Joba 21 - Tshwa Bible

¹ Joba a hlamula Zofare. I Zonake Joba i lo hlamula, aku:

² Ingisisani khwatsi a timhaka ta mina, Mu nzi nyika kuchavelela kwaloko.

³ Nzi vumeleni nzi wulawula; Anzhako na nzi wulawulile, mu nzi tseketsela.

⁴ Kasi mina nzi tsanwiswa hi vanhu ke? Loku zi hi lezo, a moya wa mina wu nga kala wu nga karateki ke?

⁵ Nzi cuwukeni, mu hlamala, Mu ti khoma milomu.

⁶ Loku nzi zi alakanya, nza chava, Ni miri wa mina wa rurumela.

⁷ Hikuyini a vakubiha va hanyako, Va kala va khosahala, ina ni kuva ni ntamu ke? Jer. 12:1; Hab. 1:13; Mal. 3:14

⁸ A pswalo wabye wu tiyisiwa zinwe na vona kuwoneni kabye. Ni vazukulwana vabye mahlweni kabye.

⁹ A tiyindlu tabye a ti chabyiswi hi nchumu, Ni nhonga ya Nungungulu a yi kona hehla kabye.

¹⁰ A tikuzi tabye a ti vumali vana, A tikomazi tabye ta pswala, cima a ti handli.

¹¹ A vanana vabye va huma tindlwini khwatsi! tlhambi; Ni zihlangana zabye za kina.

¹² Va yimbelela hi tingoma ni zitende; Va tsakiswa hi kuvuma ka tinanga;

¹³ Va mbheta masiku yabye lomu mihlakanweni; Va relela vaya le Xeole hi kurula.

¹⁴ Hambu lezi va ngaku ngalo ka Nungungulu: Suka ka hina, Hakuva a hi ranzi a ku tiva a tindlela ta wena!

¹⁵ Xini Nyamintamu, wo kala hi mu khozela ke? Hi ta bhinzula yini hi ku mu khongela ke? Ekso. 5:2; Mal. 3:14

¹⁶ Mangabye, a kutangala kabye a ku canjeni gabye. A gujeguje ga vakubiha a give kule na mina.

¹⁷ Zikhati zingani a kandiya ya va kubiha yi timiwako! Zikhati zingani a kulobyiswa ku tako hehla kabye, Lezaku Nungungulu wa va avela a hlokiselelo zangeni yakwe?

¹⁸ Ni lezaku ve khwatsi linhonhombyana li biwako hi mheho; Va ku khwatsi i mungu loʼwu kukuletwako hi bhubhutsa?

¹⁹ Nwina mu ku ngalo: Nungungulu i tsayisa a vanana hi zigoho za dadani wabye; Kanilezi a mu tlhelisele, kasi yena nwinyi a fela ku zi tiva.

²⁰ Ngha a wona hi mahlo yakwe yena wutsumbu a kulobyiswa kakwe, A nwisiwa a zanga ya Nyamintamu.

²¹ Hakuva a ti karatela yini hi lezi zi to humela yindlu yakwe loku a sukile, Loku a tsengo wa tihweti takwe wu mbhelile?

²² Himani a nga gonzisako Nungungulu a wutivi ke? Lezi a lamulako ni mimoya ya le tilweni! Isa. 40:13; Rom. 11:34; 1 Kor. 2:16

²³ A munwe wafa na a tele hi ntamu, Na a tsakile, a hi ni kurula ka hombe.

²⁴ A mavele yakwe na ma tele hi mafi; Ni marambu yakwe ma hi ni mongo wu olovako.

²⁵ Kasi a munwani afa hi hlokiselelo ya muhefemulo wakwe; Na a nga danjhangi hambu litsakwana titsongwani.

²⁶ Lava vambiri va etlele zinwe misaveni, Va pomelwa hi ziwungwani hi wumbiri gabye.

²⁷ Langutani, nza tiva maalakanyo ya nwina, Ni makungo yo biha lawa mu nzi vukelako ha wona.

²⁸ Hakuva mu ngalo: Yi kwihi a yindlu ya hosana? Gi kwihi a tenda ga wa kubiha?

²⁹ A mu va wutisangi a vafambi va ndlela ke? A mu vumeli a wumboni gabye,

³⁰ Lezaku a wa kubiha wa tsikiwa sikwini ga khombo; A huluka hi siku ga zanga?

³¹ Himani a ta nga tlhatlhambutela a ndlela yakwe mahlweni kakwe, Na hi mani a ta nga mu tlhelisela zimaho zakwe ke?

³² Loku a yisilwe zilahleni Va lavelela nkele wakwe.

³³ A magadi ya nkova ma ta hehuka hehla ka yena, A vanhu vontlhe va ta lanzela hi nzhako kakwe, Khwatsi hi vanhu va tsanza-vahlayi lava va mu rangeleko.

³⁴ Loku zi hi tano, hikuyini nwina mu nzi chavelelako hi zahava, Laha na nzi wona lezaku a kuwulawula ka nwina a ku na lisine?