Joba 42 - Tshwa Bible

Joba a ti solisa.

¹ Zonake Joba a hlamula Jehova, aku:

² Mina nza zi tiva lezaku wena wa zi kota ku maha zilo zontlhe, Ni lezaku a kuxuva ka wena a ku na ku tsanzekiswa.

³ Hi mina mani loyi nzi nga phumisako wutlhari na nzi nga hi na wutivi ke? Hikwalaho mina nzi wulawulile hi lezi nzi nga zi pimiko; A zilo zi hlamalisako ka mina, lezi nzi nga zi tiviko.

⁴ Nza ku kombela, ingisela laha na nzi wulawula, Nzi ta ku wutisa, u nzi gonzisa.

⁵ A tindleve ta mina ti wa zwile ha wena, Kanilezi makunu a mahlo ya mina ma ku wonile.

⁶ Hikwalaho nza ti sola, nzi hunzuluka, Na nzi hi tshurini ni le khumeni. Jona 3:6; 1 Kor. 11:31

Jehova a katekisa Joba.

⁷ Anzhako kakuva Jehova a wulawulile na Joba, Jehova aku ka Elifaze a muTemane: A zanga ya mina yi vindlukisilwe yi vukela wena ni vanghana va wena va vambiri: hakuva a mu wulawulangi kusaseka ha mina khwatsi hi nanza ga mina Joba.

⁸ Hikwalaho humesani a ntlhanu ni timbiri tikuzi, ni ntlhanu ni timbiri a tihamba, muya ka nanza ga mina Jeba, mu ya ti mahela a munyikelo wa kuhiswa; ni nanza ga mina Joba i ta mu khongelela. Hakuva yena nzi ta mu amukela, kasi nzi nga mahi ka nwina kota wupumbu ga nwina, hakuva a mu wulawulangi kusaseka ha mina kukotisa a nanza ga mina Joba.

⁹ Zinghaho, Elifaze a muTemane, na Bildade a muXuhi, na Zofare a muNaamate, va lo ya maha khwatsi hilezi Jehova a nga va leletele, na Jehova i lozwa a mukombelo wa Joba.

¹⁰ Zonake Jehova i lo tlhatlhisa Joba wukhumbini gakwe anzhako na a kombelele vanghana vakwe; na Jehova i lo anzisa ha kumbiri lezi Joba a nga wa hi nazo.

¹¹ Zonake ku lota kakwe vontlhe vanakulobye va xinuna ni va xisati, ni vontlhe lava a nga wa tolovelene navo, va taga zinwe naye ndlwini yakwe, va mu hlanguta mihloti, va mu chavelela kubayisekeni kontlhe loku Jehova a nga wa ku vekile hehla ka yena; a munhu ni munhu i lo mu nyika a xipanze xa mali, vontlhelele va lo mu nyika a tiphera ta nzalama. Gen. 33:19

¹² Zinghaho Jehova i lo katekisa magumo ya Joba ku hunza masangulo yakwe: hakuva i wa hi ni 14,000 wa tiyivu, ni 6,000 wa makameli, ni 1,000 wa mipatswa ya tikavi, ni 1,000 a mapswele ya timbongola.

¹³ Ni kambe i wa hi ni ntlhanu ni vambiri varisanyana, ni vanhanyana vanharu.

¹⁴ A wo ranga i lo mu chula vito ga Jemima; a vito ga wa wumbiri Kezia, ni vito ga wa wunharu Keren-happuka.

¹⁵ A tikweni gontlhe ku wa nga hi kona a wasati wo saseka khwatsi hi vanhanyana va Joba; ni dadani wabye i lo va avela tshomba xikari ka vamakabye vabye.

¹⁶ Anzhako ka lezo Joba i lo hanya 140 wa malembe, i lo wona vana vakwe ni vazukulu vakwe, kala ka xizukulwana xa wumune.

¹⁷ Zinghaho Joba i lofa na a khosahele, na a hi wa masiku yo hlaya. Gen. 35:29