Kuvululelwa 4 - Tshwa Bible

A xitshamu xa wuhosi xa Muvangi.

¹ Zonake nzi lo wona a nyangwa yi vululekileko le tilweni, a gezu go sangula legi nzi nga gizwa gi lo wulawula na mina, na gi zwala kota mpunzu, giku: Kanziha uta laha, nzi ta ku wonisa lezi zi ta nga maheka anzhako ka lezi. Xip. 11:12; 22:6

² Zalezo nzi wa hi le moyeni, nzi wona a xitshamu xa wuhosi na xi vekilwe tilweni, ku wa tshamile munwe hehla ka xona. Isa. 6:1; Ezek. 1:26; Dan. 7:9

³ Loyi a tshamileko ka xona i lo woneka ku khwatsi i ribye ga jasperi ni sardisi; ni wura ga nyazimu gi lo renzelekela a xitshamu xa wuhosi, gi woneka ku khwatsi i ribye ga emeraldi. Ezek. 1:28

⁴ A xitshamu xa wuhosi xi wa ranzelwe hi 24 wa zitshamu za wuhosi; a hehla ka zona ku wa tshamile a 24 wa manghanakana, na ma ambele a tinguwo to basa, ma hi ni zidlodlo za nzalama tihlokweni ta wona.

⁵ Laha xitshanwini xa wuhosi ku lo huma kuhatima ni magezu ni kudzinza. Ku wa hi ni ntlhanu wa minwenge ni mimbiri yi nga vura mahlweni ka xitshamu xa wuhosi, leyi yi nga mimoya ya ntlhanu ni mimbiri ya Nungungulu Ekso. 37:23; Ezek. 1:13; Zak. 4:2

⁶ A mahlweni xa xitshamu xa wuhosi ku wa hi kona xo khwatsi i bimbi ga vidro go kota kristali. Lomu matlhelweni wontihe ya xitshamu xa wuhosi ku wa hi ni mune wa ximahwa zi hanyako, na zi tele hi mahlo seno mahlweni ni lenzhako. Ezek. 1:5; Xip. 15:2

⁷ A ximahwa xo sangula xi wa fanana ni nghala, ni ximahwa xa wumbiri xi wa fanana ni role, ni ximahwa xa wunharu xi wa hi ni nghohe yo khwatsi nja munhu, ni ximahwa xa wumune xi wa fanana ni gama gi purumako. Ezek. 1:10; 10:14

⁸ A zimahwa lezi zi hanyako za mune, xinwe ni xinwani xa zona xi wa hi ni ntlhanu wa tipapa ni linwe, na zi tele hi mahlo a matlhelo wontihe ni lomu hasi ka tipapa. A mumu ni wusiku zi wa nga humuli, zi wa yimbelela, ziku: Basa, Basa, Basa, Hosi Nungungulu, a Nyamintamu, Loyi a nga hi kona, Loyi a nga kona, Loyi a ta ngata. Isa. 6:2, 3

⁹ Ni xihi xikhati a zimahwa zi hanyako zi nga wa khesa zi mu dumisa ni ku mu bonga loyi a tshamileko xitshanwini xa wuhosi, yena loyi a hanyako kala kupinzuka ni kupinzuka,

¹⁰ zonake a manghanakana ya 24 a mawa lahasi mahlweni ka loyi a tshamileko xitshanwini xa wuhosi, ma dumisa loyi a hanyako kala kupinzuka ni kupinzuka, ma rula a zidlodlo za wona mahlweni ka xitshamu xa wuhosi, maku: Xip. 5:8, 14

¹¹ Hosi ya hina ni Nungungulu wa hina, wena u fanele ku amukela kukhesiwa ni kudumiswa ni ntamu; hakuva hi wena u nga vanga zilo zontlhe, hi kota ya kuranza ka wena zi kona, zi vangilwe. Gen. 1:1; Miti. 17:24; Xip. 5:12