Kuvululelwa 20 - Tshwa Bible

Satani a bohiwa.

¹ Zonake nzi lo wona a ngelosi na yi relela hi le tilweni, yi hi ni pfhungulo ya nkele wa lieswila ni ngenje ga hombe canjeni ga yona. Xip. 1:18

² Yi lo khoma drako, a nyoka leyi ya kale, yi nga Muhlevi na Satani, yi mu boha a 1,000 wa malembe. Juda 6; Xip. 12:9

³ Yi lo mu hoxa nkeleni wa lieswila, yi wu vala, yi wu tiyisa hi xifungo hehla kakwe, kasi a nga khohlisi matiko ku kala ku mbhela 1,000 wa malembe. Anzhako ka lezo i yimelwe hi kuva a tlhatlhiwa xikhatanyana. Dan. 6:17; Xip. 16:14

⁴ Nzi lo wona zitshamu za wuhosi, ku tshama hehla ka zona lava va nga nyikwa ntamu wa kuva va lamula. Nzi lo wona ni mihefemulo ya lava va nga tsenwa tihloko hi kota ya wukustumunyu ga Jesu, ni mhaka ya Nungungulu, ni lava va nga kala ku khozela xihari, hambu ni xifananiso xa xona, lava va nga amukelangiko xifungo xa xona zimombyeni zabye ni lomu mandleni yabye; va lo tlhela va hanya, va fuma zinwe na Kristu a 1,000 wa malembe. Dan. 7:9, 22, 27; 1 Kor. 6:2, 3; Xip. 6:9; 13:15, 16

⁵ A vafileko vanwani a va vukangi kala ku mbhela a 1,000 wa malembe. Loku hi kuvuka ko sangula.

⁶ I katekile i basile loyi a nga ni xiavelo kuvukeni ko sangula, a kufa ka wumbiri a ku na ntamu hehla ka vakunghaho; kanilezi va tava vapristi va Nungungulu ni va Kristu, va ta fuma naye 1,000 wa malembe. Isa. 61:6; 1 Ped. 2:9; Xip. 2:11

⁷ Loku ma mbhelile a 1,000 wa malembe, Satani i ta tlhatlhiwa paxweni gakwe.

⁸ 1 ta huma a ku ya khohlisa a matiko ya mune wa matlhelo ya misava, Gog na Magog, a va tsombanyisela kulwa; lava a ntsengo wabye wu nge khwatsi i seke ga bimbi. Ezek. 38:2; 34:1; Xip. 16:14

⁹ Va makanya livaleni la misava, va ranzela a wugovelo ga vobasa, ni muti lowu wu ranzekileko; kanilezi kuwa nzilo hi le tilweni wu va khadamula. Ezek. 38:9, 16

¹⁰ Zonake Satani, loyi a nga va khohlisa, i ta hoxwa tiveni ga nzilo ni solufa, laho ku nga kona xihari ni muprofeti wa mawunwa; va ta xaniswa mumu ni wusiku kala kupinzuka ni kupinzuka. Xip. 14:10, 11

A xitshamu xa hombe xa wuhosi xo basa.

¹¹ Zonake nzi lo wona a xitshamu xa hombe xa wuhosi xo basa, ni loyi a tshamileko ka xona; a tilo ni misava zi lo tsutsuma nghoheni yakwe, a zi kumelwangi wutshamu. Dan. 2:35; 2 Ped. 3:10

¹² Nzi lo wona a vafileko, lava vahombe ni vatsongwani, na va yimile mahlweni ka xitshamu xa wuhosi, ku lo vululwa mabhuku. Ku lo vululwa ginwani bhuku gi nga bhuku ga wutomi; ni vafileko va lo lamulwa hi lezi zi tsalilweko mabhukwini hi mitiro yabye. Tis. 69:28; Jer. 17:10; Dan. 7:10

¹³ A bimbi gi lo humesa a vafileko lava va nga hi ka gona, a lifu ni wutshamu ga vafileko zi lo humesa lava va nga hi ka zona; zonake munwe ni munwani i lo lamulwa hi mitiro yakwe. Xip. 6:8

¹⁴ A lifu ni wutshamu ga vafileko zi lo hoxwa tiveni ga nzilo: a tiva ga nzilo hi kufa ka wumbiri. 1 Kor. 15:26, 54, 55

¹⁵ Ni wihi loyi ku nga tsaliwangiko a vito gakwe lomu bhukwini ga wutomi, i lo hoxwa tiveni ga nzilo.