Joba 6 - Tshwa Bible

Joba a hlamula Elifaze.

¹ Zonake Joba a hlamula, aku:

² O, loku ku wo khwatsi a tikhuruxu ta mina ta ringaniswa; Ti vekiwa xikalwini zinwe ni zikarato za mina!

³ Hakuva zi wa ta binza ku hunza seke ga bimbi: Hikwalaho a timhaka ta mina ti wa hi ta vilavila.

⁴ Hakuva a tigalala ta Nyamintamu ti nzi tlhavile, A moya wa mina wu nwile wuxungu ga tona: A kutshisa ka Nungungulu ku hloma ku nzi vukela.

⁵ A mbongola ya khwati ya cwanga loku yi hi byanyini ke? Kutani a nkavi ya bhoma loku yi hi ni foliji ke?

⁶ Leʼzo pswhama zi nga giwa loku ku nga hi na munyu ke? Kutani ku kona kunuhela lomu ko basa ka tanza ke?

⁷ Lezi a muhefemulo wa mina wu nga ala ku zi khumba, Hi kona kuga loko ku nzi swihatako.

⁸ O, loku ku wo khwatsi a xikombelo xa mina xa maheka; Ni loku ku wo khwatsi Nungungulu wa nzi nyika lezi nzi zi xuvako!

⁹ Loku ku wo khwatsi za mu xalalisa Nungungulu a ku nzi lovisa; A nawuluta canja gakwe a nzi mbhetisa!

¹⁰ Zonake nzi wa ta tangala, Ina, nzi wa ta tsaka zikaratweni za mina, Hakuva a nzi kanetangi a timhaka ta a Basileko.

¹¹ Xini a ntamu wa mina, lezaku nziva ni kutsumba? Hi wahi magumo ya mina, lezaku nziva ni lihlazambilu?

¹² A ntamu wa mina wu fanana ni wa ribye ke? Ni nyama ya mina yi fanana ni suku ke?

¹³ Ahihi, a nzi na kuvuneka, Yi hava ndlela yo pona ha yona!

¹⁴ Loyi a hlokiswako i zwelwa wusiwana hi maxaka yakwe; Hakuva a nga tsika ku chava Nyamintamu.

¹⁵ A vanakulori va tele hi kukhohlisa khwatsi i congwana, Va fanana ni mati ya zicongwana ma khulungako ma nyamalala;

¹⁶ Lawa ma nga maha ntima hi kota ya xirami, Loku gapongo gi wela hehla ka wona.

¹⁷ Loku ma nyungulukiswa hi mumu, mapswha, Ni loku gambo gi hisa, ma nga ha woneki wutshanwini ga wona.

¹⁸ A vahunzi va hambukela ka zona, Kanilezi va nga kumi mati ka zona, va lova.

¹⁹ A vamahungani va Tema ma lo cuwuka, Ni vafambi va Xeba va lo ma tsumba;

²⁰ Vona va lo wiswa tingana kutsumbeni kabye, Loku va chikele kona va lova hi gome.

²¹ Zinghaho, nwina makunu a mu vuni nchumu; Mu wona kuhlokiswa ka mina mu chava.

²² Nzi lo mu kombela lezaku mu nziha zinyikiwo, Ni ku nzi tirula hi titshomba ta nwina ke?

²³ Kutani nziku: Nzi tlhatlhiseni mandleni ya nala, Mu nzi tirula mandleni ya laʼvo biha ke?

²⁴ Nzi gonziseni, nzi ta miyela, Nzi pimiseni hi laha nzi hambukileko kona.

²⁵ I ntamu wa kuyini ti nga nawo a timhaka ti nene! Kanilezi a phika ya nwina yi vuna yini?

²⁶ Nwina mu alakanya ku kawuka timhaka ta mina, Ni kuwulawula ka loyi a nga ni gome, ku fanako ni moya ke?

²⁷ Ina, nwina mu phangelana hi zisiwana, Mu koxelana hi munghana wa nwina.

²⁸ Hikwalaho, nzi cuwukeni, Hakuva nzi nga ta hemba wunwa mahlweni ka nwina.

²⁹ Tlhelani, nza mu kombela, ngha ku ngavi na xigoho; Ina, mu cuwukisisa kululama ka mina.

³⁰ Ku kona kugoha lirimini la mina ke? A nomu wa mina a wu zi koti kuzwa zobiha ke?