Johani 5 - Tshwa Bible

¹ Anzhako ka lezo ku wa hi ni mubuzo munwani wa vaJuda; Jesu i lo kanziha aya Jerusalema. Levi 23:2; Deut. 16:1

² Le Jerusalema xi kona a xitivana laha Nyangweni ya Tiyivu, xi vitwako hi xiHeberu ku ngalo Betesda, xi nga ni ntlhanu wa tigumbagumba. Neh. 3:1; 12:39

³ A ka tona ku wa etlele a xidlemo xa hombe xa vababyi: a zikhumu, ni zilema, ni lava va khanyeneko ziro, na va lavelela a kuvindlukiswa ka mati.

⁴ Hakuva a ngelosi yi wa relela hi zikhati zo kari, yi ta vindlukisa a mati ya lomu xitivaneni; zonake loyi a nga ranga a enghena matini loku mati ma vindlusilwe, i wa hanyiswa hi gihi wubabyi legi a nga hi nago.

⁵ Laho ku wa hi ni munhu, loyi a nga hi wubabyini gakwe a 38 wa malembe.

⁶ Laha Jesu a nga mu wona na a etlele kona, a zi tiva lezaku i tshamisile lezo a xikhati xa hombe, aku kakwe: Wa zi ranza ku hanyiswa ke?

⁷ A mubabyi i lo mu hlamula, aku: Hosi, a nzi na munhu wa ku nzi peta xitivaneni laha mati ma vindlukiswa-ko; kanilezi loku nziku hi kuta, a munwani o relela mahlweni ka mina.

⁸ Jesu aku ngalo kakwe: Vuka, u teka sango ga wena, u famba. Mat. 9:6 Mar. 2:11 Lu. 5:24

⁹ Zalezo a munhu loyi i lo hanyiswa, a teka sango gakwe, a ti fambela. Kanilezi a siku lego gi wa hi sabado. Xip. 9:14

¹⁰ Hikwalaho a vaJuda vaku ka loyi a hanyisilweko: 1 sabado, a zi faneli ka wena a ku rwala a sango ga wena. Ekso. 20:10; Neh. 13:19; Jer. 17:21

¹¹ Yena i lo va hlamula, aku: Loyi a nzi hanyisileko, i te ngalo ka mina: Teka sango ga wena, u famba.

¹² Va lo mu wutisa, vaku: Hi mani a munhu loyi a ngaku ka wena: Teka sango ga wena, u famba?

¹³ Kanilezi loyi a hanyisilweko i wa nga zi tivi aku hi mani; hakuva Jesu i wa nyamalele, lezi ku nga hi ni vanhu vo tala wutshanwini lego.

¹⁴ Anzhako ka lezo, Jesu i lo mu kuma tempeleni, aku ngalo kakwe: Wangabye, u hanyisilwe; u nga dzuki u onha kambe, ku nga taku a kubiha ka hombe ko hunza loku kuta hehla ka wena. Mat. 12:45; Xip. 8:11

¹⁵ A munhu loyi i lo famba, a ya byela vaJuda, lezaku hi Jesu a mu hanyisileko.

¹⁶ Hi kota ya lezi a vaJuda va lo sangula ku xanisa Jesu, hilezi a nga tira lezi zilo hi sabado.

¹⁷ Jesu i lo hlamula, aku: Dadani wa ha tira ni lezi, na mina nza tira. Xip. 9:4; 14:10

¹⁸ Hikwalaho ka mhaka leyi a vaJuda va lo hlota ku mu daya, hakuva a nga tshovangi sabado ntsena, kanilezi i lo vitana Nungungulu aku i Raru wakwe, a ti maha a ecana ni Nungungulu. Xip. 7:19; 10:30; Fil. 2:6

¹⁹ Jesu i lo hlamula, aku ngalo kabye: Hizinene nziku ka nwina: a Nʼwana a nga zi koti ku ti sangulela a tira nchumu, ntsena lezi a zi wonako na zi mahiwa hi Dadani; hakuva ni zihi zilo Dadani a zi mahako, lezo ni Nʼwana i zi mahisa lezo. Xip. 8:28; 9:4; 12:49

²⁰ Hakuva a Dadani wa mu ranza Nʼwana, wa mu kombeta zontlhe lezi a zi mahako yena wutsumbu; zonake i ta mu komba mitiro ya hombe yo hunza leyi, kasi mu fela ku hlamala. Mat. 3:17; Xip. 3:35; 2 Ped. 1:17

²¹ Hakuva khwatsi hilezi Dadani a vuxako a vafileko a va hanyisa, hizalezo kambe a Nʼwana wa va hanyisa lava a zi ranzako. Lu. 7:14; Xip. 11:25, 43

²² Tlhatakumbiri, Dadani a nga lamuli munhu ni munwe, kanilezi i hendleletele Nʼwana a kulamula kontlhe; Mat. 11:27; 28:18; Miti. 17:31; 1 Ped. 4:5

²³ kasi vontlhe va fela kuva ni xichawo hi Nʼwana, kota lezi va nga ni xichawo hi Dadani. Loyi a nga hiko na xichawo hi Nʼwana, a nga chavi ni Dadani loyi a mu rumileko. 1 Joh. 2:23

²⁴ Hizinene, nziku ka nwina: Loyi a zwako a mhaka ya mina, ni ku kholwa loyi a nzi rumileko, i na ni wutomi ga pinzukelwa; zonake a ngati kulamulweni, kanilezi i humele kufeni, a enghena wutomini. Xip. 3:16, 18; 6:40, 47; 1 Joh. 3:14

²⁵ Hizinene, nziku ka nwina: A xikhati xa hata, xi kona ni lezi, laha a vafileko va ta ngazwa a gezu ga Nʼwana wa Nungungulu; lava va ta nga gizwa va ta hanya. Efe. 2:1, 5; 5:14; Kol. 2:13

²⁶ Hakuva kota lezi Dadani a nga ni wutomi nzeni kakwe, hizalezo i nyikile Nʼwana a kuva ni wutomi nzeni kakwe.

²⁷ I mu nyikile ntamu ku lamula, hilezi a nga Nʼwana wa munhu. Dan. 7:13, 14; Miti. 10:42

²⁸ Mu nga hlamali hi lexi, hakuva xikhati xa hata, laha vontlhe va nga le zilahleni va ta ngazwa a gezu gakwe,

²⁹ va huma; lava va mahileko kusaseka, va vuka a kuya wutomini; ni lava va mahileko kubiha, va vuka vaya kulamulweni. Isa. 26:19; Dan. 12:2; Mat. 25:46

³⁰ Mina a nzi zi koti ku maha nchumu ha nzoce. Nza lamula kota lezi nzi zi zwako; a kulamula ka mina ku lulamile, hakuva a nzi lavi kuranza ka mina, kanilezi a kuranza ka loyi a nzi rumileko. Mat. 26:39; Xip. 4:34; 6:38

³¹ Loku nzi ti mahela wukustumunyu, a wukustumunyu ga mina a hi gi nene. Xip. 8:14; Kuv. 3:14

³² Kanilezi i kona munwani a nzi kustumunyelako; nza zi tiva lezaku a wukustumunyu legi a nzi mahelako gona gi nene. Mat. 3:17; 1 Joh. 5:6, 7, 9

³³ Mu rumile mitsumi ka Johani, zonake yena i mahile wukustumunyu hi zinene.

³⁴ Kanilezi mina a nzi amukeli Wukustumunyu ga munhu; ahemba-lokoke nza wula lezi kasi mu fela ku hanyiswa.

³⁵ Johani i wa hi kandiya yi vurako yi woningako; nwina mu vumele ku tsaka xikhatanyana kuwonekeleni kakwe. 2 Ped. 1:19

³⁶ Kanilezi mina nzi na ni wukustumunyu ga hombe ku hunza legi ga Johani; hakuva a mitiro levi a nzi nyikileko Dadani a kuva nzi yi mbhetisa, ya kustumunya hi mina lezaku Dadani i nzi rumile. Xip. 3:2; 1 Joh. 5:9

³⁷ Na yena Dadani, loyi a nzi rumileko, i mahile wukustumunyu hi mina. Nwina cima a mu zwangi gezu gakwe, hambu ni ku wona xiyimo xakwe; Deut. 4:12; Mat. 3:17; 1 Joh. 4:12

³⁸ ni mhaka yakwe a yi tshami nzeni ka nwina, hakuva a mu kholwi loyi a rumilweko hi yena.

³⁹ Mu kamba mitsalo, hakuva mu alakanya lezaku ka yona mu ta kuma a wutomi ga pinzukelwa; yona hi yona yi kustumunyako hi mina. Isa. 8:20; Lu. 16:29; 24:27

⁴⁰ A mu vumeli kuta ka mina, kasi mu fela ku kuma wutomi.

⁴¹ A nzi amukeli kudzunziwa hi ka vanhu;

⁴² kanilezi nza mu tiva, lezaku mu hava liranzo la Nungungulu timbilwini ta nwina.

⁴³ Nzi tile hi vito ga Dadani, a mu nzi amukeli; kasi loku ata munwani hi vito gakwe yena nwinyi, yena mu ta mu amukela.

⁴⁴ Mu ta kholwisa kuyini nwina lava va dzunzanako, kasi a wudzunzo legi gi tako hi ka Nungungulu a nga yece, a mu gi lavi? Xip. 12:43; Rom. 2:29

⁴⁵ Mu nga alakanyi muku nzi ta mu kecara ka Dadani; i kona loyi a mu kecarako, hi yena Mosi, loyi mu tsumbako kakwe. Rom. 2:12

⁴⁶ Hakuva loku mu wa kholwa hi Mosi, ngha na mu kholwa hi mina; hakuva yena i tsalile hi mina. Gen. 3:15; 22:18; Deut. 18:15

⁴⁷ Kanilezi loku mu nga kholwi a kutsala kakwe, mu ta kholwisa kuyini a timhaka ta mina ke?