Joba 20 - Tshwa Bible

A kuwulawula ka Zofare.

¹ Zonake ku lo hlamula Zofare, a muNaamate, aku:

² A kuehleketa ka mina ka nzi kurumeta ku hlamula, Zinghaho nza tsanzeka ku ti khoma.

³ Mina nzi zwile a kurukwa loku ku nzi chelileko tingana, Ni moya wa kupimisisa ka mina wu nzi maha nzi hlamula.

⁴ A ku zi tivi wena lezaku a kusukela ka xikhatini xa kaleloko, Loku a munhu a vekilwe hehla ka misava,

⁵ A kukhana ka vakubiha ku komile, Ni kutsaka ka mukhohlisi ka xikhatanyana ke?

⁶ Hambu loku a ti kulisa a kala a chikela matilweni, Ni loku a hloko yakwe yi chikela marefini,

⁷ Yena i ta lova ku fanana ni macimba ya yena nwinyi; Ni lava va mu wonileko va taku: I kwihi?

⁸ I ta nwalala khwatsi i noro, a nga ha kumiwi, Ina, i ta hlongolwa khwatsi hi muwoniso wa wusiku.

⁹ Ni mahlo lawa ma nga mu wona, ma nga ha ta mu wona kambe; Ni wutshamu gakwe gi nga ha ta mu tiva kambe.

¹⁰ A vana vakwe va ta hlota thomo ga zisiwana, Ni mandla yakwe ma ta tlhelisa a tshomba leyi ma nga yi wutlile.

¹¹ A marambu yakwe ma tele hi wuswa gakwe, Kanilezi gi ta etlela zinwe naye lomu tshurini.

¹² Hambu loku a kubiha ku nanziha lomu kanwini kakwe, Lezaku a ku fihla hasi ka lirimi lakwe,

¹³ Hambu a ku hlayisa, a nga ku tsiki, A simamisa ku ku hlayisa nonwini wakwe;

¹⁴ A zakuga zakwe zi ta hunzuka lomu rumbyini gakwe, Ziva wuxungu ga tinyoka nzeni kakwe.

¹⁵ I mitile kufuma, i ta tlhela a ku hlata; Nungungulu i ta ku humesa rumbyini gakwe.

¹⁶ I ta anwa a wuxungu ga tinyoka, A lirimi la phiri li ta mu daya.

¹⁷ A nga ta ha wona micongo, Hambu ku wona a ntalo wu khulungako wulombe ni mawomba.

¹⁸ Ni lezi a nga zi tirela i ta zi tlhelisa, a nga ta vuneka ha zona, I ta tlhelisa lezi a nga zi teka, a nga na ku tsakela a kufuma kakwe. Deut. 28:30

¹⁹ Hakuva i tsimbeketile a zisiwana, a zi tsika, I wutlile a tiyindlu, a nga zi koti ku ti akisa.

²⁰ Hilezi a nga kolwangi mbilwini yakwe; I ta hluleka ku ti ponisa zinwe ni lezi a zi ranzako.

²¹ Ku hava nchumu a nga wu khadamulangiko, Hikwalaho a kutsaka kakwe ku nga tava ka simasima.

²² Ni kona kufumeni kakwe i ta vumala; A mandla ya zisiwana ma ta mu vukela.

²³ Laha na a xurisa a rumbu gakwe, Nungungulu i ta veka zanga yakwe hehla kakwe, I ta yi nisa hehla kakwe yiva kuga kakwe.

²⁴ Loku a tsutsuma a chava a tlhari ga xiketse, A wura ga suku gi ta mu phuruta.

²⁵ I ta hlomula a ligalala mirini wakwe, Ina, a supado yo hatima yi ta huma nyongweni yakwe; A ku chava kufa ku tava hehla kakwe.

²⁶ A munyama wontihe wu ta vekiwa mabakweni yakwe, A nzilo wu nga buvetiwangiko hi munhu wu ta mu lovisa; Wu ta hisa ni lezi zi ta nga sala lomu tendeni gakwe.

²⁷ A tilo gi ta wonekelisa kugoha kakwe, Ni misava yi ta suka yi mu vukela.

²⁸ A pfuno wa yindlu yakwe wu ta mbhela; Ni tshomba yakwe yi ta nwalala hi siku ga zanga yakwe.

²⁹ Lexo hi xona a xiavelo xa wa kubiha xi tako hi ka Nungungulu, Ni tshomba yi nyikilweko kakwe hi Nungungulu.