Joba 34 - Tshwa Bible

¹ Elihu a engeta ku wulawula, aku:

² Nwina titlhari, ingisani timhaka ta mina! Nyikani ndleve ka mina, nwina lava mu nga ni wutivi!

³ Hakuva a ndleve ya ringa timhaka, Khwatsi hi nomu wu ringako zakuga.

⁴ A hi ti hlawuteleni leʼzi lulamileko, Hi tiva lezi zi nene.

⁵ Hakuva Joba i te ngalo: Mina nzi lulamile; Nungungulu i kanetile kululama ka mina.

⁶ Hambu nzi lulamile, nzi hlayelwa mawunwa; Nzi tlhabyilwe a mbanga yi nga hiko na ku chumiwa, na nzi nga hi na nanzu.

⁷ Himani a fananako na Joba, Loyi a nwako tihlamba khwatsi i mati,

⁸ Loyi a fambako xikari ka vagohi, A famba zinwe ni vakubiha ke?

⁹ Hakuva yena i ngalo: A munhu a nga bhinzuli nchumu Hi ku ti tsakela ni Nungungulu.

¹⁰ Hikwalaho zwanani mina, nwina vanhu va kupimisisa! A kubiha ku le kule na Nungungulu, Ni kugoha a ku kona ka Nyamintamu. Deut. 32:4; Rom. 3:5

¹¹ Hakuva i tlhelisela munhu maringano ni ntiro wakwe, A mu nyika maringano ni mahanyela yakwe. Mat. 16:27; 1 Kor. 3:8; 2 Kor. 5:10

¹² Ina, hizinene Nungungulu a nga mahi kubiha; Ge hambu Nyamintamu a nga ta tshova nongameto.

¹³ Himani a mu nyikileko ku fumela misava ke? Himani a mu rwexileko a tiko gontlhe gi hlayiswa hi yena ke?

¹⁴ Loku a wa ti alakanyela wutsumbu gakwe ntsena, A susa a moya wakwe ni kuhefemula kakwe,

¹⁵ Yontlhe nyama yi wa ta lova khatiginwe, Ni munhu a tlhelela tshurini.

¹⁶ Loku wena u hi ni kupima, zwana lezi: Ingisela timhaka ta nomu wa mina.

¹⁷ Loyi a vengako kululama i ta fumela ke? U ta mu kona loyi a hunzeleleko kululameni ke? Rom. 3:6

¹⁸ Himani a wulako ka hosi aku: U bihile! Ni ka tihosana: Nwina mu vaonhi ke?

¹⁹ Nungungulu a nga cuwuki xiyimo xa tihosana, A nga khataleli vafumileko ku hunza zisiwana; Hakuva vontlhe va hi ntiro wa mandla yakwe. Deut. 10:17; Miti. 10:34; Kol. 3:25

²⁰ Hi xikhatanyana vafa xikari ka wusiku, A tiko gi karateka, gi hunza; A tinhenha ti susiwa, na ku nga hi canja ga munhu. Ekso. 12:29; 2 Tih. 19:35

²¹ Hakuva a mahlo yakwe ma languta a tindlela ta vanhu, A wona wontihe mafambela yabye.

²² A ku na munyama, a ku na nzhuti wa kufa, Laha a vagohi va ta nga fihlala kona.

²³ Hakuva Nungungulu a nga lavi xikhati xo leha ku tiva munhu, Lezaku kasi a fela ku enghena kulamulweni mahlweni kakwe.

²⁴ I ta tshoveletela a vahombe, na a nga wutisi nchumu, A yimisa vanwani wutshanwini gabye.

²⁵ Hakuva wa tiva mitiro yabye, I va wisa ni wusiku, va lobyiswa.

²⁶ Wa vaba kukotisa vanhu vo biha Kuwoneni ka vanhu vontlhe;

²⁷ Hakuva va mu fulareleko, A va xiyisisangi a tindlela takwe.

²⁸ Zinghaho va maha kurila ka zisiwana kuta kakwe, Lezaku azwa kurila ka laʼva nga hlomulweni. Ekso. 22:23

²⁹ Loku a va nyika kurula, himani a ta nga sola ke? Ni loku a fihla nghohe yakwe, himani a nga mu wonako? I fumela matiko ni vanhu hi ndlela yinwe,

³⁰ Lezaku ku nga fumi mukhohlisi. Kasi a vanhu va nga vekelwi maziyo.

³¹ Hizinene, zi sasekile ku wula ka Nungungulu, uku: Nzi tsayisilwe, nzi nga ha ta goha kambe:

³² Nzi kombise lexi nzi nga xi woniko, Loku nzi gohile, nzi nga ta ha maha kambe.

³³ Lezi wena u kanetako, Nungungulu i ta ku tlhelisela kota kuranza ka wena ke? Hi wena u ta nga ti hlawutela, a hi mina: Loku zi hi tano, wula lezi u zi tivako!

³⁴ A vanhu va nga ni kupima va ta nzi byela, Ni loyi a tlharihileko, loku a nzizwa, i taku:

³⁵ Joba a nga wulawuli hi kutivisisa, Ni timhaka takwe a ti na wutlhari.

³⁶ Joba a simamise ku ringwa, Hakuva i hlamule kukotisa a munhu wo biha.

³⁷ Hakuva wa engetela xionho xakwe hi ku hluwuka, I phakatela mandla yakwe xikari ka hina, A enzelekisa timhaka takwe, a vukela Nungungulu.