Joba 40 - Tshwa Bible

¹ Jehova i lo simama ku hlamula Joba, aku:

² Wena musoli, u ta kanetisana ni Nyamintamu ke? Loyi a phikizanako na Nungungulu a hlamule. Joba a wulawula hi kutikoramisa.

³ Zonake Joba i lo hlamula Jehova, aku:

⁴ Languta, a nzi wa nchumu, nzi ta ku hlamula yini? Nzi ta ti khoma a nomu wa mina.

⁵ Nzi wulawulile kanwe, nzi nga ha ta hlamula; Ina, kumbiri; kanilezi nzi nga ha ta wula nchumu.

Jehova a hlamula Joba.

⁶ Zonake Jehova a hlamula Joba hi lomu xipupurini, aku:

⁷ Makunu boha xiwunu xa wena ku fanana ni wanuna, Hakuva nzi ta ku wutisa, u nzi tlhamusela.

⁸ U ta vinyetela a kululama ka mina ke? U ta nzi kona kasi ku ti basisa ke?

⁹ U na ni woko gi fananako ni ga Nungungulu ke? A gezu ga wena gi nga dzinza ku fana ni gakwe ke?

¹⁰ Ti bombisa hi wukosi ni kudumiswa, U ti ambexa hi kuhatima ni wuhosi.

¹¹ Chulula a zanga ya wena. U cuwuka vontlhelele lava va ti kukumuxako u va tsongahata.

¹² Languta vontlhe lava va ti kukumukisako u va veka hasi, U kanzihela a vaonhi matshanwini yabye.

¹³ Va fihle vontlhe lomu tshurini, U valela a tinghohe tabye lomu munyameni.

¹⁴ Zonake minawu nzi ta ku dzunza, Lezaku a canja ga wena ga xinene ga zi kota ku ku hanyisa.

¹⁵ Languta a vuwu leyi nzi yi mahileko zinwe na wena; Yiga byanyi ku fanana ni homu.

¹⁶ Languta, a ntamu wa yona wu le xiwunwini xa yona, Ni kutiya ka yona ku lomu misiheni ya khwiri ga yona.

¹⁷ Yi xamula a nkila wa yona khwatsi i sedare, Ni misiha ya matshambokulu ya yona yi lukene zinwe.

¹⁸ A marambu ya yona me khwatsi mipuva ya suku; A ziro za yona zi fanana ni timhanze ta ziketse.

¹⁹ Hi yona yo ranga ka mitiro yontlhe ya Nungungulu: Loyi a yi mahileko i yi nyikile a tlhari ga yona.

²⁰ Hakunene a zitsunga za yi milisela zakuga, Laho a zihari zontlhe za khwati zi hlakanako kona.

²¹ Yi etlela lomu minzhutini ya tisinya, Lomu tihlangeni ni lomu ka majeka,

²² A tisinya ti yi fenengeta hi minzhuti ya tona, A mbunga wa congo wu yi khubhunyeta.

²³ Languta, loku a micongo yi tala, yona a yi chavi; A yi chavi hambu loku Jordani a kukumuka a chikela ni nonwini wa yona.

²⁴ U nga ringa ku yi khoma laha na yi ku cuwuka, Hambu ku yi bhoxa mukhalo nhovini ya yona ke?