Joba 26 - Tshwa Bible

Joba a hlamula Bildade.

¹ Zonake Joba i lo hlamula, aku:

² U mu vunisile kuyini loyi a nga hiko na ntamu! U gi tiyisisile kuyini a woko ga loyi a nga ni gome!

³ U mu nyikisile kuyini a wusungukati loyi a nga tlharihangiko! Hi kudlunyatisilweko u wonekelisile zilo khwatsi hilezi zi nga ha zona!

⁴ Himani a nga ku nyika timhaka ta kunghahi? I moya wa mani u kanelako ha wona ke?

⁵ A vafileko va dzudzumela Lahasi ka mati ni vaaki va kona.

⁶ A Xeole xipangwa mahlweni ka Nungungulu, Ni Abaddoni a gi siretiwi ka yena. Mav. 15:11; Maheb. 4:13

⁷ Yena wa andlala Nwalungu hehla ka wutshamu gi nga hiko na nchumu; A hayeka misava laha ndengelengeni.

⁸ Yena wa boha a mati marefini yakwe, Ni marefu a ma panzeki lahasi ka wona.

⁹ Wa fihla xitshamu xakwe xa wuhosi, A xi fenengeta hi marefu yakwe.

¹⁰ Yena i vekile a ranzani mimbhinganweni ya mati, Laha ku tlhanganako a kuwonekela ni munyama.

¹¹ A timhanze ta tilo ta rurumela, Ti chabyiswa hi kukawuka kakwe.

¹² Hi ntamu wakwe i lo avanyisa a bimbi; Hi wutlhari gakwe wa hlula kutikukumukisa ka gona.

¹³ Hi moya wakwe a tilo gaca, A canja gakwe gi tlhava a nyoka leyi yi tsutsumako.

¹⁴ Languta, lexi hi xipanze xa mitiro yakwe ntsena, Hi zwile xipanze xitsongwani xa ndhuma yakwe ntsena, Kanilezi himani a nga pimako a kudzinza ka ntamu wakwe ke?