Joba 5 - Tshwa Bible

¹ Vitana makunu, himani a ta nga ku hlamula; Hi wihi wa lava va kubasa u ta nga hunzulukela ka yena ke?

² Hakuva a xipumbu xi dawa hi zanga ya xona, Ni wuxezi gi daya mupanzi wa gona.

³ Nzi wonile a phuphulu gi zima mitsu: Kanilezi hi xikhanzakanya xa lezo nzi rukatela yindlu ka gona.

⁴ A vana va gona va le kule ni kupona, Va kanzihelwa lomu tinyangweni, va nga hi na mulamuleli.

⁵ A mihanzu ya gona yi giwa hi loyi a nga ni ndlala, A wutla ni lezi zi bhiyelweko hi mizwa, Lava va nga ni tora va mita a tshomba yakwe.

⁶ Hakuva a khombo a gi humi tshurini, Ge hambu zikarato a zi hluki hi lomu misaveni;

⁷ Kanilezi a munhu i belekelwa zikarato, Kukotisa tihlahle ti hahako hehla.

⁸ Loku ku wa hi mina nzi wa ta hlota Nungungulu, Nzi wa ta veka mhaka ya mina mahlweni ka Nungungulu;

⁹ A nga yena a mahako zilo za hombe zi nga kambiwiko, Ni zihlamaliso zo tala za tsanza vahlayi. Rom. 11:33

¹⁰ Loyi a nisako vula hehla ka misava, A rumela mati lomu mikoveni;

¹¹ Loku a zi ranza wa tlakusa lava va tsongahatwako, Ni ku vuxa lava va rilako va pona. 1 Sam. 2:7; Rom. 11:33

¹² Yena wa hangalasa makungo ya vatlharihileko, Lezaku a mandla yabye ma nga mahi nchumu:

¹³ A phasa titlhari hi mano ya tona, A hangalasa makungo ya va kubiha.

¹⁴ Ni hlikanhi va ti kuma va hi xinyameni, Va hulumetela ni hlikanhi khwatsi hi loku gi hi wusiku. Deut. 28:29; Isa. 59:9

¹⁵ A xisiwana a xi ponisa ka supado ya milomu yabye, Ni canjeni ga lava va nga ni ntamu.

¹⁶ Zinghaho a xisiwana xi na ni kutsumba, Ni kubiha ku valiwa milomu ya kona.

¹⁷ Langutani, i katekile munhu loyi Nungungulu a mu lulekako: Hikwalaho u nga soli a xitsayiso xa Nyamintamu. Maheb. 12:5; Jak. 1:12; Kuv. 3:19

¹⁸ Hakuva wa bayisisa, a tlhela a bohelela timbanga; Wa khuvaza, a mandla yakwe ma tlhela ma holisa.

¹⁹ I ta ku hlanguta zikaratweni ntlhanu wa zikhati ni xinwe: Ina, ni ntlhanu wa zikhati ni zimbiri cima a kubiha ku nga ta ku khumba.

²⁰ Xikhatini xa ndlala yena i ta ku tlhatlhisa kufeni; Ni lomu yimpini i ta ku tlhatlhisa ntanweni wa supado.

²¹ Wena u ta poniswa timbirimbini ta lirimi, U nga ta chava kulobyiswa loku kuta.

²² A kulobyiswa ni ndlala wena u ta zi hleka; U nga tava ni wutoya hi zivanza za misava.

²³ Hakuva wena u ta maha wuxaka ni maribye ya khwati: Ni zivanza za khwati zi tava kuruleni zinwe na wena.

²⁴ U ta wona a yindlu ya wena yi tshameka; U ta fambela maranga ya wena, u nga ta vumala nchumu.

²⁵ Ni kambe u ta wona lezaku a lixaka la wena li tava la hombe, Ni lezaku a vazukulu va wena va ta tala ku fanana ni byanyi ga khwati.

²⁶ U taya nkeleni wa wena na u khosahele; Kukotisa a nyanza ya mavele loku yi susiwa hi xikhati xa yona.

²⁷ Languta, lezi hi zi hlolisisile, zi tava nghaho; Zi zwisise, u zi hlayisa mbilwini ya wena.