Joxua 13 - Tshwa Bible

A tixaka ti avelwa a tiko.

¹ Makunu Joxua i wa khosahele, ni kuva ni malembe yo tala, Jehova a ku ngalo kakwe: Wena u wa kale, u na ni masiku ya kutala, kanilezi ka ha sele a tiko ga hombe, legi gi fanelako ku khoziswa.

² A tiko legi gi seleko hi legi: Hi wontihe matikwana ya maFilistia, ni wontihe ya ka Gexure, 1 Sam. 27:8

³ kusukela Xihori, legi gi nga mahlweni ka Gipite, kala le mbhinganweni wa le Ekroni hi le Nwalungu, a tiko legi va nge ngalo ga maKanani; a tiko gi nga ni ntlhanu wa tihosi ta maFilistia, ya Gaza, ya Axdodi, ya Axkeloni, ya Gati, ya Ekroni, ni tiko ga maAvi;

⁴ hi le Dzongeni, gontlhe tiko ga maKanani, ni Meara legi gi nga ga maSidoni, kala le Afeka, ni ku kala le mbhinganweni wa vaAmori;

⁵ ni tiko gontlhe ga vaGebale, ni gontlhe ga Lebanoni hi le Mutsuwuka-gambo, kusukela le Baal-Gadi, hi le basi ka xitsunga xa Hermoni, ni ku kala le nyangweni ya Hamati;

⁶ ni vontlhe vaaki va le zitsungeni kusukela le Lebanoni, kala le Misrefot-Maime; ni vontlhe vaSidoni nzi ta va hlongola mahlweni ka vanana va ka Israeli. Avela lawo matiko hi ku hlahluva, gi tava tshomba ya Israeli khwatsi hi lezi nzi ku leleteleko.

⁷ Makunu lezi avela a tiko legi hi ku hlahluva, gi tava tshomba ya 9 wa tinyangwa, ni khihlanya ga nyangwa ya ka Manasa.

⁸ Va ka Rubeni ni va ka Gadi, va lo amukela a tshomba yabye leyi Mosi, a nanza ga Jehova, a nga va nyika le tlhatuko wa Jordani, hi le Mutsuwuka-gambo, Mitse. 32:33; Deut. 3:12

⁹ kusukela le Aroera legi gi nga mbhirini wa xicongwana xa Amoni, ni kusukela mutini lowu wu nga xikari ka nkova, ni lontlhe libala la Medeba kala le Diboni;

¹⁰ ni miti yontlhe ya Sihoni, a hosi ya maAmori, leyi yi nga wa fumela Hexboni, kala le mbhinganweni wa vanana va ka Amoni,

¹¹ ni Gileade, ni tiko ga ka Gexure, ni va ka Makati, ni xontlhe xitsunga xa Hermoni, ni gontlhe Baxani, kala le Saleka;

¹² ni wontihe mufumo wa Ogi le tikweni ga Baxani, loyi a fumileko le Axtarote ni Edrei, a nga yena a seleko wa va ka Refaime, laha Mosi a nga va khozisa, a va hlongola.

¹³ Kanilezi a vanana va ka Israeli a va khozisangi va ka Gexure ni va ka Makati. Hikwalaho Gexure na Makati va akile xikari ka vaIsraeli kala inyamutlha.

¹⁴ Ntsena lezaku a lixaka la ka Levi a nga va nyikangi a tshomba; a tshomba yabye hi miphahlo leyi yi hiselwako Jehova Nungungulu wa ka Israeli, khwatsi hi lezi a va byelileko. Deut. 10:9; Ezek. 44:28

¹⁵ Zinghaho Mosi i lo nyika ka lixaka la ka Rubeni a xiavelo xabye hi mingango yabye.

¹⁶ A tiko gabye gi wa sukela le Aroera le mbhirini wa xicongwana xa Amoni, ni kusukela mutini lowu wu nga xikari ka nkova, ni libala lontlhe, kusuhani ni le Medeba,

¹⁷ Hexboni ni yontlhe miti ya kona hi le libaleni; Diboni, Bamoti-Baali, Beti-Baali-Meoni,

¹⁸ Jahaza, Kedemoti, Mefati,

¹⁹ Kiriataima, Sibma, Zeret-Xahare, le xitsungeni xa nkova;

²⁰ Bet-Peori, ni minzhelelo ya le Pisga, ni Bet-Jeximote;

²¹ ni yontlhe miti ya lomu mikoveni, ni tiko gontlhe ga Sihoni, a hosi ya maAmori, loyi a nga wa fumile le Hexboni, loyi Mosi a nga mu khozisa zinwe ni tihosi ta le Midiani, ni Evi, ni Rekama, na Zuri, na Hura, na Reba, a tihosi leti ti nga wa fumelwa hi Sihoni, ti nga wa akile lomo tikweni.

²² Na Balami a nʼwana wa Beori loye a nga hi xitumbe, a vanana va ka Israeli va lo mu daya hi tlhari; zinwe ni vanwani lava va delweko.

²³ A mbhingano wa vanana va ka Rubeni wu waku kala le Jordani hi le mbhirini ya kona. Leyi hi yona tshomba ya vanana va ka Rubeni hi mingango yabye, hi miti ni zimitana zabye.

²⁴ Na Mosi i lo nyika ka lixaka la ka Gadi, a vanana va Gadi, a tshomba yabye hi mingango yabye.

²⁵ A tiko gabye ku wa Jezera, ni yontlhe miti ya le Gileade, ni khihlanya ga tiko ga vanana va ka Amoni, kala le Aroera legi gi cuwukeneko na Raba.

²⁶ Ni kusukela le Hexboni kala le Ramat-Mizpa, ni le Betonima, ni kusukela Mahanaime kala mbhinganweni wa Debira,

²⁷ ni le minzhelelweni, Bet-Harama, ni Bet-Nimra, ni Sukote, ni Zefoni, yi nga misalela ya tiko ga Sihoni a hosi ya Hexboni; ni Jordani wu wa hi mbhingano wa kona kala magumo ga Bimbi ga le Kinerota, hi le tlhatuko ka Jordani, hi le Mutsuwuka-gambo.

²⁸ Leyi hi yona tshomba ya vanana va Gadi, hi mingango yabye, ni miti ni zimitana za kona.

²⁹ Na Mosi i lo nyika ka khihlanya ga lixaka la ka Manasa, a vanana va Manasa a tshomba yabye hi mingango yabye;

³⁰ a tiko gabye hi legi: Kusukela le Mahanaime, gontlhe Baxani, ni tiko gontlhe ga Ogi, a hosi ya le Baxani; ni yontlhe miti ya Jaira leyi yi nga le Baxani; yontlhe yi wa hi 60 wa miti.

³¹ Ni khihlanya ga Gileade, ni le Axtarote, ni le Edrei, a miti ya tiko ga Ogi le Baxani; yi nyikilwe ka vanana va Makira, a nʼwana wa Manasa, a khihlanya ga vanana va Makira, hi mingango yabye.

³² Leti hi titshomba leti Mosi a nga avela le mikoveni ya Moabi, le tlhatuko wa Jordani, ngomama ni Jeriko, hi le Mutsuwuka-gambo.

³³ Kanilezi a lixaka la ka Levi, Mosi a nga Va nyikangi a tshomba. Jehova Nungungulu wa ka Israeli i tshomba yabye, kota lezi a wulileko kabye.