Kuvululelwa 18 - Tshwa Bible

¹ Anzhako ka lezo nzi lo wona yinwani ngelosi yi relela hi le tilweni, yi hi ni ntamu wa hombe; ni misava yi lo woningwa hi kungangamela ka yona. Ezek. 43:2

² Yi lo kanyuluka hi gezu ga hombe, yiku: I wile, i wile Babuloni loyi wa hombe, i hunzukile ava wutshamu ga madimoni, ni paxo ga mimoya yontlhe ya kubiha, ni ga zinyanyani zontlhe za kubiha lezi zi vengekako. Isa. 13:19, 21; 14:23; Jer. 50:39

³ Hakuva a matiko wontihe ma nwile a vinya ga zanga ya kubhaya kakwe; a tihosi ta misava ti bhayile zinwe naye, ni vamahungani va misava va fumile hi kota ya wubhayi gakwe; Isa. 47:15; Xip. 14:8

⁴ Nzi lozwa ginwani gezu gita hi le tilweni, giku: Humani ka yena, nwina vanhu va mina, lezaku kasi mu nga hlengeli zionho zakwe, mu biwa hi zixaniso zakwe, Isa. 48:20; 2 Kor. 6:17

⁵ Hakuva a zionho zakwe zi chikele ni le tilweni, Nungungulu i alakanyile a zihambuko zakwe. Gen. 18:20; Jona 1:2

⁶ Mu tlheliseleni kota lezi yena a nga tlhelisela, mu mu engeta kumbiri hi ku ringanisa ni mitiro yakwe; ni ku mu chela kumbiri gombeni legi a nga chela ha gona. Tis. 137:8; Jer. 50:15, 29

⁷ Mu nyikeni kuxaniseka ni hlomulo, ku ringana ni lezi a nga ti dumisa ni ku ti tsakisa hi za nyama; hakuva mbilwini yakwe i ngalo: Nzi muzinza, a nzi noni; cima nzi nga ta wona hlomulo. Ekso. 28:2; Isa. 47:7, 8

⁸ Hikwalaho a zixaniso zakwe zi tata hi siku ginwe, a kufa, ni hlomulo, ni ndlala; yena i ta hiswa hi nzilo hakuva i na ni ntamu Hosi Nungungulu loyi a mu-lamulako. Isa. 47:9; Jer. 50:34

⁹ A tihosi ta misava leti ti bhayileko ni ku ti tsakisa zinwe naye, ti ta mu rilela ti hlaluka, loku ti wona a musi wa kuhiswa kakwe. Jer. 50:46; Ezek. 26:16, 17; Xip. 19:3

¹⁰ Ti yimile kule hi ku chava a kuxaniseka kakwe, tiku: Yowe, yowe, a muti lowu wa hombe wa Babuloni, a muti wa ntamu! hakuva a kutsayiswa ka wena ku chikele hi xitshuketi. Isa. 21:9

¹¹ Ni vamahungani va misava va ta mu rila, va maha hlomulo ha yena, hakuva ku hava munhu wo xava zibya zabye; Ezek. 27:27

¹² a zibya za nzalama ni siliva, ni maribye ya ntsengo wa hombe, ni maperola, ni tinguwo ta wukene, ni ziwunguwungu, ni seda, ni leti to pswhuka; ni tisinya tontlhe to nuhela, ni zibya zontlhe zi mahilweko hi timhonzo ta tindlovu ni tisinya ta ntsengo wa hombe, ni za suku ni ziketse ni maribye yo basa;

¹³ ni kinamono, ni mafura yo nuhela, ni mpepo, ni hlakati yo nuhela, ni vinya, ni mafura, ni mapa, ni tirigo, ni tihomu, ni tiyivu; ni mahaxi, ni tikareta, ni tikhumbi, ni mihefemulo ya vanhu. Ezek. 27:13

¹⁴ A mihanzu leyi a muhefemulo wa wena wu nga yi navela yi sukile ka wena, ni zontlhe lezi zo nanziha hi zo saseka u lahlekelwe ha zona, u nga ha ta zi kuma kambe.

¹⁵ Lava va nga xavisa lezi zilo, va fumiswa ha yena, va ta yima hi le kule hi ku chava a kuxaniseka kakwe, va rila ni ku maha hlomulo,

¹⁶ vaku: Yowe, yowe, a muti lowu wa hombe, lowu wu nga ambele tinguwo ta wukene, ni ziwunguwungu ni to pswhuka, wu bombisilweko hi nzalama ni maribye ya ntsengo wa hombe ni maperola! Xip. 17:4

¹⁷ Hakuva a wukosi ga hombe ga kunghahi gi hangalakile hi xitshuketi. A vafambisi vontlhe va mataru, ni vontlhe va fambako matarwini, ni vamarinyero, ni vontlhe lava va bhinzuleko hi bimbi, va lo yima hi le kule, Isa. 23:14; Ezek. 27:29

¹⁸ vaba huwa hi ku wona a musi wa kuhiswa ka wona, vaku: Hi wihi muti wo fanana ni muti lowu wa hombe ke? Ezek. 27:30; Xip. 13:4

¹⁹ Va lo ti palatela tsutsungwani tihlokweni tabye, va hlaluka, va rila, va maha hlomulo, vaku: Yowe, yowe, a muti lowu wa hombe, lowu vontlhe lava va nga ni mataru lomu bimbini va nga fumiswa hi wukosi ga wona! Hakuva hi xitshuketi wu hangalakile nwa! Jox. 7:6; Joba 2:12

²⁰ Bhumani ha wona wena tilo na nwina vobasa, na nwina vapostoli, na nwina vaprofeti; hakuva Nungungulu i wu lamulile a ku photela nwina. Jer. 51:48; Lu. 11:49

²¹ A ngelosi ya ntamu yi lo tlakula a ribye go kota ribye ga hombe ga xigayo, yi gi hoxa bimbini, yiku: Hizalezo wu ta nga hoxiswa zona a muti lowu wa hombe Babuloni; cima wu nga ta ha kumiwa kambe. Jer. 51:64

²² A gezu ga vabi va magubhu ni vayimbeleli, ni lava va bako maxava ni mimpunzu cima gi nga ta ha zwiwa ka wena kambe; cima ku nga ha ta kumiwa ka wena a meseri ni wa wihi ntiro; ni guwa ga xigayo gi nga ha ta zwakala ka wena kambe. Isa. 24:8; Ezek. 26:13

²³ A kuwonekela ka kandiya cima ku nga ha ta woninga ka Wena; ni magezu ya muteki ni mutekiwa cima ma nga ha ta zwiwa ka wena: hakuva a vamahungani va wena va wa hi tihosi ta misava, hakuva a matiko wontihe ma khohlisilwe hi kuloya ka wena. Isa. 23:8; Jer. 7:34; 25:10

²⁴ Ku kumilwe ka wona a nkhata wa vaprofeti ni wa vobasa, ni wa vontlhe lava va dayilweko misaveni. Jer. 51:49; Xip. 17:6