Joxua 16 - Tshwa Bible

¹ A xiavelo xa vanana va ka Josefa lexi xi humileko hi lomu ku hlahluveni, xi sukela le Jordani hi le Jeriko, le matini ya Jeriko le Mutsuwuka-gambo, le xiwuleni lexi xi sukelako le Jeriko kala le xitsungeni xa Beteli;

² kusukela le Beteli, wu loya le Luza, wu hunza hi laha kusuhani ni mbhingano wa Arke, le Atarote;

³ zonake wu relela hi le Muhlwa-gambo kusuhani ni mbhingano wa ka Jafleti, kala mbhinganweni wa Bet-Horoni wa le hasi, ni ku kala le Gezera, zonake wu ya huma le bimbini.

⁴ Hi lomo a vanana va Josefa, Manasa na Efraime va nga kuma kona xiavelo xabye.

⁵ Lowu hi mbhingano wa vanana va ka Efraime hi mingango yabye: A mbhingano wa tshomba yabye wu le Mutsuwuka-gambo ka Atarot-Adari, wu famba kala le Bet-Horoni wa le hehla;

⁶ a mbhingano wu famba hi tlhelo ga le Mikmetati hi le Nwalungu; zonake a mbhingano wu renzeleka hi le Mutsuwuka-gambo le Taanat-Xilo, ni ku longoloka wuya mahlweni le Mutsuwuka-gambo, hi tlhelo ga Janoa;

⁷ zonake wu suka hi le Janoa, wu relela le Ataroti ni le Naara wu famba kala le Jeriko, zonake wu ya gumesa le Jordani.

⁸ Ni mbhingano wu lo suka le Tapua wuya le Muhlwa-gambo, hi le xicongwaneni xa Kana, wu ya gumesa le bimbini. Leyi hi tshomba ya lixaka la vanana va Efraime hi mingango yabye.

⁹ A vanana va ka Efraime va wa hi ni miti yabye hi tlhelo gabye, lomu xikari ka tshomba ya vanana va ka Manasa; leyi miti yi wa hi ni zimitana za yona.

¹⁰ Kanilezi a va hlongolangi a vaKanani lava va nga wa akile le Gezera; zinghaho a vaKanani va akile xikari ka wa ka Efraime kala legi siku; ntsena lezaku vona malanza. Vala. 1:29; 1 Tih. 9:6, 21