Kuvululelwa 17 - Tshwa Bible

A kulamulwa ka Babuloni ni xihari.

¹ Ku lota yinwe ya tingelosi ta ntlhanu ni timbiri leti ti nga hi ni ntlhanu wa mikhelo ni yimbiri, yi ta wulawula na mina, yiku: Ngona laha, nzi ta ku komba a kulamulwa ka xibhayi xa hombe lexi xi tshamileko lomu matini yo tala, Nah. 3:4; Xip. 18:16, 17, 19; 21:9

² lexi a tihosi ta misava ti nga bhaya naxo, lexi a vaaki va misava va nga popiwa hi vinya ga kubhaya ka xona. Jer. 51:7

³ Yi lo nzi yisa xiwuleni hi Moya; nzi wona wasati na a khilele xihari xo pswhuka, lexi xi teleko hi mavito ya kurukatela, xi hi ni ntlhanu wa tihloko ni khume ga timhonzo. Xip. 12:3, 6; 13:1

⁴ A wasati i wa ambele xiwunguwungu ni to pswhuka, a bombile hi nzalama ni maribye ya tsengo wa hombe ni maperola, na a khomile a gombe ga nzalama canjeni gakwe, legi gi nga wa la su hlafala hi manyala, ni chaka ga wubhayi gakwe. Jer. 51:7; Dan. 11:38; Xip. 18:12, 16

⁵ Le ximombyeni xakwe ku wa tsalilwe a vito ga fihlakalo, gaku: Babuloni wa hombe, a nyine wa zibhayi ni manyala ya misava. 2 Tes. 2:7; Xip. 14:8; 18:9

⁶ Nzi lo wona wasati na a popilwe hi nkhata wa vobasa, ni nkhata wa vakustumunyu va Jesu; nzi su hlamala nguvu. Xip. 6:9, 10; 13:15; 18:24

⁷ A ngelosi yi te ngalo ka mina: U hlamalela yini? Nzi ta ku byela a fihlakalo wa wasati, ni wa xihari lexi xi mu rweleko, lexi xi nga ni ntlhanu wa tihloko ni timbiri ni khume ga timhonzo.

⁸ A xihari lexi u xi wonileko xi wa hi kona, kanilezi a xa ha hi kona; xi lava ku huma hi lomu nkeleni wa lieswila, xiya kulobyisweni. A vaaki va misava lava a mavito yabye ma nga tsaliwangiko bhukwini ga wutomi kusukela kuvangiweni ka misava, va ta hlamala loku va wona xihari, hakuva xi wa hi kona, zonake a xa ha hi kona, kasi xi ta tlhela xiva kona. Xip. 11:7; 13:8, 10

⁹ Laha ku laveka a kupima loku ku nga ni wutlhari! A ntlhanu wa tihloko ni timbiri hi ntlhanu wa zitsunga ni zimbiri lezi a tshamileko ka zona wasati. Xip. 13:1, 18

¹⁰ Kambe ti hi ntlhanu wa tihosi ni timbiri: a ntlhanu wa tona ti wile, yinwe ya hi kona, ni yinwani a yi se kuta; loku yi tile yi fela ku tshama xikhatanyana ntsena.

¹¹ A xihari lexi xi nga hi kona, lexi xi nga hiko kona makunu, hi yona a hosi ya wuntlhanu ni tinharu, na yi hi yinwe ya leti ta ntlhanu ni timbiri; xiya kulobyisweni.

¹² A khume ga timhonzo leti u nga ti wona hi khume ga tihosi, leti ti kalako ti nga se amukela wuhosi; kanilezi ti ta fuma zinwe ni xihari a xikhati xa hora yinwe. Dan. 7:20

¹³ Ti hi ni kupima kunwe, ti nyika a ntamu wa tona ni wuhosi ga tona ka xihari.

¹⁴ Ti talwa ni Yivana kanilezi ti ta hlulwa hi yona, hakuva a Yivana Mufumeli wa vafumeli ni Hosi ya tihosi; lava va nga zinwe nayo va ta hlula na vonawu, va Uga lava va vitanilweko, va hlawulilweko ni ku tsumbeka. Deut. 10:17; Jer. 50:44, 45; Xip. 19:19

¹⁵ Yi lo engeta yiku ka mina! A mati lawa u nga ma wona, laha xi tshamileko kona xibhayi, hi mifumo, ni zidlemo, ni matiko, ni tirimi. Isa. 8:7

¹⁶ Ni khume ga timhonzo leti u nga ti wona, ni xihari, zi ta venga xibhayi, zi mu maha xisiwana ni ximbyiri, zi taga nyama yakwe, zi mu hisa hi nzilo. Jer. 50:41, 42; Ezek. 16:37-44

¹⁷ Hakuva Nungungulu i vekile timbilwini tabye a ku maha kuranza kakwe, va vumelana ku nyika xihari a kufuma kabye, ti karala ti tatiseka a timhaka ta Nungungulu. 2 Tes. 2:11; Xip. 10:7

¹⁸ A wasati loyi u nga mu wona hi muti wa hombe, lowu wu fumako hehla ka tihosi ta misava.