Joba 36 - Tshwa Bible

¹ Elihu i lo simama ku wulawula, aku:

² Nzi vumele kutsongwani, nzi ta ku kombisa Lezaku nza hi ni timhaka a ku wulela Nungungulu.

³ Nzi ta neha wutivi ga mina hi le kule, Nzi ta tlhamusa a kululama ka Mumahi wa mina.

⁴ Hakuva, hakunene a timhaka ta mina a hi ta mawunwa; Loyi a mbheleleko kutivisiseni i yimile mahlweni ka wena.

⁵ Languta, Nungungulu i na ni ntamu, kanilezi a nga nyenyi munhu; I kulile ntanwini wa wutlhari.

⁶ A nga lonzowoti a wutomi ga wa kubiha; Kanilezi i nyika zisiwana a fanelo yabye.

⁷ A nga fulareli laʼva lulamileko: Kanilezi i va veka zinwe ni tihosi xitshanwini xa wuhosi; Ina, wa va tshamisa kala kupinzuka, a va kulisa.

⁸ Loku va bohilwe hi tisinga, Ni loku va phasiwa hi tingoti ta zixaniso;

⁹ Hi kona yena a va kombisako a mitiro yabye, Ni zihambunyeto zabye ni matshanza.

¹⁰ Lezo i vulula tindleve tabye lezaku vazwa zilayelo, A va byela lezaku va huma zigohweni.

¹¹ Loku va mu ingisa, va mu khozela, Vona va ta mbhetisa masiku yabye zikatekisweni. Ni malembe yabye lomu kutsakeni. Deut. 30:19

¹² Kanilezi loku va nga mu ingisi, va ta lobyiswa hi supado, Va tafa wupumbyini gabye.

¹³ Kanilezi a va timbilu ta wukhohlisi, va ti veketelela zanga, A va kombeli ku vuniwa loku yena a va boha.

¹⁴ Vona vafa na va ha hi vaswa, Ni wutomi gabye gi lova khwatsi hi ga va nga basangiko.

¹⁵ Wa ponisa zisiwana kuxanisekeni kabye, A vulula tindleve tabye hi kutsimbeketwa.

¹⁶ Ina, i wa lava ku ku humesa lomu zikaratweni, A ku veka wutshanwini gi nga hiko na hlomulo; Ni kuga ko nona ku wa ta vekiwa mezeni ya wena.

¹⁷ Kanilezi wena u tele hi maalakanyo ya vaonhi, A tsayiso wu ta lanzelana ni kulamula.

¹⁸ Ngha a zanga yi nga ku neheli tsayiso, Ni wukulu ga nzhiho gi nga ku hambukisi.

¹⁹ A titshomba ta wena ti nga ku ponisa kuxanisekeni, Hambu ni ntamu wa wena wontihe ke?

²⁰ U nga naveli wusiku, Legi a vanhu va susiwako ha gona wutshanwini gabye.

²¹ Ti wonele, u nga ti nyiketeli kugoheni, Hakuva u lo ti hlawutela lezo ku hunza hlomulo.

²² Languta, Nungungulu i tlakukile ntanwini wakwe: Himani a gonzisako ku fanana na yena?

²³ Himani a nga mu gonzisako a ndlela yakwe ke? Kutani himani a nga wulako kakwe: Wena u mahile kubiha? Deut. 32:4; 2 Kro. 19:7

²⁴ Alakanya a ku kulisa a ntiro wakwe, Lowu wu dumiswako hi vanhu;

²⁵ Wu cuwukiwa hi vanhu vontlhe, A munhu wa zi kota ku wu wona na hi kule.

²⁶ Languta, Nungungulu ngwa hombe, a hi gi tivi wukulu gakwe; Ge hambu a tsengo wa malembe yakwe a wu na ku hlayiwa. Isa. 63:16; Dan. 6:26; Maheb. 1:12

²⁷ I kokela hehla a madona ya mati, Lawa ma hunzulukako ma maha vula marefini lawa a ma mahileko.

²⁸ A marefu ma halata tivula, Ma ti nisela hehla ka wunyingi ga vanhu.

²⁹ Himani loyi a pimako hi kuandlalata ka marefu, Kutani a guwa ga tenda gakwe ke?

³⁰ Languta, yena wa andlala kuwonekela kakwe hehla ka gona, A fenengeta kueta ka bimbi.

³¹ Hakuva wa lamula a vanhu ha zona, A nyika vanhu a zakuga za ku tala.

³² A khoma xingwalangwanza hi mandla yakwe, A xi lelela a kuba xivango.

³³ A guwa ga xona gi bika ha yena, Ni zifuyo kambe za mu tiva loku a tshinela.