Johani 1 - Tshwa Bible

A Gezu.

¹ A kusanguleni gi wa hi kona Gezu, Gezu gi wa hi na Nungungulu, Gezu gi wa hi Nungungulu. Mat. 8:22; Kol. 1:17; 1 Joh. 1:2; 3:7

² Yena i wa hi ka Nungungulu le kusanguleni. Gen. 1:1

³ Zilo zontlhe zi lo mahiwa hi yena; hi lahandle kakwe a ku mahiwangi nchumu xikari ka lezi zi mahilweko.

⁴ A kuhanya ku wa hi ka yena; ni kuhanya ku wa hi kuwonekela ka vanhu. Xip. 8:12; 1 Joh. 5:11

⁵ A kuwonekela ku lo woninga munyameni, kanilezi a munyama a wu ku amukelangi.

⁶ Ku lota munhu a rumilweko hi Nungungulu, loyi a vito gakwe a nga hi Johani. Mat. 3:1

⁷ Yena i lo tela ku ta maha wukustumunyu, kasi a fela ku kustumunya hi kuwonekela, lezaku vontlhe va fela ku kholwa hi kota ya yena. Miti. 19:4

⁸ I wa nga hi kuwonekela, kanilezi i lo tela ku ta maha wukustumunyu hi kuwonekela.

⁹ A kuwonekela ka zinene, loku ku woningako vanhu vontlhe, ku wa kari kuta misaveni. Isa. 49:6

¹⁰ Gezu gi wa hi kona misaveni, ni misava yi wa mahilwe hi yena, kanilezi misava a yi mu tivangi. Maheb. 11:3

¹¹ I lota kaya kakwe, kanilezi lava va nga hi vakwe a va mu amukelangi.

¹² Kanilezi vontlhe lava va nga mu amukela, i va nyikile ntamu wa ku maha vana va Nungungulu, vona lava va kholwako hi vito gakwe;

¹³ lava va nga pswaliwangiko hi nkhata, hambu hi kuranza ka nyama, hambu hi kuranza ka munhu, kanilezi va pswalilwe hi Nungungulu. 1 Ped. 1:23

¹⁴ Zonake Gezu gi lova ni miri, gi tshama xikari ka hina; hina hi lo wona kungangamela kakwe, ku nga kungangamela loku Dadani a nyikako a Nʼwana wakwe a belekilweko yece, na a tele hi wuxinji ni zinene. Isa. 40:3; Mat. 1:16; Rom. 1:3

A wukustumunyu ga Johani Mubapatizi.

¹⁵ Johani i lo kustumunya ha yena, a vitana aku: Hi yena loyi nzi nga wulawula ha yena, nziku: Loyi a tako anzhako ka mina hi yena wo ranga, hakuva i wa hi kona na nzi nga se va kona. Xip. 5:33; Lu. 3:16; Kol. 1:17

¹⁶ Hakuva hina hontlhe hi amukele hi kakwe kutala, a wuxinji hehla ka wuxinji. Efe. 1:6; Kol. 1:19

¹⁷ Hakuva a nayo wu lo nyikiwa hi Mosi; kanilezi a wuxinji ni zinene zi humele hi Jesu Kristu. Ekso. 20:1; Xip. 14:6; Rom. 5:21

¹⁸ Nungungulu cima a nga woniwangi hi munhu; a Nʼwana loyi a belekilweko yece, loyi a nga xifuveni xa Dadani, hi yena a hi tivisileko lezi Nungungulu a nga zona. Ekso. 33:20; 1 Joh. 4:9

¹⁹ Legi hi wukustumunyu ga Johani, laha a vaJuda va nga rumele a vapristi ni vaLevi hi le Jerusalema, a ku ya mu wutisa, vaku: Hi wena mani ke?

²⁰ I lo hlamula, a nga kanetangi, i lo vumela aku: A hi mina Kristu. Lu. 3:15

²¹ Zonake va mu wutisa, vaku: Kasi hi wena mani ke? Hi wena Elija ke? Yena aku: A hi mina yena. Kutani u muprofeti ke? I lo hlamula, aku: Kokwihi! Deut. 18:13; Mal. 4:5

²² Zonake vaku ngalo kakwe: Hi wena mani ke? Hi fela ku ya va hlamula lava va hi rumileko. U ti wula uku u mani ke?

²³ Yena aku: Mina nzi gezu ga loyi a bako hungu xiwuleni, aku: Lulametani a ndlela ya Hosi, kota lezi a nga wula muprofeti Isaya. Isa. 40:3; Mat. 3:3; Lu. 3:4

²⁴ A vanhu lavo va wa rumilwe hi vaFarisi.

²⁵ Va lo mu wutisa, vaku: Hi yini u bapatizako loku u nga hi Kristu, hambu Elija, hambu ni Muprofeti ke?

²⁶ Johani i lo va hlamula, aku: Mina nzi bapatiza hi mati; kanilezi i kona munwe xikari ka nwina loyi mu nga mu tiviko, Mal. 8:1; Mat. 3:11

²⁷ hi yena loyi a tako nzhako ka mina, loyi mina nzi nga faneliko ku tlhatlha a tingoti ta zilato zakwe. Miti. 19:4

²⁸ Lezi zi lo maheka le Betania, tlhatukweni wa Jordani, laha Johani a nga bapatiza kona. Vala. 7:24

²⁹ Hi manziko wa kona Johani i lo wona Jesu na a kari ata kakwe, aku: Wonani Yivana ya Nungungulu, leyi yi susako zionho za tiko! Ekso. 12:3; Isa. 53:7; Miti. 8:32; 1 Ped. 2:24; 1 Joh. 2:2

³⁰ Hi yena loyi nzi nga wulawula ha yena nziku: Wata munhu anzhako ka mina loyi a nzi rangeleko; hakuva i wa hi kona na nzi nga se va kona mina.

³¹ Mina nzi wa nga mu tivi; kanilezi nzi tile na nzi bapatiza hi mati, lezaku kasi i ta tivekiswa ka Israeli. Mal. 3:1

³² Johani i lo kustumunya aku: Nzi wonile a Moya wu relela hi le tilweni kota tuva, wu tshama hehla kakwe. Mat. 3:18

³³ Mina nzi wa nga mu tivi; kanilezi loyi a nzi rumileko a ku bapatiza hi mati, i te ngalo ka mina: Loyi u ta nga wona a Moya wu relela wu tshama hehla kakwe, hi yena a bapatizako hi Moya wa ku Basa. Mat. 3:11; Miti. 2:4

³⁴ Nzi zi wonile, nza maha wukustumunyu lezaku loyi i Nʼwana wa Nungungulu.

Vapizani vambiri va lanza Jesu.

³⁵ Hi manziko wa kona kambe, Johani i wa yimile kona zinwe ni vambiri va vapizani vakwe.

³⁶ Laha a nga wona Jesu na a kari a famba, aku: Wonani Yivana ya Nungungulu!

³⁷ A vapizani lava vambiri va lo muzwa na a wula lezo, va lanzela Jesu.

³⁸ Jesu i lo hunzuluka, a va wona na va kari va mu lanzela, aku kabye: Mu lava yini? Vaku ngalo kakwe: Rabi (hi kutlhamusela ku ngalo, Mugonzisi), u tshama kwihi?

³⁹ Aku ngalo kabye: Ngonani, mu ta wona. Va loya va ya wona lomu a tshamako kona; zonake va tshama naye lego siku; yi wa hi hora ya wukhume.

⁴⁰ Andreu, a nakulobye wa Simoni Pedro, i wa hi munwe wa lava vambiri va ngazwa a gezu ga Johani, va lanzela Jesu. Mat. 4:18

⁴¹ A kusangula i lo kuma nakulobye Simoni, aku kakwe: Hi mu kumile Messia, (hi kutlhamusela ku ngalo, Kristu).

⁴² I lo mu neha ka Jesu. Jesu i lo mu cuwuka aku ngalo: Hi wena Simoni, nʼwana Johani; u ta vitanwa ku ngalo, Kefasi, (hi kutlhamusela ku ngalo, Pedro). Mat. 18:18

Kuvitanwa ka Filipu na Nataneli.

⁴³ Hi manzike wa kona na a xuva ku famba Galilea, i lo kuma Filipu; aku ngalo kakwe: Nzi lanzele.

⁴⁴ Filipu i wa hi wa le Betsaida, a mutini wa va Andreu na Pedro. Xip. 12:21

⁴⁵ Filipu i lo kuma Nataneli, aku kakwe: Hi mu kumile loyi Mosi a nga tsala ha yena nayweni, kambe ni vaprofeti, hi Jesu wa le Nazareta, a nʼwana Josefa. Gen. 3:15; Deut. 18:18; Isa. 4:2; Mika 5:2

⁴⁶ Nataneli aku ngalo kakwe: Ku nga huma a xilo xo saseka hi le Nazareta ke? Filipu aku kakwe: Ngone, u ta wona. Xip. 7:41

⁴⁷ Jesu i lo wona Nataneli na a kari ata kakwe, aku ngalo: Langutani a muIsraeli wa zinene, loyi a nga hiko na kuxengetela. Tis. 32:2; Xip. 8:39; Rom. 2:28

⁴⁸ Nataneli aku kakwe: U nzi tivisa kuyini? Jesu i lo hlamula, aku: Hi mahlweni na Filipu a nga se ku ku vitana, nzi ku wonile na u hi lahasi ka nkuwu.

⁴⁹ Nataneli i lo hlamula, aku ngalo: Rabi, wena u Nʼwana wa Nungungulu, U Hosi ya vaIsraeli. Mat. 14:33; 27:42

⁵⁰ Jesu i lo hlamula, aku ngalo kakwe: Wa kholwa hilezi nzi ngaku ngalo ka wena: Nzi ku wonile lahasi ka nkuwu ke? U ta wona a zilo za hombe zo hunza lezi.

⁵¹ A engeta aku: Hizinene, hizinene, nziku ka nwina: Mu ta wona tilo na gi vululekile, a tingelosi ta Nungungulu na ti kari ti kanziha ti relela hehla ka Nʼwana wa munhu. Gen. 28:12