Kuvululelwa 21 - Tshwa Bible

A tilo giswa ni misava yiswa.

¹ Nzi lo wona a tilo giswa ni misava yiswa; hakuva a tilo go sangula ni misava yo sangula zi wa hunzile, ni bimbi gi wa nga ha hi kona. Isa. 65:17; 2 Ped. 3:13

² Nzi lo wona muti wo basa, a Jerusalema giswa, na gi relela hi le tilweni ka Nungungulu, na gi longisilwe kota muswika a bombiselweko nuna wakwe. Isa. 52:1; 2 Kor. 11:2; Maheb. 12:22

³ Zonake nzi lozwa a gezu ga hombe gi huma xitshanwini xa wuhosi, giku: Langutani, a tabernakeli ga Nungungulu gi kona xikari ka vanhu; i ta tshama navo, vona va tava vanhu vakwe, ina Nungungulu wutsumbu i tava navo, ava Nungungulu wabye. Ezek. 43:7; 2 Kor. 6:16

⁴ I ta kulula mihloti yontlhe mahlweni yabye. Ku nga ha ta va kona kufa, hambu ni hlomulo, kutani kurila ni kubayisa; hakuva a zilo zo sangula zi hunzile. Isa. 25:8; 35:10; 1 Kor. 15:26

⁵ Loyi a tshamileko xitshanwini xa wuhosi aku: Langutani nzi maha zilo zontlhe ziva ziswa. Zonake aku: Tsala, hakuva leti timhaka ti tsumbekile ti nene. Isa. 43:19; 2 Kor. 5:17; Xip. 19:9

⁶ I lo engeta aku ka mina: Zi mahekile. Hi mina Alfa na Omega, a kusangula ni kugumesa. Loyi a zwako tora nzi ta mu nyika mahala a kuva anwa hlobyeni ya mati ya wutomi. Isa. 55:1; Xip. 1:8; 16:17; 22:17

⁷ Loyi a hlulako i taga a tshomba ya lezi zilo; nzi tava Nungungulu wakwe, yena i tava nwananga. Maheb. 8:10

⁸ Kanilezi a matoya, ni vangakholwiko, ni va manyala, ni vadayi, ni zibhayi, ni valoyi, ni vakhozeli va zifananiso, ni vontlhe vahembi, va ta kuma xiavelo xabye le tiveni legi gi vurako hi nzilo ni solufa; hi kona a kufa ka wumbiri. 1 Kor. 6:9; Gal. 5:19-21; Efe. 5:5

⁹ Ku lota yinwe ya tingelosi leti ta ntlhanu ni timbiri leti ti nga hi ni ntlhanu wa mikhelo ni yimbiri yi teleko hi zixaniso zo gumesa za ntlhanu ni zimbiri; yi ta wulawula na mina, yiku: Ngone, nzi ta ku kombeta muswika, a sati wa Yivana. Xip. 15:1, 7; 19:7

¹⁰ Yi lo nzi yisa hi moya xitsungeni xa hombe xo leha, yi nzi kombeta Jerusalema a muti lowu wo basa, na wu relela hi le tilweni ka Nungungulu, Ezek. 43:5; Xip. 1:10; 17:3

¹¹ wu hi ni kungangamela ka Nungungulu. Wu lo hatima khwatsi hi ribye ga ntsengo wa hombe, a ku fanana ni ribye ga jasperi, na gi basisile ku khwatsi hi kristali. Xip. 22:5

¹² Wu wa ranzelwe hi ligingisi la hombe lo leha, li nga ni khume ga tinyangwa ni timbiri, ni laha tinyangweni ku wa yimile khume ga tingelosi ni timbiri; le hehla ka tinyangwa ku wa tsalilwe mavito, lawa ma nga mavito ya khume ga tixaka ni timbiri ta vanana va ka Israeli. Ezek. 48:31-34

¹³ Le Mutsuwuka-gambo ku wa hi kona tinyangwa tinharu, ni le Nwalungu tinyangwa tinharu, ni le Dzongeni tinyangwa tinharu, ni le Muhlwa-gambo tinyangwa tinharu,

¹⁴ A ligingisi la muti li wa hi ni khume ga ziseketelo ni zimbiri, ku tsalilwe ka zona a khume ga mavito ni mambiri ya khume ga vapostoli ni vambiri va Yivana. Mat. 16:18; Gal. 2:9; Efe. 2:20

¹⁵ Loyi a nga kari a wulawula na mina i wa hi ni lipimo lo khwatsi lihlanga la nzalama lo pima ha lona muti, ni tinyangwa ta wona, ni ligingisi la wona. Ezek. 40:3; Zak. 2:1

¹⁶ A muti wu na ni mune wa matlhelo, a kuleha ka wona ku ringana ni kuanama. Yi lo pima a muti hi lihlanga, wu hi ni 12,000 wa mastadiu, a kuleha ni kuanama ni kutlakuka ka wona ku wa ringana.

¹⁷ Yi lo pima a ligingisi la wona, a 144 wa mikono hi lipimo la munhu, leli li nga la tingelosi kambe.

¹⁸ A ligingisi li akilwe hi jasperi, kanilezi a muti wa kona wu wa hi nzalama yi basileko, yo fanana ni vidro gi basileko.

¹⁹ A ziseketelo za ligingisi la muti zi Wa bombisilwe hi tixaka tontlhe ta maribye ya ntsengo wa hombe. A xiseketelo xo sangula xi wa hi jasperi; a xa wumbiri i safire: a xa wunharu i kalkedoni; a xa wumune i emeraldi; Isa. 54:11

²⁰ a xa wuntlhanu i sardoni; a xa wuntlhanu ni xinwe i sardisi; a xa wuntlhanu ni zimbiri i krisolite; a xa wuntlhanu ni zinharu i berile; a xa wuntlhanu ni mune i topazi; a xa wukhume i krisopase; a xa wukhume ni xinwe i jakinte; a xa wukhume ni zimbiri i ametiste.

²¹ A tinyangwa leti ta khume ni timbiri ti wa hi khume ga maperola ni mambiri; a nyangwa yinwe ni yinwani yi hi perola ginwe. A maphango ya muti ma wa hi nzalama yi basileko, yo fanana ni vidro go vangamela.

²² A nzi wonangi tempeli ka wona; hakuva a tempeli ya wona hi Hosi Nungungulu wa ntamu-wontlhe, zinwe ni Yivana. Joh. 4:23

²³ Lomu mutini a ku laveki gambo ni hweti a kuva zi woninga; hakuva wu woningwa hi kungangamela ka Nungungulu, ni kandiya ya wona hi Yivana. Isa. 24:23; 60:19, 20

²⁴ A vamatiko va ta famba kuwonekeleni ka wona, ni tihosi ta misava ti neha ka wona a wukosi ga tona. Isa. 60:3, 5, 11

²⁵ A tinyangwa ta wona cima ti nga ta valwa laha hlikanhini, (hakuva ku nga tava kona wusiku ka wona,) Isa. 60:11, 20; Zak. 14:7

²⁶ ku ta nehiwa ka wona a wukosi ni titshomba ta vamatiko.

²⁷ Cima ku nga ta enghena ka wona ni xihi xilo xo nyenyeza, hambu ni loyi a mahako manyala ni mawunwa; ku enghena ntsena lava va tsalilweko bhukwini ga wutomi ga Yivana. Isa. 52:1; Fil. 4:3; Xip. 3:5