Johani 16 - Tshwa Bible

¹ Nzi mu byelile timhaka leti, kasi mu fela ku kala mu nga khunguvanyeki. Mat. 11:6

² Va ta mu hlongola masinagogeni; kunene, xa hata xikhati laha munwe ni munwani loyi a mu dayako, a ta nga alakanya lezaku i tirela Nungungulu. Xip. 9:22; Miti. 26:9, 10

³ Va ta maha lezi, hakuva a va tivangi Dadani na mina. 1 Kor. 2:8; 1 Tim. 1:13

⁴ Kanilezi nzi mu byelile timhaka leti, kasi loku xi chikele a xikhati xa tona, mu ta alakanya lezaku nzi wa mu byelile. A nzi mu byelangi tona hi kusanguleni, hilezi nzi wa hi na nwina.

⁵ Makunu nziya ka loyi a nzi rumileko; a nga kona ka nwina a nzi wutisako ku ngalo: Uya kwihi? Xip. 14:28

⁶ Kanilezi a timbilu ta nwina ti tele hi wusiwana hi kota ya lezi nzi mu byelileko zona.

⁷ Ahemba-lokoke, nza mu byela zinene, nziku: Zi mu sasekele lezaku nzi suka; hakuva loku nzi nga suki, a Muyimeli a nga tata ka nwina; kanilezi loku nzi suka, nzi ta mu rumela ka nwina. Xip. 14:26; Miti. 2:33

⁸ Loku a chikele yena, i ta maha tiko gi pima xungetano ni kuonha, ni kululama, ni kulamula.

⁹ Hi kuonha hakuva a va kholwangi ka mina; Miti. 2:22

¹⁰ hi kululama, hakuva nzi famba nziya ka Dadani, mu nga ta ha nzi wona; Xip. 3:14; Miti. 2:32

¹¹ hi kulamula, hakuva a hosana ya legi tiko yi lamulwe. Xip. 12:31; Miti. 26:18

A Moya wa zinene.

¹² Nza ha hi ni timhaka tinyingi a ku kanela ka nwina, kanilezi ti nga mu tsanza makunu. Mar. 4:33

¹³ Kanilezi loku a chikele, loye a nga Moya wa zinene, i ta mu rangela zineneni zontlhe; hakuva a nga ta wulawula a za wutsumbu gakwe; kanilezi ni zihi lezi a ta nga zizwa i ta wulawula ha zona; ni zilo lezi zi ta ngata i ta mu tivisa zona. Xip. 14:17; 1 Joh. 2:27

¹⁴ I ta nzi dumisa, hakuva i ta teka lezi zi nga za mina, a mu bikela zona.

¹⁵ Zontlhe lezi a nga nazo Dadani, za mina; hikwalaho nzi ngaku ngalo, wa teka lezi zi nga za mina, a mu bikela zona. Mat. 11:27; Xip. 17:10

¹⁶ Ka ha hi xikhatanyana mu nga ha nzi woni; hi xikhatanyana kambe mu ta tlhela mu nzi wona. Xip. 13:3; 14:19

¹⁷ Hikwalaho a vapizani vanwani va lo wutisana, vaku: Xini lexi a xi wulako ka hina, aku; Ka ha hi xikhatanyana, mu nga ha nzi woni; hi xikhatanyana kambe mu ta tlhela mu nzi wona; niku: Nziya ka Dadani?

¹⁸ Vaku ngalo: Xini lexi a wulawulako, aku: Hi xikhatanyana? A hi zi tivi lezi a zi wulako,

¹⁹ Jesu na a zi tiva lezaku va wa lava ku mu wutisa, aku kabye: Xana mu wutisana hi lezi nzi nga wulawula nziku: Ka ha hi xikhatanyana, mu nga ha nzi woni; hi xikhatanyana kambe mu ta tlhela mu nzi wona?

²⁰ Hizinene nziku ka nwina: Mu ta rila, mu maha hlomulo, kanilezi a tiko gi ta tsaka; mu tava ni kuxaniseka, kanilezi a kuxaniseka ka nwina ku ta hunzuluswa ku maha kutsaka.

²¹ A wasati loku a ha lunwa wa xaniseka, hakuva xi chikele a xikhati xakwe; kanilezi loku a belekile a xinwanana, a nga ha ku alakanyi a kubayisa, hakuva wa tsaka hilezi ku belekilwe munhu misaveni. Isa. 26:17

²² Na nwina mu na ni kuxaniseka makunu, kanilezi nzi ta mu wona kambe, zonake a timbilu ta nwina ti ta tsaka, a nga kona loyi a ta nga mu tekela a kutsaka ka nwina. Miti. 2:46; 1 Ped. 1:8

²³ Hi lego siku mu nga ta nzi wutisa nchumu. Hizinene nziku ka nwina: Zontlhe lezi mu ta nga kombela ka Dadani hi vito ga mina i ta mu nyika zona. Mat. 7:7; Xip. 14:13

²⁴ Cima ka lezi a mu se nga kombela nchumu vitweni ga mina; kombelani, mu ta nyikiwa, kasi a kutsaka ka nwina ku fela ku mbhelela.

²⁵ Nzi mu byelile lezi hi mifananiso; xa hata xikhati laha nzi ta nga kala nzi nga wulawuli ka nwina hi mifananiso, kanilezi nzi ta mu tivisa hi Dadani ziku dlunya.

²⁶ Hi lego siku mu ta kombela hi vito ga mina; a nzi wuli ka nwina nziku, nzi ta mu khongelela ka Dadani,

²⁷ hakuva yena Dadani wutsumbu wa mu ranza, hilezi mu nzi ranzile, mu kholwa lezaku nzi tile hi ka Dadani. Xip. 3:13; 14:21; 17:8

²⁸ Nzi humele hi ka Dadani, nzita misaveni, makunu nzi tlhela nzi siya misava, nziya ka Dadani. Xip. 13:3

²⁹ A vapizani vakwe vaku ngalo: Wangabye, makunu wa wulawula ziku dlunya, a wa ha wulawuli hi mifananiso.

³⁰ Makunu ha zi tiva lezaku u tiva zontlhe, a zi laveki ka wena a kuva u wutisiwa hi munhu; hi kota ya lezo ha kholwa lezaku u humele hi ka Nungungulu. Xip. 17:8; 21:17

³¹ Jesu i lo va hlamula, aku: Ma kholwa makunu ke?

³² Mangabye, xa hata xikhati, xi chikele ni lezi, xa kuva mu hangalaka, munwe ni munwani a famba kaya kakwe, mu nzi siya nzoce; kanilezi a nzi nzoce, hakuva Dadani i na mina. Mat. 26:31; Xip. 8:29; 20:10

³³ Nzi mu tivisile a timhaka leti, lezaku mu fela kuva ni kurula a ka mina. Mu na ni kukarateka tikweni, kanilezi tiyani hlana, mina nzi hlulile tiko. Xip. 14:1, 27; 15:19; Rom. 5:1; 2 Tim. 3:12; 1 Joh. 4:4