Joba 27 - Tshwa Bible

Joba a engeta a wulawula.

¹ Na Joba i lo simamisa a wulawula, aku:

² Hi Nungungulu loyi a hanyako, loyi a nzi tekeleko a kululama ka mina; Hi Nyamintamu loyi a hlukutako a muhefemulo wa mina!

³ Na nza ha hefemula, A moya wa Nungungulu na wa ha enghena tinhovini ta mina,

⁴ A milomu ya mina cima yi nga ta wulawula kubiha; Ge hambu a lirimi la mina a ku khohlisa.

⁵ A zive kule na mina a kuva nzi mu wula valulamileko! Kala nzifa nzi ta ti wula loyi a nga hiko na nanzu.

⁶ Nzi ta khomisisa a kululama ka mina, nzi nga ta ku tsika, A mbilu ya mina a yi nzi kawuki hi siku ni ginwe kuhanyeni ka mina. Kor. 4:4

⁷ A nala wa mina ngha ave a bihileko; Ni loyi a nzi vukelako a ave loyi a nga lulamangiko.

⁸ Hakuva ku kwihi kutsumba ka mukhohlisi kufeni kakwe, Laha Nungungulu a susako muhefemulo wakwe ke?

⁹ Nungungulu i tazwa kurila kakwe, Laha a zikarato zi ta nga wela hehla kakwe ke? Mik. 3:4; Joh. 9:31

¹⁰ I ta xalaliswa hi Nyamintamu ke? I ta khongela ka Nungungulu xontlhe xikhati ke?

¹¹ Nzi ta mu gonzisa xungetano ni canja ga Nungungulu, A nzi zi koti ku fihla a makungo ya Nyamintamu.

¹² Langutani, nwina nwentlhe mu zi wonile; Loku zi hi tano, hi yini nwina mu alakanyako za hava?

¹³ Lexi hi xiavelo xa wakubiha a nyikiwako xona hi Nungungulu; Ni tshomba ya vatsimbeketi, leyi va ta nga yi amukela hi ka Nyamintamu.

¹⁴ Loku a vana vakwe va anza, va ta dawa hi supado; Ni vazukulu vakwe va nga ta xura hi zakuga. 2 Tih. 10:7

¹⁵ Lava va salako va yena va kelelwa hi kota ya ntungu, Ni tinoni takwe ti nga ta maha xirilo.

¹⁶ Hambu loku yena a vingeretela siliva yi ku khwatsi i tshuri, Ni ku veka tinguwo, kasi ti tala ku fanana ni nzhope,

¹⁷ A nga ti veka, kanilezi ti ta ambaliwa hi loyi a lulamileko, Laʼva nga hiko na nanzu va ta avelana siliva yakwe.

¹⁸ I aka a yindlu ya yena khwatsi hi leyi ya sumba, Khwatsi hi xikupe lexi akilweko hi murinzeli.

¹⁹ A etlela na a fumile, na tsumba lezaku a nga ta lahlekelwa, Kanilezi loku a hanyanya, zontlhe zi nwalele.

²⁰ A kutshisa ku mu talele khwatsi i ntalo wa mati; Ni wusiku wa kukuletiwa hi xipupuri.

²¹ A mheho ya Mutsuwuka-gambo yi mu kukuleta a famba, Yi mu susa wutshanwini gakwe.

²² Hakuva Nungungulu i ta mu tlhava, a nga mu neneki; I ta lava ku nyemuka canjeni gakwe a tsutsuma.

²³ A vanhu va ta mu phakatela mandla yabye, Va mu kuwela loku a suka wutshanwini gakwe.