Joba 41 - Tshwa Bible

¹ U nga zi kota ku phasa a Ngwenya hi ximemba, Kutani ku koka a lirimi la yona hi lingoti ke?

² U nga zi kota ku enghenisa a goronyi nhovini ya yona ke? Kutani a ku phondlisa a hlaya wa yona u enghenisa a sinza ke?

³ Yi wa ta ku khongela nguvu ke? Ni ku wulawula ka wena timhaka to olova ke?

⁴ Yi wa ta maha xivumelwano na wena, Lezaku yi ku tirela kala kupinzuka ke?

⁵ U wa ta hlakana nayo khwatsi xinyanyani ke? U wa ta yi bohelela u hlakanisa ha yona a vanhanyana va wena ke?

⁶ A vanhu va wa ta maha bhinzu ha yona, Va yi avela vamahungani ke?

⁷ U wa ta fenengeta a bhebhe ga yona hi matlhari ke? Kutani a hloko ya yona hi zijulu za varingeli ke?

⁸ Veka a canja ga wena hehla ka yona, U nga ha ta alakanya a ku yi vukakambe.

⁹ Languta, a kutsumba ka loyi a yi vukako ka mahala; Ni loyi a yi wonako wa mbhela ntamu.

¹⁰ A ku na nhenha a nga tiyako ku yi vuka; Zonake himani loyi a nga tiyako ku yima mahlweni ka mina ke?

¹¹ Himani loyi a nga ranga a nzi nyika nchumu, kasi nzi fela ku mu tlhelisela ke? Zontlhe lezi zi nga lahasi ka tilo za mina. Ekso. 19:5; Rom. 11:35; 1 Kor. 10:26

¹² Nzi nga ta tsika ku wulawula hi ziro wa yona, Ge hambu a ntamu wa yona, ni wumbhuri ga xiwumbeko xa yona.

¹³ Himani a nga funungulako a nguwo ya yona, Ni ku enghena xikari ka tihlaya ta yona?

¹⁴ Himani a nga vutako a tinyangwa ta nomu wa yona? A meno ya yona ma tshisa.

¹⁵ A magwaru ya yona hi wumbhuri ga yona, Ma namareleneko ma tiya.

¹⁶ Ma namarelene ginwe ni ginwani laha kaku A moya a wu zi koti ku enghena xikari ka wona.

¹⁷ Ma patsene ginwe ni ginwani, ma namarelana, Laha kaku a ma zi koti ku namuliwa.

¹⁸ Loku yi wetshemula ku huma kuwonekela, Ni mahlo ya yona me khwatsi tisinya ta wuronga.

¹⁹ Nonwini wa yona ku huma linghehla li vurako, Ni tihlahle ta nzilo ta baleka ti huma.

²⁰ A musi wu huma hi lomu tinhovini ta yona, Khwatsi hi musi wu humako lomu mbiteni yi vilako.

²¹ A kuhefemula ka yona ku dzivela makhala, Ni langavi gi huma hi nonwini wa yona.

²² A nhanwini ya yona ku na ni ntamu, Ni kuchava ku hlula mahlweni ka yona.

²³ A misiha ya nyama ya yona yi patsene, Yi chululwe hehla ka yona, a yi tsekatseki.

²⁴ A mbilu ya yona yi tiyile ku fanana ni ribye, Ina, yi tiyile khwatsi i ribye ga lahasi lomu xigayweni.

²⁵ Loku yi suka yi yima, a tinhenha to chava, A kuchava kabye ku va maha va tsutsuma.

²⁶ Hambu u yi tlhava hi tlhari a gi engheni, Ge hambu tlhari, ni xijulu, kutani seve.

²⁷ A ka yona a xiketse xi khwatsi i byanyi, Ni suku wu khwatsi i sinya yi bolileko.

²⁸ A ligalala a li na ku yi maha yi tsutsuma, A maribye ya xibhalakatsa ma fanana ni mungu ka yona.

²⁹ A zigomba zi khwatsi tihlanga ka yona, Yi hleka a wungetlengetle ga matlhari.

³⁰ A khwirini ga yona ku na ni zirengele zo kariha, Lomu nzhopeni yi mbambameta a zilo zo kariha.

³¹ Yi bonza a mati yo eta ma vila khwatsi ma lomu mbiteni, Yi maha a bimbi gi fanana ni mbita ya mafura.

³² Yi maha tisoko ta yona ti ngangamela, Ni mati ya bimbi ma basa khwatsi i wuvu ga xikhosana.

³³ Hehla ka misava a ku kona xilo xi fananako na yona, Lexi xi vangilweko xi nga hi na wutoya.

³⁴ A yi chavi ku cuwuka zontlhe lezi zi tlakukileko, Yona i hosi ya zihari zontlhe lezi zo leva.