Johani 19 - Tshwa Bible

¹ Zonake Pilatu i lo laya lezaku Jesu a xupulwa. Mat. 27:26; Mar. 15:15; Lu. 18:33

² A masochwa ma lo luka a xidlodlo xa mizwa, va xi tlhateka hlokweni yakwe, va mu ambexa hi nguwo ya xiwunguwungu;

³ va tshinela ka yena, vaku ngalo: Xewe, Hosi ya vaJuda! va mu phakata.

⁴ Pilatu i lo huma kambe, aku kabye: Langutani, nzi ta mu humesa ka nwina, kasi mu fela ku zi tiva lezaku a nzi kumi nanzu ka yena.

⁵ Jesu i lo huma handle, na a ambele a xidlodlo xa mizwa ni nguwo ya xiwunguwungu. Pilatu aku ngalo kabye: Cuwukani a munhu loyi!

⁶ Kanilezi a vapristi va hombe ni malanza loku va mu wonile, va lo kanyuluka, vaku: Mu belele, mu belele! Pilatu aku ngalo kabye: Mu tekeni nwina venyi, mu mu belela; hakuva mina a nzi kumi nanzu ka yena. Miti. 3:13

⁷ A vaJuda va lo hlamula, vaku; Hina hi na ni nayo, hi nayo lowu i yimelwe hi kufa, hakuva i ti mahile a Nʼwana wa Nungungulu. Levi 24:16; Mat. 26:65; Xip. 5:18

⁸ Pilatu na a zwile leyi mhaka, i lo chava nguvu;

⁹ a enghena kambe ndlwini ya wuhosi, aku ngalo ka Jesu: Uta hi kwihi ke? Kanilezi Jesu a nga mu hlamulangi nchumu. Isa. 53:7; Mat. 27:12, 14

¹⁰ Pilatu aku ka yena: A ku nzi hlamuli nchumu ke? Xana a ku zi tivi lezaku nzi na ni ntamu ku ku tlhatlha, ni ntamu a ku ku belela ke?

¹¹ Jesu i lo mu hlamula, aku: Ngha u nga hi na ntamu hehla ka mina, loku u nga nyikiwangi wona hi le hehla; hikwalaho loyi a nzi nyikeleko ka wena i na ni nanzu wa hombe. Lu. 22:53; Xip. 7:30

¹² Makunu Pilatu i wa lava ku mu tlhatlha; kanilezi a vaJuda va lo kanyuluka, vaku: Loku u tlhatlha loyi munhu, a ku xaka ga Kesari; hakuva ni wihi a ti mahako hosi i kanyisa Kesari. Lu. 23:2; Miti. 17:7

¹³ Laha Pilatu na a ti zwile leti timhaka, i lo humesa Jesu lahandle, a tshama xitshanwini xa kulamula, a ka wutshamu gi vitwako, Maribye, kanilezi hi xiHeberu, Gabata.

¹⁴ Makunu ku wa hi siku go longisela Pasika; hi xikhati xa hora ya wuntlhanu ni xinwe. Pilatu aku ngalo ka vaJuda: Mangabye, a hosi ya nwina! Mat. 27:62

¹⁵ Va lo kanyuluka, vaku: Mu suse, mu suse, mu belele! Pilatu aku kabye: Nzi belela a hosi ya nwina ke? A vapristi va hombe va lo hlamula, vaku: A hi na hosi saseka Kesari. Gen. 49:10

¹⁶ Zonake i lo mu nyikela kabye, a kuva a belelwa.

A kubelelwa ka Jesu.

¹⁷ Vona va lo khoma Jesu va famba naye. I lo huma na a ti rwalele a xihambano xakwe, aya wutshanwini gi vitwako ku ngalo: Xikodo, hi xiHeberu ku ngalo, Golgota. Mitse. 15:36; Mat. 27:31, 33; Mar. 15:21, 22; Lu. 23:26, 33

¹⁸ Hi laho va nga mu belela kona; ku belelwa zinwe naye a vanwani va vambiri, munwe hi seyi ni munwani hi seno, Jesu hi laha xikari.

¹⁹ Pilatu i lo tsala papilo, a gi nameka laha xihambanweni; ku wa tsalilwe ku ngalo: Jesu wa le Nazareta, a Hosi ya vaJuda. Mat. 27:37; Mar. 15:26; Lu. 23:38

²⁰ A vaJuda vanyingi va lo gonza papilo legi, hakuva a wutshamu lego a nga belelwe kona Jesu, gi wa hi kusuhani ni muti; ni papilo gi wa tsalilwe hi xiHeberu, ni xiLatini, ni xiGreki.

²¹ Hikwalaho a vapristi va hombe va vaJuda vaku ngalo ka Pilatu: U nga tsali lezaku, I Hosi ya vaJuda; kanilezi uku: I wa ku ngalo: Nzi Hosi ya vaJuda.

²² Pilatu i lo hlamula, aku: Lezi nzi zi tsalileko, nzi tsalile.

²³ A masochwa laha na ma mu belele Jesu, ma lo teka a tinguwo takwe, ma avanyisa mune wa zipanze, lezaku sochwa ginwe ni ginwani gi teka xipanze xinwe. Va lo teka ni bhaji, kanilezi a bhaji gi wa nga hi na nzhungo, gi wa lukilwe kusukela le hehla kala magumo. Mat. 27:35; Mar. 15:24; Lu. 23:34

²⁴ Hikwalaho vaku ngalo: Hi nga gi hanzuli, kanilezi a hi hlahluveni, lezaku gi ta maha ga mani; kasi ku fela ku tatiseka a mutsalo, lowu wu nge ngalo: Va lo avana a tinguwo ta mina, Va hlahluveta a bhaji ga mina. A masochwa ma lo maha lezo. Tis. 22:18

²⁵ Kanilezi kusuhani ni xihambano xa Jesu ku wa yimile a nyine wakwe, ni makabye Wa nyine wakwe, a nga Maria a sati wa Klopasi, na Maria wa le Magdala. Mat. 27:55; Mar. 15:40; Lu. 24:18

²⁶ Laha Jesu na a wona a nyine wakwe, na a yimile kona zinwe ni mupizani loyi a mu ranzako, aku ka nyine wakwe: Wasati, a nʼwana wa wena hi loyi! Xip. 2:4; 13:23; 20:2; 21:7, 20, 24

²⁷ Zonake aku ngalo ka mupizani: A nyine wa wena hi loyi! Kusukela lexo xikhati a mupizani i lo mu rurela kaya kakwe.

²⁸ Anzhako ka lezo Jesu na a zi tiva lezaku zontlhe zi mbhelile; kasi mutsalo wu fela ku tatiseka aku ngalo: Nzi na ni tora. Tis. 69:21

²⁹ Laho ku wa vekilwe a xibya na xi tele hi viniga; lezo va lo tihomeka a kuvi lihlangeni la hisopi na gi tele hi viniga, va gi yisa nonwini wakwe. Mat. 27:48

³⁰ Jesu na a amukele viniga, aku ngalo: Ku mbhelile. Zonake i lo gowota hloko, afa. Xip. 17:4

³¹ A vaJuda hi ku chava lezaku a zirumbi zi ta sala zihambanweni hi siku ga sabado, hakuva a sabado lego gi wa hi ga hombe, hi siku go Longisela, va lo kombela Pilatu lezaku yi tshobyiwa milenge yabye, kasi va fela ku susiwa. Deut. 21:23; Mar. 15:42

³² Zonake a masochwa ma lota, ma ta tshova a milenge ya wo sangula ni ya munwani wa lava a nga belelwe navo;

³³ kanilezi loku vata ka Jesu a va tshovangi milenge yakwe, hakuva va lo wona lezaku i wa sina a file.

³⁴ Kanilezi a sochwa ginwe gi lo mu tlhava reve hi tlhari, zalezo ku lo huma nkhata ni mati. 1 Joh. 5:6, 8

³⁵ Loyi a zi wonileko i mahile wukustumunyu ha zona, ni wukustumunyu gakwe gi nene; wa zi tiva lezaku i wula zinene, kasi na nwinawu ma fela ku kholwa.

³⁶ Hakuva lezi zi lo maheka, kasi wu fela ku tatiseka a mutsalo, lowu wu nge ngalo: Ku nga ta tshobyiwa ni rambu gihwe ka yena. Ekso. 12:46; Mitse. 9:12; Tis. 34:20

³⁷ A munwani mutsalo wu ngalo: Va ta mu cuwuka yena loyi va mu tlhavileko. Tis. 22:16, 17; Zak. 12:10; Kuv. 1:7

A kulahliwa ka Jesu.

³⁸ Anzhako ka lezo Josefa wa le Arimatea, loyi a nga hi mupizani wa Jesu, kanilezi hi kufihlaleni hi ku chava vaJuda, i lo kombela Pilatu lezaku a vumelwa ku hawula a xirumbi xa Jesu; Pilatu i lo mu vumela. Zonake i lo famba, a ya susa a xirumbi xakwe. Mat. 27:57; Mar. 15:42; Lu. 23:50

³⁹ Ku lota kambe na Nikodemusi, loyi a nga ranga aya kakwe ni wusiku, a neha mure ni alosi na zi patsilwe, a xipimo xa 50 wa makilo. Xip. 3:1, 2; 7:50

⁴⁰ Lezo va lo teka a xirumbi xa Jesu, va xi petsela hi tinguwo to basa, zinwe ni mipepo, khwatsi hi malahlela ya xijuda. Miti. 5:6

⁴¹ Makunu a wutshanwini legi a nga belelwa kona gi wa hi kona a simu, ni le sinwini wu wa hi kona a nkele muswa, lowo cima ku wa nga se ku vekiwa munhu kona.

⁴² Hi laho va nga mu lahla kona Jesu hi kota ya Kulongisela ka vaJuda, hakuva a xilahla xi wa hi kusuhani. Isa. 53:9; Vesi 31