Joxua 20 - Tshwa Bible

¹ Jehova i lo wulawula ka Joxua, aku: Ekso. 21:13; Deut. 19:2

² Byela a vanana va ka Israeli, uku: Ti langeleni a miti ya wuponelo, leyi nzi mu byelileko hi nomu wa Mosi.

³ Kasi loyi a dayako munhu hi kuhoheta, na ku nga hi ku maha ha womu, i ta zi kota ku tsutsumela ka yona: yona yi tava wuponelo ga nwina ka muphoteli wa nkhata.

⁴ Loyi a chavelako ka munwe wa leyi miti, i ta yima laha nyangweni ya muti a tlhatlhambutela a nanzu wakwe tindleveni ta masingalakati ya lowo muti. Zonake va ta mu amukela lomo mutini wabye, va mu komba a yindlu a tshama zinwe navo.

⁵ Loku muphoteli wa nkhata a mu lanza, vona va nga ta mu nyikela loye mudayi mandleni yakwe, hakuva a nga dayangi muakelane wakwe ha womu, ge cima yena i wa nga mu vengi hi mahlweni ka xikhati.

⁶ Yena i ta tshama ka muti lowo a kala a yima mahlweni ka tlhangano a lamulwa, zonake i ta simamisa ka lowo muti kala kufeni ka mupristi wa hombe wa lexo xikhati. Zonake a mudayi i ta suka a famba mutini wabye a ya tshama lomu mutini wakwe ni lomu ndlwini yakwe, laha a sukileko ha kona.

⁷ Zonake va lo hlawula Kedexe le Galile, le xitsungeni xa ka Naftali, ni Xecema le xitsungeni xa ka Efraime, ni le Kiriat-Arba, ku nga le Hebroni le xitsungeni xa ka Juda.

⁸ Le tlhatuko ka Jordani hi le Mutsuwuka-gambo ka Jeriko, va lo hlawula Bezera, hi le xiwuleni le libaleni, wu maha muti wa lixaka la ka Rubeni, ni Remoti wa Gileade, a muti wa lixaka la ka Gadi, ni Golani wa Baxani, wu nga muti wa lixaka la ka Manasa.

⁹ Leyi hi miti leyi yi nga yimiselwe a vanana va ka Israeli vontlhe, ni muluveli loyi a akileko xikari kabye, lezaku kani hi wihi a dayako munhu hi kuhoheta, i ta zi kota ku chavela leyo, kasi a ngafi hi canja ga muphoteli wa nkhata, na a nga se ya yima mahlweni ka tlhangano.