Johani 15 - Tshwa Bible

A sinya yi nene ya vina.

¹ Mina nzi tshinya gi nene ga vina; Dadani hi murimi.

² Ni gihi ravi gi nga ka mina, legi gi nga pswaliko mihanzu, wa gi tsema; kanilezi legi gi pswalako mihanzu wa gi thena, kasi gi fela ku pswala hi kuhunzeleleko. Mat. 15:13

³ Nwina mu sina mu hlazekile hi kota ya mhaka leyi nzi nga kanela ka nwina. Xip. 13:10; Efe. 5:26; 1 Ped. 1:22

⁴ Tshamani ka mina, na mina ka nwina. Kota lezi a ravi gi nga zi kotiko ku pswala mihanzu ha goce, sine loku gi tshamile tshinyeni ga vina, hizalezo na nwina loku mu nga tshami ka mina. Kol. 1:23; 1 Joh. 2:6

⁵ Mina nzi tshinya ga vina, nwina mu maravi. Loyi a tshamako ka mina, na mina ka yena, yaloye wa pswala mihanzu yo tala; hakuva ahandle ka mina a mu zi koti ku tira nchumu. Hos. 14:8; Fil. 1:11

⁶ Loku munhu a nga tshami ka mina, wa cukunyetiwa handle khwatsi hi ravi, a wuna; va wungeletela a maravi ya kunghaho, va ma hoxa nzilweni, mahiswa. Mat. 3:10; 7:19

⁷ Loku mu tshama ka mina, ni timhaka ta mina ti tshama ka nwina, kombelani ni xihi lexi mu xi ranzako, mu ta mahelwa xona.

⁸ Dadani wa mina wa dumiswa hi lezi, lezaku mu pswala mihanzu yo tala, mu maha vapizani va mina. Xip. 13:35; Fil. 1:11

⁹ Khwatsi hilezi Dadani a nzi ranzileko, hizalezo na mina nzi mu ranzile; tshamani liranzweni la mina.

¹⁰ Loku mu hlayisa a milayo ya mina, mu ta tshama liranzweni la mina; kota lezi mina nzi hlayisileko a milayo ya Dadani, nzi tshama liranzweni lakwe. Xip. 14:23

¹¹ Nzi mu byelile lezi, kasi a kutsaka ka mina ku fela ku tshama ka nwina, ni lezaku a kutsaka ka nwina ku mbhelela. 1 Joh. 1:4

¹² A nayo wa mina hi lowu, lezaku mu ranzana, khwatsi hilezi mina nzi mu ranzileko. Xip. 13:34; 1 Tes. 4:9; 1 Joh. 3:11

¹³ A ku na munhu a nga ni liranzo la hombe lo hunza leli, lezaku munhu a nyikela kuhanya kakwe hi kota ya maxaka yakwe. Rom. 5:7, 8; 1 Joh. 3:16

¹⁴ Nwina mu maxaka ya mina, loku mu maha lezi nzi mu leletelako. Mat. 12:50

¹⁵ A nza ha mu vitani lezaku mu malanza; hakuva a nanza a gi zi tivi lezi zi mahiwako hi hosi ya gona; kanilezi nzi mu vitanile nziku mu maxaka, hakuva nzi mu tivisile zontlhe lezi nzi nga zizwa ka Dadani. Miti. 20:27

¹⁶ A hi nwina mu nga nzi hlawula, kanilezi hi mina nzi mu hlawulileko, nzi mu yimisa lezaku mu ya pswala mihanzu, ni mihanzu ya nwina yi simamisa; kasi ni xihi lexi mu ta nga mu kombela Dadani hi vito ga mina, a fela ku mu nyika xona. Mat. 28:19; Xip. 14:13; 1 Joh. 4:10

¹⁷ Lezi nzi mu leletelako zona, hi lezaku mu ranzana.

Ta livengo lo tiko.

¹⁸ Loku tiko gi mu venga, zi tiveni lezaku gi rangile hi mina gi nzi venga. 1 Joh. 3:1, 13

¹⁹ Loku mu wa hi va tiko, a tiko ngha gi ranzile a za gona; kanilezi lezi mu nga hiko va tiko, kanilezi mu hlawulilwe hi mina, nzi mu susa tikweni, hikwalaho a tiko ga mu venga. Xip. 17:14; 1 Joh. 4:5

²⁰ Alakanyani a mhaka leyi nzi nga mu byela, nziku: A nanza a hi ga hombe ku hunza a hosi ya gona. Loku va xanisile mina, va ta xanisa na nwina kambe; loku va hlayisile a mhaka ya mina, va ta hlayisa ni va nwina kambe. Ezek. 3:7; Mat. 10:24; Xip. 13:16

²¹ Kanilezi va ta maha zontlhe lezi ka nwina hi kota ya vito ga mina, hakuva a va mu tivi loyi a nzi rumileko. Mat. 24:9

²² Loku nzi wa nga tangi, nzi ta kanela ka vona, ngha va nga hi na nanzu; kanilezi makunu a va hi na ku ti pendla kuonheni kabye. Xip. 9:41; Rom. 1:20

²³ Loyi a nzi vengako wa venga ni Dadani.

²⁴ Loku nzi wa nga tirangi xikari ka vona a mitiro leyi yi nga tiriwangiko hi munwani, ngha va nga hi na nanzu; makunu va yi wonile, va venga mina ni Dadani.

²⁵ Kanilezi yi fela ku tatisekisa lezo a mhaka leyi yi tsalilweko nayweni wabye, yaku: Va nzi vengile mahala. Tis. 35:19

²⁶ Kanilezi loku Muyimeli ata, loyi nzi ta nga mu rumela hi ka Dadani, a nga Moya wa zinene, lowu wu humako hi ka Dadani, i ta maha wukustumunyu ha mina. Lu. 24:49; Xip. 14:17, 26; 1 Joh. 5:6

²⁷ Na nwina mu ta kustumunya, hakuva mu wa hi na mina hi kusanguleni. Miti. 1:8, 21; 10:39; 1 Joh. 1:1