Kuvululelwa 10 - Tshwa Bible

A xibhuktoana xi vululilweko.

¹ Nzi lo wona yinwani ngelosi ya ntamu na yi relela hi le tilweni, yi ambele refu, ni wura ga nyazimu gi hi hehla ka hloko ya yona; a nghohe ya yona yi kotisa gambo, ni mikonzo ya yona yiku khwatsi timhanze ta nzilo. Ezek. 1:28; Mat. 17:2; Xip. 1:15

² Yi wa hi ni xibhukwana xi vululelweko canjeni ga yona. Yi lo kanzihela a bimbi hi konzo wa yona wa xinene, lowu wa xibhabha wu kanzihela misaveni. Mat. 28:18

³ Yi lo kanyuluka hi gezu ga hombe, ku khwatsi hi kudzuma ka nghala; laha na yi kanyulukile, ku lo zwakala a magezu ya ntlhanu wa kudzinza ni kumbiri.

⁴ Laha a ntlhanu wa kudzinza ni kumbiri na ku zwatile a magezu ya kona, mina nzi wa lava ku tsala. Kanilezi nzi lozwa a gezu ga le tilweni giku; Vala hi zifungo a timhaka leti ti kanelweko hi kudzinza ka ntlhanu ni kumbiri, u nga ti tsali. Dan. 8:26; 12:4, 9

⁵ A ngelosi leyi nzi nga yi wona na yi yimile bimbini ni le misaveni, yi lo tlakusela a canja ga yona ga xinene le tilweni, Ekso. 6:8; Dan. 12:7

⁶ yi hlambanya hi loyi a hanyako kala kupinzuka ni kupinzuka, loyi a nga vanga tilo ni lezi zi nga ka gona, ni misava ni lezi zi nga ka yona, ni bimbi ni lezi zi nga ka gona, yiku: A xa ha hi kona xikhati kambe. Neh. 9:6; Dan. 12:7; Xip. 16:17

⁷ Kanilezi a masikwini ya gezu ga ngelosi ya wuntlhanu ni timbiri, laha yi ta ngaba mpunzu, ku heteka a fihlakalo wa Nungungulu, khwatsi hi mahungu yo saseka lawa a nga ma byela a malanza yakwe a vaprofeti.

⁸ Zonake a gezu legi nzi nga gizwa gi huma le tilweni, gi lo engeta gi wulawula ka mina, giku: Famba, u ya teka a bhuku legi gi vululekileko canjeni ga ngelosi leyi yi yimileko le bimbini ni le misaveni.

⁹ Nzi loya ka ngelosi, nzi yaku ka yona: Nzi nyike xibhukwana. Yiku ka mina; Gi teke, u giga; gi ta bava nzeni ka wena, kanilezi kanwini ka wena gi ta tsombela khwatsi wulombe. Jer. 18:16; Ezek. 2:8; 3:1-3

¹⁰ Nzi lo teka xibhukwana canjeni ga ngelosi, nziga; lomu kanwini ka mina gi lo tsombela khwatsi wulombe, kanilezi na nzi gi gile ku lo bava lomu nzeni ka mina. Ezek. 2:10; 3:3

¹¹ Nzi lo byeliwa ku ngalo: U yimelwe hi ku engeta u profeta xungetano ni vanhu vanyingi, ni matiko ni tirimi ni tihosi.