Johani 9 - Tshwa Bible

Jesu a hanyisa xikhumu.

¹ Na a kari a hunza, Jesu i lo wona munhu a nga hi xikhumu hi le kupswalweni kakwe.

² A vapizani vakwe va lo mu wutisa, vaku: Rabi, himani a nga onha, lezi a nga pswalwa na hi xikhumu, hi yena kutani vapswali vakwe ke?

³ Jesu i lo hlamula, aku: Yena a nga onhangi hambu ni vapswali vakwe; kanilezi zi mahekile lezaku a ntiro wa Nungungulu wu fela ku wonekeliswa ha yena. Xip. 11:4

⁴ Hi fanele a ku tira a mitiro ya loyi a nzi rumileko, na ka ha hi mumu; a wusiku gata, laha munhu a nga zi kotiko ku tira. Xip. 4:34; 5:19, 36; 11:9; 17:4

⁵ Laha nzi nga kona tikweni, nzi kuwonekela ka tiko. Xip. 1:5, 9; 3:19; 8:12

⁶ Laha na a wulawulisile lezo, i lo phela lahasi, a maha nzhope hi mari, a tota mahlo ya xikhumu hi wona.

⁷ Aku ngalo ka xona: Famba u ya hlamba xitivaneni xa Siloami (hi kutlhamuselwa ku ngalo, Kurumiwa). Yena i lo famba a ya hlamba, a wuya na a wona. Neh. 3:15

⁸ A vaakelane vakwe, ni lava va nga wa mu wonile na hi mukombeli, vaku ngalo: A hi yena loyi a nga wa tshama a kombela ke?

⁹ A vanwani vaku ngalo: Ahihi, kanilezi o fanana na yena. Yena aku ngalo: Hi mina yena.

¹⁰ Vaku ngalo kakwe: A mahlo ya wena ma lo vululiswa kuyini ke?

¹¹ I lo hlamula, aku: Munhu loyi a vitwako Jesu i lo maha nzhope, a tota mahlo ya mina, aku ka mina: Famba Siloami, u ya hlamba; lezo nzi lo famba, nzi ya hlamba, nzi su wona.

¹² Vaku kakwe: I kwihi yena ke? Aku ngalo: Ahati.

¹³ Va lo mu yisa ka vaFarisi loyi a nga wa hi xikhumu.

¹⁴ Ku wa hi sabado a siku lego Jesu a nga maha nzhope, a hanyisa mahlo ya xona.

¹⁵ A vaFarisi kambe va lo mu wutisa lezaku ma hanyisisilwe kuyini a mahlo yakwe. Yena aku ngalo kabye: I lo chela nzhope mahlweni ya mina, nzi hlamba, makunu nza wona.

¹⁶ Hikwalaho a vaFarisi vanwani vaku ngalo: Loyi munhu a ngati hi ka Nungungulu, hakuva a nga hlayisi a sabado. A vanwani vaku: A muonhi a nga mahisa kuyini a ziwoniso za kunghahi ke? Ku wa hi kona kuhambana xikari kabye. Xip. 3:2; 7:12, 43; 10:19

¹⁷ Va lo engeta va wutisa a xikhumu, vaku: Wena u yini ha yena, lezi a nga ku hanyisa mahlo ke? Aku ngalo: Muprofeti. Xip. 4:19; 6:14

¹⁸ Kanilezi a vaJuda a va kholwangi lezaku i wa hi xikhumu, niku ngalo, i tlheliselwe a kuwona kakwe, va kala va vitana a vapswali vakwe,

¹⁹ va va wutisa, vaku: Kunene loyi i nʼwana wa nwina ke, loyi mu nge ngalo i pswalilwe na hi xikhumu? Makunu i wona hikuyini ke?

²⁰ A vapswali vakwe va lo hlamula vaku: Ha mu tiva lezaku i nʼwana wa hina, ni lezaku i pswalilwe na hi xikhumu;

²¹ kanilezi aku i wonisa kuyini makunu, a hi zi tivi; mu wutiseni, i kulile; i ta ti hlamulela ha yece.

²² A vapswali vakwe va lo wula lezo, hi ku chava vaJuda; hakuva a vaJuda va wa vumelene vaku, loku munhu a vumela lezaku Jesu hr Kristu, i ta humeswa sinagogeni. Xip. 7:13; 12:42; 16:2

²³ Hikwalaho a vapswali vakwe vaku ngalo: I kulile, mu wutisani.

²⁴ Zonake va lo vitana hi xikhati xa wumbiri a munhu loyi a nga hi xikhumu, vaku ngalo ka yena: Dumisa Nungungulu; ha zi tiva lezaku loyi munhu muonhi. Jox. 7:19; 1 Sam. 6:5; Vesi 16

²⁵ I lo hlamula, aku: Kani muonhi, a nzi zi tivi. Xilo xinwe nzi xi tivako, hi lezaku nzi wa hi xikhumu, makunu nza wona.

²⁶ Vaku ngalo ka yena: I mahile yini ka wena? I lo vululisa kuyini a mahlo ya wena ke?

²⁷ I lo va hlamula, aku: Lezi nzi sinako nzi mu byelile, a mu zwangi; hikuyini mu lavako ku zizwa kambe ke? Nwinawu mu ranza ku maha vapizani vakwe ke?

²⁸ Va lo mu rukatela, vaku: U mupizani wakwe wena, kanilezi hina hi vapizani va Mosi.

²⁹ Ha zi tiva lezaku Nungungulu i wulawulile ka Mosi; kanilezi loyi munhu a hi ku tivi laha a humako ha kona. Xip. 8:14

³⁰ A munhu loyi i lo va hlamula, aku: Inaka, a xihlamaliso hi lexi, lezaku a mu ku tivi laha a humako kona, kasike i vulule a mahlo ya mina.

³¹ Ha zi tiva lezaku Nungungulu a nga ingisi a vaonhi; kanilezi loku munhu a chava Nungungulu, a maha kuranza kakwe, hi yena a mu ingisako. Joba 27:9; Tis. 34:15; Mav. 1:28

³² Kale na kale a ku zwalangi lezaku i kona mani loyi a ngha nga a vulula mahlo ya munhu wo nga a pswelwe na hi xikhumu.

³³ Loku munhu loyi a ngati hi ka Nungungulu, ngha a nga zi kotangi a ku maha nchumu.

³⁴ Va lo hlamula, vaku kakwe: Wena u la su pswalelwa kuonheni ku tshingileko, wa hi gonzisa wena ke? Va lo mu hlongola aya handle. Vesi 2

³⁵ Jesu i lozwa lezaku va mu hlongole handle; ku te loku a mu kumile, aku ngalo: Wa kholwa ka Nʼwana wa Nungungulu ke? Mat. 14:33; Mar. 1:1; 1 Joh. 5:13

³⁶ Yena i lo hlamula, aku: Hosi, hi yena mani, nzi fela ku kholwa ka yena?

³⁷ Jesu aku kakwe: U mu wonile, hi yena loyi a wulawulako na wena. Xip. 4:26

³⁸ Yena aku ngalo: Hosi, nza kholwa; a mu khizamela.

³⁹ Jesu aku: Nzi tile misaveni a ku ta lamula vanhu; lezaku kasi lava va nga woniko va fela ku wona, ni lezaku lava va wonako va maha zikhumu. Mat. 13:13; Xip. 5:22, 27

⁴⁰ Laha a vaFarisi lava va nga wa yimile laho na vazwa lezi, vaku ngalo kakwe: Hinawu hi zikhumu ke? Rom. 2:19

⁴¹ Jesu aku ngalo kabye: Loku mu wa hi zikhumu, ngha na mu nga hi na nanzu; kanilezi lezi mu nge ngalo: Ha wona; a kuonha ka nwina ku tshamile. Xip. 15:22, 24