Joxua 17 - Tshwa Bible

¹ Ni xiavelo xa ka Manasa xi lo kumeka, hakuva Manasa i wa hi matewula ya Josefa. Hi lezaku Makira matewula ya Manasa, Makira hi raru wa Gileade i lo nyikiwa le Gileade ni le Baxani hakuva yena i wa hi wanuna wa nhenha.

² Va lo hlahluva tihlolo kasi ku nyika a tshomba ka vanana va Manasa, lava va seleko hi mingango yabye; a vanana va Abiezeri, ni vanana va Heleki, ni vanana va Asrieli, ni vanana va Xekemi, ni vanana va Heferi, ni vanana va Xemida: lava hi vanana va xinuna va Manasa, nʼwana Josefa hi mingango yabye.

³ Kanilezi Zelofehade nʼwana Heferi wa Gileade, wa Makira, wa Manasa, i wa nga hi na mufana, kanilezi i wa hi ni vanhanyana; ni mavito yabye hi lawa: Mahla, na Noa, na Hogla, na Milka, na Tirza.

⁴ Lava va lo tshinela mahlweni ka mupristi Eliazari, ni mahlweni ka Joxua nʼwana Nuni, ni mahlweni ka tihosana, va ta ku ngalo: Jehova i leletele Mosi a ku hi nyika a tshomba xikari ka vanakulori. Zinghaho va lo nyikiwa a tshomba xikari ka vanakulobye va raru wabye khwatsi hi kuleletela ka Jehova. Mitse. 26:33

⁵ Zinghaho Manasa i lo nyikiwa a khume ga zipanze, ahandle ka tiko ga Gileade ni Baxani, lawa ma nga le tlhatuko wa Jordani;

⁶ hakuva a vanhanyana va ka Manasa va nyikilwe a tshomba xikari ka vana vakwe va xinuna; ni tiko ga le Gileade ga vana va xinuna va ka Manasa lava va seleko le tlhatuko.

⁷ A mbhingano wa ka Manasa wu sukela le Axeri kala le Mikmetati, legi gi cuwukeneko ni Xekemi, zonake a mbhingano wu longoloka wuya Dzongeni hi tlhelo ga xinene ka vaaki va le En-Tapua.

⁸ A tiko ga le Tapua i tiko ga Manasa; kanilezi Tapua loyi a nga mbhinganweni ni va ka Manasa, ngwa vanana va ka Efraime.

⁹ A mbhingano wu relela hi le xicongwaneni xa Kana, hi le Dzongeni ga xicongwana. A miti yinwani leyi yi nga hi xikari ka miti ya ka Manasa nja ka Efraime. A mbhingano wa va ka Manasa wu le Nwalungu ka xicongwana, kala le bimbini.

¹⁰ Hi le Dzongeni i tiko ga ka Efraime, kanilezi hi le Nwalungu i tiko ga ka Manasa; a mbhingano wa gona hi bimbi. Kala va chikela le Axeri hi le Nwalungu, ni ka va ka Isakari hi Mutsuwuka-gambo.

¹¹ Manasa i lo nyikiwa lomu tikweni ga Isakari ni ga Axeri: a Bet-Xani ni miti ya kona, a Jibleami ni miti ya kona, ni vanhu va Dori ni miti ya kona, ni vanhu va Endora ni miti ya kona, ni vanhu va Taanaka ni miti ya kona, ni vanhu va Megiddo ni miti ya kona; yi nga miganga minharu.

¹² Kanilezi a vanana va ka Manasa va lo tsanzeka ku khozisa a miti leyo; zonake; a vaKanani va lo tiya ku aka ka tiko lego. Vala. 1:27

¹³ Kanilezi laha a vanana va ka Israeli va nga kuma ntamu, va lo va tirisa mitiro, kanilezi a va va hlongolangi ka tiko gabye.

¹⁴ Ni vanana va ka Josefa va lo wulawula na Joxua, vaku: Hikuyini u hi nyika a tshomba ya xiavelo xinwe, a tiko ga hina gi maha ginwe basi, kasi wa hi wona lezaku hi vanhu lava va teleko, lava Jehova a va katekisileko nguvunguvu kala lezi ke?

¹⁵ Na Joxua i te ngalo kabye: Loku u hi tiko ga hombe, kanziha lomu makhwatini mu ya ti xakatsela masimu lomu tikweni ga maPerezi, ni ga maRefaime, lezo a xitsunga xa Efraime xi hlongileko ka wena.

¹⁶ Ni vanana va ka Josefa va lo hlamula, vaku ngalo: A xitsunga lexi xi nga ta enela, ni kambe a vaKanani vontlhe lava va akileko lomu tikweni ga mikova va na ni tikareta ta tisimbi, ni vanhu va le Bet-Xani ni miti yi nga le tlhatuko kabye, ni lava va nga le nkoveni ka Jezreeli.

¹⁷ Na Joxua i lo wulawula ka yindlu ya ka Josefa, a nga yena Efraime na Manasa, aku: Nwina mu tiko ga hombe, ni lezaku a ntamu wa nwina ngwa hombe; a mu na kuva ni tiko ginwe basi;

¹⁸ Kanilezi a tiko ga xitsunga gi tava ga nwina; hambu lezo gi nga khwati mu ta gi xakatsa, zonake a tindlela ta kona ti tava ta nwina; hakuva nwina mu ta hlongola vaKanani, hambu loku va hi ni tikareta ta tisimbi, ni hambu loku va hi ni ntamu.