Joba 8 - Tshwa Bible

A kuwulawula ka Bildade.

¹ Zonake i lo hlamula Bildade, a muXuhi, aku:

² Ku ta kala kuva rini na wa ha wulawula timhaka leti? Kala rini a timhaka ta wena na ta ha fanana ni mheho ya ntamu?

³ Nungungulu wa zi kota ku hunzula nongameto ke? Nyamintamu wa zi kota ku hunzula kululama ke? Deut. 32:4

⁴ Loku a vana va wena va mu onhele, I va hoxile hi kota ya kugoha kabye.

⁵ Loku wena u hlota Nungungulu. U maha mikhongelo ya wena ka Nyamintamu;

⁶ Loku wena u basile, u lulamile, Hizinene, yena i ta ku hlayisa, I ta katekisa a yindlu ya wena yi lulamileko.

⁷ Hambu lezi a masangulo ya wena ma nga hi matsongwani, A magumo ya wena ma ta kuliswa ma enzelekelana.

⁸ Wutisa zizukulwana za kale, U alakanya lezi a vadadani va zi kumileko;

⁹ Hakuva hina hi va tolo, a hi tivi nchumu, Hakuva a masiku ya hina laha misaveni me khwatsi i nzhuti.

¹⁰ Kanilezi vona va ta ku gonzisa, va ku byela, Va humesa timhaka leti hi timbilwini tabye:

¹¹ Li nga zi kota ku kula a livuti la ha ku nga hiko na marope ke? Ni tihlanga ta zi kota ku kula laha ku nga hiko kona mati ke?

¹² Ahihi, na la ha hi khava, na li nga tsemiwangi, Li wuna na ginwani khubyanyi ga ha tsakama.

¹³ Zinghaho ni tindlela ta vontlhe lava va rivalako Nungungulu; Ni kutsumba ka mukhohlisi ku ta gumelwa.

¹⁴ A kutsumba kakwe ku ta mbhela, A kutsumba kakwe ku nga wupe ga xitoli.

¹⁵ Yena i ta khegela laha ka yindlu yakwe, kanilezi yi nga ta yima; I ta namarela ka yona, kanilezi yi nga ta tiya.

¹⁶ Yena i sinya yi nyukileko mahlweni ka gambo, Ni maravi ya yena ma nava sinwini ga yena.

¹⁷ A mitsu ya yena yi tsonzelene nhulwini ya maribye, Yi enghena xikari ka maribye.

¹⁸ Loku Nungungulu a mu lovisa wutshanwini gakwe, Zi ta kaneta giku: Cima a nzi ku wonangi.

¹⁹ Languta, loko hi kutsaka ku nga ndleleni yakwe; A tinwani ti ta mila hi lomu misaveni.

²⁰ Languta, Nungungulu cima a nga ta hoxa a munhu a lulamileko, Ge hambu a ku vunetela a vamahi va kubiha.

²¹ Kala a tata nomu wa wena hi mahleko, Ni milomu ya wena hi kutsaka.

²² Lava va ku vengako va ta ambexwa hi tingana; Ni wuakelo ga vakubiha gi nga ha ta kuva kona.