Luka 16 - Tshwa Bible

A nekwa leyi yi nga tsumbekangiko.

¹ I lo engeta a wula ka vapizani; aku: A munhu a fumileko i wa hi ni nekwa, yi nga kecariwa ka yena, lezaku ya hangalasa xuma xakwe.

² Yena i lo yi vitana, aku ka yona: Zini lezi nzi zi zwako ha wena ke? Hlawutela a mahungu ya wunekwa ga wena, hakuva a zi koteki a kuva u hi nekwa kambe.

³ A nekwa yi lo alakanya mbilwini ya yona, yiku: Nzi ta maha yini, lezi a hosi ya mina yi nzi susako wunekweni ga mina ke? A nzi na ntamu ku rima, ni ku kombela nzi na ni tingana.

⁴ Nza zi tiva lezi nzi ta nga zi maha, lezaku kasi va fela ku nzi amukela tindlwini tabye laha na nzi susilwe wunekweni ga mina.

⁵ Yi lo vitana ha munwe-munwe lava va nga hi ni milanzu ka hosi ya yona; yiku ka wa kuranga: I nanzu muni u nga nawo ka hosi ya mina ke?

⁶ Yena i lo hlamula, aku: I zana ga mabarero ya mafura. Yiku ngalo kakwe: Hatlisa u teka papilo ga wena ga nanzu, tshama u tsala 50.

⁷ Yiku ngalo ka munwani: I nanzu muni u nga nawo wena ke? Aku ngalo: I zana ga tisakwa ta mavele. Yiku ngalo kakwe: Teka papilo ga wena ga nanzu, u tsala 80.

⁸ Ni hosi ya yona yi lo dzunza a nekwa yo biha, hilezi yi mahile hi wutlhari. Hakuva a vana va misava leyi va tlharihile ka xizukulwana xabye a ku hunza a vana va kuwonekela. Joh. 12:36; Efe. 5:8; 1 Tes. 5:5

⁹ Nziku ka nwina: Ti maheleni a maxaka hi cuma lexi xi nga lulamangiko; kasi loku xi mbhelile, va fela ku mu amukela mixaxeni ya pinzukelwa. Dan. 4:27; Mat. 6:19; 19:21

¹⁰ Loyi a tsumbekako ka lezi zi tsongwani, i tsumbekile ni ka lezi za hombe; ni loyi a nga lulamangiko ka lezi zi tsongwani, a nga lulamangi ni ka lezi za hombe. Mat. 25:21; Xip. 19:17

¹¹ Hikwalaho loku mu nga tsumbekangi ka cuma xi nga lulamangiko, zonake himani a ta nga mu nyika ku lonzowota a tshomba yi nene ke?

¹² Loku mu ngha mu nga tsumbekangi hi lezo zi lumbako munwani, himani a ta nga mu nyika lezi zi nga za nwina venyi ke?

¹³ A ku na nanza gi zi kotako ku tirela tihosi timbiri; hakuva gi ta venga yinwe, gi ranza yinwani; kutani gi ta namarela ka yinwe, gi kanyisa yinwani. Nwina a mu zi koti ku tirela Nungungulu ni Mamona. Mat. 6:24

¹⁴ A vaFarisi lava va nga hi ziranzi za mali, va lozwa tontlhe leti timhaka; va mu tseketsela. Mat. 23:14

¹⁵ Yena aku ngalo kabye: Hi nwina mu ti mahako lava va lulamileko a mahlweni ka vanhu; kanilezi Nungungulu wa tiva a timbilu ta nwina; hakuva lezi zi tlakukileko xikari ka vanhu, zinyenyeko mahlweni ka Nungungulu. 1 Sam. 16:7; Tis. 7:9; Xip. 10:29

¹⁶ A nayo ni vaprofeti zi lo simamisa a kala a chikela Johani; ku sukela lexo xikhati ya kanetwa a ivangeli ya mufumo wa Nungungulu, munwe ni munwani a maha hi ntamu ku enghena ka wona. Mat. 4:17; 11:12, 13; Xip. 7:29

¹⁷ Kanilezi za hehuka lezaku a tilo ni misava zi nyamalala, ku hunza lezaku wuwa a nzatana munwe wa nayo. Tis. 102:26, 27; Isa. 40:8; 51:6

¹⁸ Kani hi wihi a hlongolako a sati wakwe, a teka munwani, wa bhaya; ni loyi a tekako sati a hlongolweko hi nuna, wa bhaya. Mat. 5:32; 19:9; Mar. 10:11

Mufananiso wa Munhu wo fuma na Lazaru.

¹⁹ Ku wa hi ni munhu a fumileko, loyi a nga ambala ziwunguwungu ni tinguwo to basa, aga lezi zo nanziha a masiku wontihe.

²⁰ Kambe ku wa hi ni mukombeli, a nga hi Lazaru a vito gakwe, loyi a nga wa tshama nyangweni ya loyi wo fuma, na a tele hi zilonza.

²¹ I lo navela ku xura hi matlhatlha laya ma ngawa hi laha mezeni ya munhu wo fuma. Ni timbyana ti lo ta lazela a zilonza zakwe.

²² A mukombeli i lofa, a yiswa hi tingelosi xifuveni xa Abrahama; na yena munhu wo fuma i lofa a lahliwa.

²³ Na hi le Hayidesi le kuxanisekeni, i lo tlakusa mahlo yakwe, a wona Abrahama na hi le kule, na Lazaru a hi xifuveni xakwe.

²⁴ I lo vitana aku ngalo: Dadani Abrahama, nzi mahele wuxinji, u ruma Lazaru, a kuva a peta wutlha ga litiho lakwe matini, a ta titimeta a lirimi la mina, hakuva nza xaniseka nguvu phingweni legi. Isa. 66:24; Zak. 14:12; Mar. 9:44

²⁵ Kanilezi Abrahama aku ngalo: Nwananga, alakanya lezaku u amukele a makatekwa ya wena kuhanyeni ka wena, kanilezi Lazaru i amukele makhombo; makunu yena wa tangaliswa laha, kasi wena wa xaniseka. Joba 21:13; Xip. 6:24

²⁶ Tlhatakumbiri, ku na ni geva ga hombe xikari ka hina na nwina; lezaku lava va ranzako a ku suka seno vata ka nwina a va zi koti; hambu ni lava va nga seyo, a va zi koti ku tlhatuka vata ka hina.

²⁷ Yena aku ngalo: Dada, nza ku khongotela lezaku ngha u mu rumela le ndlwini ya dadani;

²⁸ hakuva nzi na ni ntlhanu wa vanakulori; kasi a fela ku va khongotela, lezaku va ngati na vonawu ka wutshamu legi ga kuxaniseka.

²⁹ Kanilezi Abrahama aku ngalo: Va na na Mosi ni vaprofeti; ngha va ingisa vona. Isa. 8:20; Joh. 5:45; Miti. 15:21

³⁰ Yena aku ngalo: Kokwihi, dadani Abrahama; kanilezi loku munwe a humako hi ka vafileko aya ka vona, va ta hunzuluka.

³¹ Abrahama a engeta, aku: Loku va nga ingisi Mosi ni vaprofeti, va nga ta kholwa, hambu loku a vuka munwe hi ka vafileko. Joh. 12:10, 11