Johani 12 - Tshwa Bible

Jesu a totiwa hi mafura yo nuhela.

¹ A ntlhanu wa masiku ni ginwe na ku nga se kuva Pasika, Jesu i lo chikela Betania, laha a nga tshama Lazaru, loyi Jesu a nga mu vuxa hi ka vafileko. Xip. 11:1, 43

² Va lo mu mahela xilalelo kona, na Marta a yimelela; na Lazaru i wa hi munwe wa lava va nga tshamile naye kugeni. Mat. 26:6; Mar. 14:3

³ Zonake Maria i lo teka a mafura yo nuhela ya spikenarda, a xipimo xa khihlanya ga kilo, ma nga hi ni tsengo wa hombe, a tota mikonzo ya Jesu, a yi kulula hi misisi yakwe; ni yindlu yi lo tala hi kunuhela ka mafura. Lu. 10:38, 39

⁴ Kanilezi Judasi Iskarioti, a nga hi munwe wa vapizani vakwe, loyi a ta ngava a mu tokometa, aku:

⁵ Hikuyini a mafura laya ma nga kala ku xava a 300 wa macheleni, ku hiwa zisiwana ke?

⁶ I lo wula lezo, na ku nga hilezi a nga chela kota hi zisiwana, kanilezi hilezi a nga hi khamba, a yiva lezi zi vekiwako xikhwameni, lexi a nga hi mukhomi wa xona. Xip. 13:29

⁷ Jesu aku ngalo: Mu tsikeni, ngha a ma hlayisela a siku ga kulahliwa ka mina.

⁸ Hakuva a zisiwana zi na nwina xikhati xontlhe, kanilezi a mu na mina xikhati xontlhe. Mat. 26:11; Mar. 14:7

⁹ A vanhu vanyingi va vaJuda va lozwa lezaku Jesu i kona laho, va lota, na va nga teli ku ta wona Jesu yece, kanilezi kasi va fela ku wona na Lazaru, loyi a nga mu vuxile kufeni. Xip. 11:43, 44

¹⁰ Kanilezi a vapristi va hombe va lo tsema khungo lezaku va daya na yena Lazaru; Lu. 16:31

¹¹ hakuva a vaJuda vanyingi va va tsikile hi kota ya yena, va ya kholwa ka Jesu.

Jesu a enghena Jerusalema.

¹² Hi manziko wa kona a xidlemo xa hombe xi nga tile mubuzweni, na xi zwile lezaku Jesu wata Jerusalema, Mat. 21:8; Mar. 11:8; Lu. 19:35

¹³ va lo teka mahanga ya micinzu, va huma ku ya mu tlhangaveta, va kanyuluka, vaku: Hozana; a ku khesiwe yena loyi a tako vitweni ga Hosi, loyi a nga Hosi ya vaIsraeli. Tis. 118:25, 26

¹⁴ Jesu i wa kumile a ximbongolana, a xi khilela; kota lezi ku tsalilweko, ku ngalo: Mat. 21:7

¹⁵ U nga chavi, nhanyana wa Zioni; languta, a Hosi ya wena yata, na yi khilele a role ga mbongola. Zak. 9:9

¹⁶ A mhaka leyi a vapizani vakwe a va yi pimangi hi kusanguleni; kanilezi laha Jesu a nga kulisilwe, va lo alakanya lezaku ku wa tsalilwe lezo ha yena, ni lezaku va mu mahele zona. Lu. 18:34; Xip. 7:39; 14:26

¹⁷ Makunu a xidlemo lexi xi nga hi zinwe naye laha a nga vitana Lazaru a huma xilahleni, a mu vuxa kufeni, va lo hlawutela lezi va zi wonileko.

¹⁸ Hi kota ya lezo ku lo huma vanwani vanhu kambe, hilezi va nga zwile hi xiwoniso lexi a xi mahileko.

¹⁹ Lezo a vaFarisi va lo wulawula xikari kabye, vaku: Langutani, a mu vuni nchumu; mangabye, a tiko gontlhe ga mu lanzisela. Xip. 11:47

A vaGreki vo kari va wona Jesu.

²⁰ Ku wa hi kona a vaGreki vo kari xikari ka lava va tileko a ku ta khozela mubuzweni. 1 Tih. 8:41; Miti. 8:27; 17:4

²¹ Vona va lota ka Filipu wa le Betsaida ga Galilea, va mu kombela, vaku: Hosi, hi wa lava ku wona Jesu. Xip. 1:44

²² Filipu i lo ya byela Andreu; Andreu na Filipu va ya byela Jesu.

²³ Jesu i lo va hlamula, aku: Makunu xi chikele a xikhati xa kuva Nʼwana wa munhu a dumiswa. Xip. 13:32

²⁴ Hizinene nziku ka nwina: Loku a mbewu ya mavele yi ngawi misaveni yifa, yi ta tshama yoce; kanilezi loku yifa, ya pswala nguvu. 1 Kor. 15:36

²⁵ Loyi a ranzako kuhanya kakwe i ta lahlekelwa ha kona; kanilezi loyi a vengako kuhanya kakwe lomu tikweni, i ta ku hlayisela wutomini ga pinzukelwa. Mat. 10:39; Mar. 8:35; Lu. 9:24

²⁶ Loku munhu a nzi tirela, a nzi lanzele; ni laha nzi nga kona, i ta va kona loyi a nzi tirelako. Loku munhu a nzi tirela, yaloye i ta dzunziwa hi Dadani. Xip. 14:3; 1 Tes. 4:17

²⁷ Makunu a muhefemulo wa mina wa karateka; nzi ta kuyini ke? Dadani, nzi ponise ka lexi xikhati? Kanilezi hi xigelo lexi nzi tileko ka xona a xikhati lexi. Mat. 26:38; Lu. 12:50; 22:53

²⁸ Dadani, dumisa a vito ga wena! Kwalaho ku lota gezu hi le tilweni, giku: Nzi gi dumisile, nzi ta engeta nzi gi dumisa. Mat. 3:17

²⁹ A xidlemo lexi xi nga yimile laho, xi lo gizwa, xiku: Ku dzinzile. A vanwani vaku; I ngelosi yi wulawulileko ka yena.

³⁰ Jesu i lo hlamula, aku: Legi gezu a gi tangi hi kota ya mina, kanilezi hi kota ya nwina. Xip. 11:42

³¹ Makunu a tiko ga lamuliwa; a hosana ya legi tiko yi ta hlongolwa makunu. Lu. 10:18; Miti. 26:18; 2 Kor. 4:4

³² Mina loku nzi tlakusilwe misaveni, nzi ta kokela vanhu vontlhe ka mina. Xip. 3:14; Rom. 5:18; Maheb. 2:9

³³ Kanilezi i lo wula lezo, a kombisa a fela legi a ta nga fisa gona.

³⁴ A xidlemo xi lo mu hlamula, xiku: Hi zwile nayweni lezaku Kristu i ta tshama kala kupinzuka; hi yini u wulako uku: A Nʼwana wa munhu i yimelwe hi ku tlakuswa ke? Hi mani yena Nʼwana loye wa munhu ke? Isa. 53:8; Ezek. 37:25; Dan. 2:44

³⁵ Jesu aku ngalo kabye: A kuwonekela ka ha hi na nwina a xikhatanyana. Fambani na ma ha hi ni kuwonekela, kasi a munyama wu nga mu kamanyeti. Loyi a fambako munyameni a nga ku tivi laha a yako kona. Jer. 13:16; Xip. 1:9; 11:10

³⁶ Kholwani hi kuwonekela na ma ha hi nako, kasi ma fela ku maha vanana va kuwonekela. Jesu i lo kanela timhaka leti, a suka ka vona, a ya ti fihla. Lu. 16:8; Efe. 5:8; Xip. 11:54

A vaJuda a va kholwi ka yena.

³⁷ Hambu lezi a nga mahile a ziwoniso zinyingi mahlweni ka vona, a va kholwangi ka yena;

³⁸ kasi yi fela ku tatiseka a mhaka ya muprofeti Isaya, leyi yi nge ngalo: Hosi, himani a kholilweko lezi hi nga byeliwa zona ke? A woko ga Hosi gi wonekelisilwe ka mani ke? Isa. 53:1; Rom. 10:16

³⁹ Hi kota ya lexi va wa nga zi koti ku kholwa, hakuva Isaya i te ngalo kambe:

⁴⁰ I phumisile mahlo yabye, a nonohisa timbilu tabye; Ku nga taku va wona hi mahlo yabye, va pima hi timbilu tabye; Va hunzuluka, nzi va hanyisa. Isa. 6:9, 10; Mat. 13:14

⁴¹ Isaya i lo wula lezo, hakuva i wonile a kungangamela kakwe, a kanela ha yena, Isa. 6:1

⁴² Ahemba-lokoke, hambu ni vanyingi va vahombe va lo kholwa ka yena; kanilezi a va zi wulangi hi kota ya vaFarisi, hi lezaku va nga humeswa sinagogeni;

⁴³ hakuva va wa ranza ku dzunziwa hi vanhu a ku hunza ku dzunziwa hi Nungungulu: Xip. 5:44

⁴⁴ Zonake Jesu i lo kanyuluka, aku: Loyi a kholwako ka mina, a nga kholwi ka mina, kanilezi i kholwa ka loyi a nzi rumileko. Mar. 9:37; 1 Ped. 1:21

⁴⁵ Loyi a nzi wonako, wa mu wona loyi a nzi rumileko.

⁴⁶ Nzi tile nzi hi kuwonekela tikweni, lezaku ni wihi a kholwako ka mina a nga tshami munyameni. Xip. 3:19

⁴⁷ Loku munhu azwa a timhaka ta mina, a nga ti hlayisi, mina a nzi mu lamuli; hakuva a nzi telangi ku ta lamula tiko, kanilezi ku ta hanyisa tiko. Xip. 3:17; 5:45; 8:15, 26

⁴⁸ Loyi a nzi alako, a nga amukeliko a timhaka ta mina, i na ni mulamuli loyi a mu lamulako; a mhaka leyi nzi nga yi wulawula, hi yona leyi yi ta nga mu lamula hi siku go gumesa. Deut. 18:19; Mar. 16:16; Lu. 10:16

⁴⁹ Hakuva a nzi kanelangi hi wutsumbu ganga; kanilezi Dadani loyi a nzi rumileko, i nzi layile hi lezi nzi ta nga wulawula, ni lezi nzi ta nga kanela. Deut. 18:18; Xip. 8:38; 14:10

⁵⁰ Nza zi tiva lezaku a kulaya kakwe hi wutomi ga pinzukelwa; hikwalaho lezi nzi zi kanelako, nzi kanela zona kota lezi Dadani a nzi byelileko.