Kuvululelwa 5 - Tshwa Bible

A bhuku ga ntlhanu wa zifungo ni zimbiri.

¹ Nzi lo wona a bhuku canjeni ga xinene ga loyi a tshamileko xitshanwini xa wuhosi, legi gi tsalilweko nzeni ni laha handle, na gi valilwe hi ntlhanu wa zifungo ni zimbiri. Isa. 29:11; Ezek. 2:9, 10; Dan. 12:4

² Nzi lo wona a ngelosi ya ntamu yiba hungu hi gezu ga hombe, yiku: Himani a faneleko ku vulula a bhuku legi, ni ku namula a zifungo za gona ke?

³ Ku wa nga hi kona ni munwe le tilweni, ni laha misaveni, kutani lahasi ka misava, loyi a nga zi kota ku vulula bhuku, ni ku wona lezi zi tsalilweko ka gona.

⁴ Laha nzi nga rila nguvu, hilezi ku nga kala ku nga kumiwangi ni munwe loyi a faneleko ku vulula bhuku ni ku wona lezi zi tsalilweko ka gona,

⁵ zonake a nghanakana ginwe giku ngalo ka mina: U nga rili, hi nga wona a Nghala ya lixaka la ka Juda, a Mutsu wa Davida, yi hlulile kasi ya zi kota ku vulula bhuku, ni ku namula a zifungo za gona za ntlhanu ni zimbiri. Gen. 49:9; Isa. 11:1, 10; Xip. 22:16

⁶ Nzi lo wona a Yivana na yi yimile xikari ka xitshamu xa wuhosi ni mune wa zimahwa zi hanyako, ni xikari ka manghanakana, na yiku khwatsi yi tlhabyilwe. Yi wa hi ni ntlhanu wa timhonzo ni timbiri, ni ntlhanu wa mahlo ni mambiri, ma nga mimoya ya ntlhanu ni mimbiri ya Nungungulu, leyi yi rumilweko misaveni yontlhe. Isa. 53:7; Zak. 3:9; Joh. 1:29

⁷ Yi lo ya teka a bhuku canjeni ga loyi a tshamileko xitshanwini xa wuhosi.

⁸ Laha na yi tekile bhuku, a mune wa zimahwa zi hanyako ni 24 wa manghanakana ma lowa lahasi mahlweni ka Yivana; ginwe ni ginwani gi wa hi ni gubhu, ni zibya za nzalama zi teleko hi mpepo, yi nga mikhongelo ya vobasa. Tis. 141:2; Xip. 14:2

⁹ Ma lo yimbelela lisimu liswa, maku: Wena u fanele ku vulula bhuku, ni ku namula zifungo za gona; hakuva u wa tlhabyilwe, u xavele Nungungulu a vanhu va tixaka tontlhe hi nkhata wa wena, ni tirimi, ni mufumo, ni matiko, Tis. 40:3; Dan. 4:1; Rom. 3:24

¹⁰ u va yimisa a kuva mufumo ni vapristi va Nungungulu wa hina, va fumela misaveni. Ekso. 19:6; 1 Ped. 2:5, 9

¹¹ Zonake nzi lo cuwuka, nzizwa a magezu ya tingelosi to tala, na ti ranzele a xitshamu xa wuhosi ni ximahwa zi hanyako ni manghanakana; a tsengo wa tona wu wa hi mazanazana ya mazana, ni mazana ya mazana ya tsanza-vahlayi; Tis. 68:17; Maheb. 12:22

¹² tiku hi gezu ga hombe: A Yivana leyi yinga tlhabyilwe, yi fanele ku kuma wuhosi, ni kufuma, hi wutlhari, ni ntamu, ni wudumo, ni kukhesiwa, ni kubongwa.

¹³ Ni zilo zontlhe zi vangilweko lezi zi nga le tilweni, ni za laha misaveni, ni lezi zi nga lahasi ka misava, ni lezi zi nga bimbini, ni zontlhe zi nga ka zona, nzi lo zizwa ziku: A kubongwa, ni wudumo, ni kukhesiwa, ni kufuma, a zive ka loyi a tshamileko xitshanwini xa wuhosi ni ka Yivana, kala kupinzuka ni kupinzuka. Fil. 2:10; 1 Tim. 6:16; Xip. 7:10

¹⁴ A ximahwa lezi za mune ziku: Amen. Ni manghanakana ma lowa hasi ma khozela.