi a nga famba va lo andlala a tinguwo tabye ndleleni. Mat. 21:8

³⁷ Zonake loku a tshinela kureleleni ka xitsunga xa maOliva, a xidlemo xontlhe xa vapizani xi lo sangula ku tsaka, xi dumisa Nungungulu hi gezu ga hombe hi kota ya zirewukiso zontlhe lezi va nga zi wonile;

³⁸ vaku: A yi khesiwe a Hosi leyi yi tako vitweni ga Jehova; a kurula a kuve le tilweni, ni kungangamela le hehla-hehla! Tis. 118:26; Xip. 2:14; 13:35

³⁹ A vaFarisi vanwani, lava va nga le xidlenwini, vaku ngalo kakwe: Mugonzisi, kawuka a vapizani va wena.

⁴⁰ Yena i lo hlamula, aku: Nzi ngalo ka nwina, loku va miyela lava, a maribye ma ta kanyuluka. Hab. 2:11

⁴¹ Laha a nga tshinele, a wona muti, i lo wu rilela, Joh. 11:35

⁴² aku: Loku wena u wa zi tivile nyamutlha lezi zi vangako kurula! Kanilezi makunu zi fihlilwe ka wena.

⁴³ Hakuva a masiku ma tata hehla ka wena, laha a valala Va wena va ta nga ku bhiyela, va ku ranzela, va ku valela matlhelweni wontihe. Isa. 29:3, 4; Jer. 6:3, 6

⁴⁴ Va ta ku hahlula uku putsu, zinwe ni vana va wena lava va nga xikari ka wena; ku nga ta siyiwa xikari ka wena a ribye ginwe hehla ka ginwani; hakuva a ku tivangi a xikhati lexi u enzelwako ha xona. Mika 3:12; Dan. 9:24; Mat. 24:2; Mar. 13:2; 1 Ped. 2:12

⁴⁵ Yena i lo enghena tempeleni, a sangula ku hlongola lava va nga xavisa, Mat. 21:12; Mar. 11:11, 15

⁴⁶ aku ka vona: Ku tsalilwe ku ngalo: A yindlu ya mina yi tava yindlu ya kukhongela, kanilezi nwina mu yi mahile a mhako ya makhamba. Isa. 56:7; Jer. 7:11

⁴⁷ Yena i wa gonzisa masiku wontihe le tempeleni; kanilezi a vapristi va hombe ni vatsali ni varangeli va vanhu va wa lava ku mu daya. Mar. 11:18; Joh. 7:19; 8:37

⁴⁸ Va lo tsanzeka ku maha nchumu, hakuva a vanhu vontlhe va wa namarela ka yena, va mu ingisa.