Kuvululelwa 15 - Tshwa Bible

A makhombo yo gumesa.

¹ Nzi lo wona manwani masingita le tilweni lawa ya hombe ma hlamalisako, ya ntlhanu wa tingelosi ni timbiri ti nga ni ntlhanu wa zixaniso ni zimbiri zo gumesa, hakuva ku tatiseka ha zona a zanga ya Nungungulu.

² Nzi lo wona xo khwatsi i bimbi ga vidro gi patsilweko ni nzilo; nzi wona ni lava va nga hlula xihari ni xifananiso xa xona, ni xihlayo xa vito ga xona, na va yimile mbhirini ya bimbi ga vidro, na va hi ni magubhu ya Nungungulu mandleni yabye. Xip. 13:15-17; 21:18

³ Va yimbelela a lisimu la Mosi, a nanza ga Nungungulu, ni lisimu la Yivana, vaku: A mitiro ya wena nja hombe ya hlamalisa, Hosi Nungungulu Nyamintamu, A tindlela ta wena ti lulamile ti nene, Wena Hosi ya matiko. Ekso. 15:1; Deut. 32:4; Hos. 14:9

⁴ Himani a ta nga kala ku ku chava, wena Hosi, A nga dzunzeleti a vito ga wena ke? Hakuva hi wena wece u basileko, A matiko wontihe ma tata ma ta ku khizamela: Hakuva a mitiro ya wena yi lulamileko vi wonekelisilwe. Ekso. 15:14-16; Isa. 66:23

⁵ Anzhako ka lezo nzi lo wona na ku vululwa a tempeli ya Tabernakeli ga wukustumunyu le tilweni. Mitse. 1:50; Xip. 11:19

⁶ Ku lo huma a ntlhanu wa tingelosi hi timbiri hi lomu tempeleni, na ti hi ni ntlhanu wa zixaniso ni zimbiri; ti wa ambele tinguwo to basa ta wukene, na ti bohile a mabhandi ya nzalama zifuveni za tona. Ekso. 28:6, 8; Ezek. 44:17

⁷ Xinwe xa mune wa zimahwa zi hanyako xi lo nyika ntlhanu wa mikhelo ni yimbiri ya nzalama ka tingelosi leti ta ntlhanu ni timbiri, na yi tele hi zanga ya Nungungulu, loyi a hanyako kala kupinzuka ni kupinzuka.

⁸ Zonake a tempeli yi lo tala hi musi wu humako kungangameleni ka Nungungulu ni ntanwini wakwe; ku wa nga hi kona ni munwe a nga zi kota ku enghena tempeleni kala zi tatiseka a ntlhanu wa zixaniso ni zimbiri za tingelosi leti ta ntlhanu ni timbiri. Ekso. 40:34; Isa. 6:42; Tes. 1:9