Kuvululelwa 22 - Tshwa Bible

¹ Zonake yi lo nzi komba a congo wa mati ya wutomi, na ma vangamela khwatsi hi kristali, wu huma xitshanwini xa wuhosi xa Nungungulu ni xa Yivana, Ezek. 47:1; Zak. 14:8

² wu khulunga xikari ka maphango ya muti. Seno ni seno ka congo ku wa hi ni sinya ya wutomi, leyi yi pswalako mihanzu ya khume ni yimbiri, a ku kheta hi tihweti; ni matluka ya sinya ma wa tira ku holisa matiko. Gen. 2:9; Ezek. 47:12; Xip. 2:7

³ A nzhukano yi nga tava kona kambe. A xitshamu xa wuhosi xa Nungungulu ni xa Yivana xi tava kona ka wona; ni malanza yakwe ma ta mu tirela. Ezek. 48:35; Zak. 14:11

⁴ Ma ta wona nghohe yakwe, ni vito gakwe gi ta tsaliwa zimombyeni zabye. Mat. 5:8; 1 Joh. 3:2; Xip. 14:1

⁵ Ku nga ta ha va kona wusiku; a va lavi kuwoninga ka kandiya, hambu kuwoninga ka gambo; hakuva Hosi Nungungulu i ta va woningela, zonake va ta fuma kala kupinzuka ni kupinzuka. Tis. 36:9; Dan. 7:27; Rom. 5:17

A xikhati xi tshinele.

⁶ Yi te ngalo ka mina: A timhaka leti ti tsumbekile ti nene; Hosi a Nungungulu wa mimoya ya vaprofeti, i rumele a ngelosi yakwe a ku komba malanza yakwe lezi zi yimelweko hi ku maheka lokuloku.

⁷ Languta, nzata lokuloku. I katekile loyi a hlayisako a kuprofeta ka legi bhuku. Xip. 3:11

⁸ Hi mina Johani nzi ngazwa ni ku wona lezi zilo. Laha nzi nga zizwa ni ku zi wona, nzi lowa hasi nzi khozela mikonzweni ya ngelosi leyi yi nga nzi kombeta zona.

⁹ Yiku ka mina: Hi nga wona, u nga mahi lezo. Nzi nanza khwatsi hi wena ni vamakabye va wena a vaprofeti, ni lava va hlayisako a timhaka ta legi bhuku: khozela Nungungulu. Xip. 19:10

¹⁰ Yiku ka mina: U nga vali hi xifungo a timhaka ta kuprofeta ka bhuku legi; hakuva a xikhati xi tshinele. Dan. 8:26; 12:4, 9

¹¹ Loyi a nga lulamangiko, a simamise a maha kungalulami; loyi a nyenyezileko, a simamise a ti nyenyezisa; loyi a lulamileko, a simamise a maha kululama; ni loyi a basileko, a simamise a ti basisa. Ezek. 3:22; Dan. 12:10; 2 Tim. 3:13

¹² Languta, nzata lokuloku ni nchachazelo wa mina, kasi ku ta nyika munwe ni munwani kotisa lezi wu nga zona ntiro wakwe. Isa. 40:10; 62:11; Xip. 20:12

¹³ Hi mina Alfa na Omega, nzi Wa kusangula ni Wa kugumesa, a kusangula ni kugumesa. Isa. 41:4; 44:6

¹⁴ Va katekile lava va hlazako tinguwo tabye, lezaku va fela kuva ni ntamu wa kuga a sinya ya wutomi, va enghena mutini hi tinyangwa ta wona. Dan. 12:12

¹⁵ Lava va nga timbyana va tshamile lahandle, zinwe ni valoyi, ni zibhayi, ni vadayi, ni vakhozeli va zifananiso, ni vontlhe lava va ranzako mawunwa va tira ha wona. 1 Kor. 6:9, 10; Gal. 5:19; Kol. 3:6

¹⁶ Mina Jesu nzi rumile a ngelosi ya mina a kuba hungu mabandleni hi timhaka leti. Nzi mutsu ni hluke ga Davida, nzi mahlahle a ngangamelako wa mixo. Xip. 1:1; 5:5

¹⁷ A Moya ni muswika ve ngalo: Tana! Ni loyi a zi zwako, a wule aku: Tana! Loyi a zwako tora, ate! Ni loyi a zi ranzako, ngha akha mati ya wutomi mahala. Isa. 55:1; Joh. 7:37; Xip. 21:2, 9

¹⁸ Nza tiyisa ka munwe ni munwani loyi a zwako a timhaka ta kuprofeta ka bhuku legi, nziku: Loku munhu a ti engetela, Nungungulu i ta mu engetela a zixaniso lezi zi tsalilweko bhukwini legi. Deut. 4:2; Mat. 30:6

¹⁹ Loku munhu a susa timhaka tinwani bhukwini ga loku kuprofeta, Nungungulu i ta susa xiavelo xakwe sinyeni ya wutomi, ni lomu mutini wo basa, ku tsalilweko ha zona bhukwini legi. Ekso. 32:33; Tis. 69:28; Xip. 3:5; 21:2

²⁰ Loyi a nga kustumunyu wa timhaka leti i ngalo: Ina, nzata lokuloku. Amen! Tana Hosi Jesu! 2 Tim. 4:8

²¹ A tipswalo ta Hosi Jesu a tive ni vobasa vontlhe. Amen!