Joba 38 - Tshwa Bible

Jehova a hlamula Joba.

¹ Zonake Jehova i lo hlamula Joba, na a hi mhehweni ya xipupuri, aku: 1 Tih. 19:11; Ezek. 1:4

² Hi wena mani u gohako makungo Hi timhaka ti nga hiko na wutivi ke?

³ Makunu boha xiwunu xa wena ku fanana ni wanuna, Hakuva nzi ta ku wutisa, u nzi tlhamusela.

⁴ U wa hi kwihi a xikhati lexi nzi nga yimisa a xiseketelo xa misava? Tlhatlhambutela loku u hi ni kutivisisa.

⁵ Himani loyi a nga yimisa a tipimo ta kona, wa mu tiva ke? Kutani himani loyi a yi ringanyiseleko hi lingoti?

⁶ A ziseketelo za yona zi kelelwe laha ka yini? Kutani himani a vekileko a ribye ga magumo ya kona,

⁷ A xikhati lexi a tinyeleti ta mixo ti nga yimbelela khatiginwe, Ni vontlhe vana va Nungungulu va kanyuluka hi kutsaka?

⁸ Himani loyi a valeleko a bimbi hi tivati, A xikhati gi nga phuxuka, khwatsi gi huma hi rumbyini ga nyine?

⁹ A xikhati lexi nzi nga gi mahela tinguwo hi marefu, Ni munyama wa ku tshisa wuva miceka ya gona.

¹⁰ Nzi gi vekela mimbhingano ya mina, Nzi yimisa a tivati ni zikwinyaro,

¹¹ Nzi wuya nziku: U ta chikela laha, u nga ta hunzeleta; A kukukumuka ka mabyandlati ya wena ku ta mbhelela kwala?

¹² U na nga ruma mixo yi huma, ku sukela loku u tumbulukile; Ni ku maha a wuronga gi tiva wutshamu ga gona,

¹³ Lezaku gi khoma a magemeta musi ya misava, Lezaku kasi a vakubiha va zuzwa va huma ka yona ke?

¹⁴ Yi hunzuka yi kota wumba lahasi ka xifungo, Zontlhe zilo zi woneka kota a nguwo:

¹⁵ Ni kuwonekela ka vakubiha ku ta susiwa, Ni woko leʼgi tlakukileko gi tshobyiwa.

¹⁶ U wa na nga releta lomu zibukeni za bimbi ke? Kutani u wa na nga fambafamba kueteni ka gona ke?

¹⁷ U vululelwe a tinyangwa ta kufa ke? Kutani u wonile a tivati ta nzhuti wa kufa ke?

¹⁸ U wonile a kuanama ka misava ke? Tlhatlhambutela loku u zi tiva zontlhe lezi.

¹⁹ Yi kwihi a ndlela yi yako laha ku tshamako kuwonekela? Ni munyama, gi kwihi wutshamu ga wona;

²⁰ Lezaku u wa ta wu tava le mbhinganweni wa wona, U tiva tindlela leʼti yako ndlwini ya wona ke?

²¹ Wa zi tiva, hakuva u wa sina u belekilwe, Hakuva a masiku ya wena ma hlayile!

²² U wa na nga enghena wuhlayiselweni ga gapongo ke? Kutani u wa na nga wona a wuhlayiselo ga maralala,

²³ Lezi nzi zi hlayiselako a masiku ya zikarato Ni masiku ya yimpi ni kulwa ke? Ekso. 9:18; Isa. 32:19; Kuv. 16:21

²⁴ Hi yihi a ndlela leyi a kuwonekela ku avanyekako ha yona, Ni leyi a mheho ya Mutsuwuka-gambo, yi phuphuxako hehla ka misava?

²⁵ Himani a kelileko a mikhuleko ya tivula, Ni ku bhoxa a ndlela ya xingwalangwanza xa kudzinza,

²⁶ Laha ka kuva yina laha misaveni, laho ku nga akangiko vanhu, Ni lomu xiwuleni, laho ku nga hi na munhu;

²⁷ Kasi ku tsanisa zisapa zi nga hiko na nchumu; Ni ku maha a byanyi go nyuka gi phandluka ke?

²⁸ A vuta yi na ni dadani ke? Himani a psweleko madona ya nzhokati?

²⁹ A xivave xi huma rumbyini ga mani? Ni mbhera ya le tilweni, himani a yi belekileko ke?

³⁰ A mati ma woma ma fanana ni ribye, Ni nghohe ya mati ya kueta ya tiya.

³¹ Wa zi kota ku boha a Xirimela hi lingoti, Kutani ku tlhatlha mafunzu ya Mahlahle ke?

³² Wa zi kota ku humesa a zikombiso za le tilweni hi tinguva ta zona ke? Wa zi kota ku rangela a Gongomela ni vana va gona ke?

³³ Wa yi tiva milayo ya le tilweni? Wa zi kota ku yimisa mufumo wa gona laha misaveni ke?

³⁴ Wa zi kota ku chiketa a gezu ga wena le marefini, Kasi ma ku chululela a ntalo wa mati ke?

³⁵ Wa zi kota ku ruma a zingwalangwanza zi famba, Ziku ka wena: Hi hina valava?

³⁶ Himani a vekileko wutlhari marefini yo phuma, Himani a nyikileko a kutiva ka nyeleti yi tsutsumako?

³⁷ Himani a nga hlayako marefu hi wutlhari ke? Himani a chelako tinghotso ta le tilweni,

³⁸ Laha a tshuri wu womako, Ni marukwani ma namarelana?

³⁹ Wa hlotela a pswele ga nghala a zihari ke? U nga xurisa a zinghalana ke?

⁴⁰ Loku ti vumbamile minkeleni ya tona, Ni loku ti nyanimela tinzhawini.

⁴¹ Himani a nyikako a zikunguwa a kuga ka zona, Laha a mavinyani ya zona na ma keta ka Nungungulu, Ma nzulanzula hi ku vumala zakuga ke? Mat. 6:26; Lu. 12:24