Luka 18 - Tshwa Bible

A noni ni mulamuli.

¹ Yena i lo kanela kabye a mufananiso xungetano ni lezaku va fanele ku khongela a xikhati xontlhe, va nga Xip. 11:5; Rom. 12:12; Kol. 4:2

² aku: A mutini wo kari ku wa hi kona a mulamuli, loye a nga kala a nga chavi Nungungulu, ni ku nga khatali hi munhu.

³ A mutini walowo ku wa hi ni noni, leyi yi ngata kanyingi kakwe, yi taku: Nzi lulamisele a mhaka ka nala wa mina.

⁴ Ku wa hi xikhati xo kari na a nga vumeli; kanilezi hi lenzhako i lo alakanya, aku: Hambu lezi nzi nga chaviko Nungungulu, ne ni ku khatala hi munhu;

⁵ kanilezi kota lezi a noni leyi yi nzi karatako, nzi ta yi lulametela a mhaka, yi nga kala yi nzi rera loku yi simamisa yita.

⁶ Hosi yi te ngalo: Zwanani lezi a wulako a mulamuli a nga lulamangiko!

⁷ Xana Nungungulu a nga ta va photela a vahlawulilweko vakwe, lava va rilako ka yena a mumu ni wusiku ke, a nga ta timisela ha vona ke? Kuv. 6:10

⁸ Nziku ka nwina: I ta va photela hi kuhatlisa. Ahemba-lokoke, laha Nʼwana wa munhu a ta nga wuya, i ta ta kuma kukholwa misaveni ke? Maheb. 10:37; 2 Ped. 3:8, 9

Mufananiso wa muFarisi ni muhlengisi.

⁹ I lo engeta a kanela lowu mufananiso ka vokari lava va ti tsumbako vaku va lulamile, va kanyisa vanwani, aku: Xip. 10:29; 16:15

¹⁰ A vavanuna vambiri va loya tempeleni ku ya khongela; a munwe i wa hi muFarisi, munwani a hi muhlengisi.

¹¹ A muFarisi i lo yima hi tlhelo a khongela, aku: Nungungulu, nza ku bonga hilezi nzi nga fananiko ni vanwani vanhu; va nga makhamba, ni vakanganyisi, ni zirembi, hambu ku khwatsi hi muhlengisi loyi. Tis. 135:2; Isa. 1:15; Kuv. 3:17

¹² Nzi yila kumbiri hi viki, nzi nyika za wukhume ka zontlhe lezi nzi zi kumako.

¹³ Kanilezi a muhlengisi i lo yima kule, a nga tiyangi ni ku tlakusa a mahlo yakwe le tilweni, kanilezi a tiba xifuva, aku: Nungungulu, ngha u hi ni wuxinji ka mina nzi nga muonhi.

¹⁴ Nziku ka nwina: Loyi munhu i lo tlhelela kaya na a hlayiwa loyi a lulamileko ku hunza loyi munwani; hakuva ni wihi a ti kulisako i ta koramiswa; kanilezi loyi a ti koramisako i ta kuliswa. Joba 22:29; Mat. 23:12; Jak. 4:6

Jesu a katekisa zihlangana.

¹⁵ Vanhu va lo neha kakwe a tisana tabye, lezaku kasi a fela ku ti khumba; kanilezi laha a vapizani vakwe va nga zi wonile, va lo va kawuka. Mat. 19:13; Mar. 10:13

¹⁶ Kanilezi Jesu i lo vitana vanana, aku: Vumelani a vanana vata ka mina, mu nga va beleteli; hakuva a mufumo wa Nungungulu ngwa va kunghahi. 1 Kor. 14:20; 1 Ped. 2:2

¹⁷ Hizinene nziku ka nwina: Kani hi wihi a nga amukeliko a mufumo wa Nungungulu kota a nwanana, cima a nga ta enghena ka wona. Mar. 10:15

A mufumeli a wutisa hi wutomi ga pinzukelwa.

¹⁸ A mufumeli wo kari i lo mu wutisa, aku: Mugonzisi nene, nzi ta maha yini kasi nzaga a tshomba ya wutomi ga pinzukelwa ke? Mat. 19:16; Mar. 10:17

¹⁹ Jesu aku kakwe: Hi yini u nzi vitanako uku nzi nene ke? A ku na loyi nene, saseka munwe, yena Nungungulu.

²⁰ Wa yi tiva milayo leyi yi nge ngalo: U nga bhayi, U nga dayi, U nga yivi, U nga mahi wukustumunyu ga mawunwa, Chava raru wa wena ni nyine wa wena. Ekso. 20:12, 16; Rom. 13:9

²¹ Yena aku ngalo: Zontlhe lezi nzi zi hlayisile kusukela wusweni ga mina.

²² Laha Jesu na zi zwile, i te ngalo kakwe: Wa ha vumala xilo xinwe; xavisa zontlhe lezi u nga nazo, u avela zisiwana, wena u tava ni tshomba le tilweni; zonake ngona u nzi lanzela. Mat. 6:19, 20; 1 Tim. 6:19

²³ Kanilezi laha na a zi zwile, i lo xaniseka nguvu; hakuva i wa hi ni kufuma ka hombe.

²⁴ Jesu na a mu wona aku ngalo: Zi tsanzisa kuyini ka lava va fumileko a ku enghena mufunweni wa Nungungulu! Mat. 11:28; Mat. 19:23; Mar. 10:23

²⁵ Za hehuka ka kameli ku enghena nonwini wa chingani, ku hunza munhu a fumileko ku enghena mufunweni wa Nungungulu.

²⁶ Lava va nga zizwa vaku ngalo: Kasi himani a nga hanyiswako ke?

²⁷ Kanilezi yena aku ngalo: A zilo lezi zi nga kotekiko ka vanhu, za koteka ka Nungungulu. Jer. 32:17; Zak. 8:6; Mat. 19:28

²⁸ Pedro aku ngalo: Wangabye, hina hi siyile a za hina, hi ku lanzela.

²⁹ Aku ngalo kabye: Hizinene nziku ka nwina: A ku na munhu loyi a siyileko yindlu, kutani sati, kutani vanakulobye, kutani vapswali, kutani vana, hi kota ya mufumo wa Nungungulu, Deut. 33:9

³⁰ loyi a ta nga kala ku amukela hi kuengetilweko kunyingi a ka lexi xikhati, ni ka tiko gi tako a wutomi ga pinzukelwa. Joba 42:10

Jesu a tivisa hi kufa kakwe.

³¹ Yena i lo tsawuka ni vakhume ni vambiri, aku ngalo babye; Langutani, hi kanziha hiya Jerusalema; zonake ku ta tatiseka zontlhe lezi zi tsalilweko hi vaprofeti hi Nʼwana wa munhu. Tis. 22; Isa. 53; Mat. 16:21

³² Hakuva i ta nyikelwa ka vamatiko, va ta mu tseketsela, a khomiwa hi tingana, ni ku phelelwa; Mat. 27:2; Joh. 18:28; Miti. 3:13

³³ va ta mu xupula ni ku mu daya; hi siku ga manharu i ta tlhela a vuka.

³⁴ A va pimangi nchumu timhakeni leti; a gezu legi gi wa fihlilwe ka vona, va kohlwa hi lezi a zi wulako. Mar. 9:32; Joh. 10:6; 12:16

Jesu a hanyisa xikhumu.

³⁵ Kota lezi a nga kari a tshinela Jeriko, a xikhumu xi wa tshamile reveni ga ndlela, xi kombela. Mat. 20:29; Mar. 10:46

³⁶ Laha na xizwa a xidlemo xi kari xi hunza, xi lo wutisa lezaku xini.

³⁷ Va lo mu byela vaku: Hi Jesu wa le Nazareta a hunzako.

³⁸ Yena i lo vitana, aku: Jesu, nʼwana Davida, nzi mahele wuxinji.

³⁹ Lava va nga rangile mahlweni va lo mu kawuka, lezaku ngha a miyela; kanilezi yena i lo engeta a vitana nguvu, aku: Wena nʼwana Davida, nzi mahele wuxinji.

⁴⁰ Jesu i lo yima, a laya a kuva a nehiwa kakwe; laha a nga tshinele, i lo mu wutisa, aku:

⁴¹ U ranza a ku ngha nzi ku mahela yini ke? Aku ngalo: Hosi, ngha nzi tlhela nzi wona.

⁴² Jesu aku ngalo ka yena: Tlhela u wona; a kukholwa ka wena ku ku hanyisile. Xip. 17:19

⁴³ Khalekhale i lo tlhela a wona; a mu lanza, a dumisa Nungungulu. A vanhu vontlhe loku va zi wonile, va lo dumisa Nungungulu. Xip. 5:26; Miti. 4:21; 11:18