Joba 2 - Tshwa Bible

¹ Hi ka ginwani siku kambe, laha a vana va Nungungulu va ngaya ti wonekelisa mahlweni ka Jehova, Satani i wa hi xikari kabye a ku ta yima mahlweni ka Jehova.

² Jehova aku ka Satani: Uta hi kwihi wena ke? Satani i lo hlamula Jehova, aku: Nzi huma hi kunzulanzuleni laha misaveni, nzi wa pepetseka ka yona.

³ Jehova aku ka Satani: U na nga wona nanza ga mina Joba ke? Hakuva a nga kona wa ku fana na yena laha misaveni, loyi a mbheleleko kululameni, loyi a chavako Nungungulu, a nyenya kubiha. Wa ha tiyisile kululameni kakwe, hambu lezi wena u nzi kuceteleko ku mu vukela, nzi mu lovisa ahandle ka nanzu.

⁴ Satani i lo hlamula Jehova, aku: Hlonge hi hlonge! Ina, zontlhe lezi munhu a nga nazo i ta zi humesela wutomi gakwe.

⁵ Hi nga nawuluta a canja ga wena, u khumba marambu yakwe ni nyama yakwe, na yena i ta ku rukatela kuwoneni ka wena.

⁶ Jehova aku ka Satani: Languta, i le mandleni ya wena, ntsena lezaku u nga lovisi wutomi gakwe.

⁷ Zonake Satani i lo suka mahlweni ka Jehova, a yaba Joba hi zidlayi zo bayisa, kusukela mikonzweni yakwe kala le hlokweni.

⁸ I lo lava xirengele ku ti tshuvela ha xona; i lo tshama lomu khumeni.

⁹ Zonake a sati wakwe aku kakwe; Wa ha simamisile kululameni ka wena ke? Rukatela Nungungulu, ufa!

¹⁰ Kanilezi yena aku ngalo kakwe: Wena u wulawulisa ku khwatsi hi munwe wa zipumbu za vavasati. Hi ta amukela ntsena leʼzo saseka hi canjeni ga Nungungulu, hi nga ha amukeli zo biha ke? A ka zontlhe lezo cima Joba a nga gohangi hi milomu yakwe.

¹¹ Makunu loku a vanghana vanharu va Joba va zwile hi khombo legi gi nga mu wela, munwe ni munwe i lota hi le wutshanwini gakwe; Elifaze a muTemane, na Bildade a muXuhi, na Zofare a muNaamate; hakuva va wa mahile xikungo xa ku ta mu chavelela, va mu tangalisa.

¹² Ku te loku va tlakusa mahlo yabye na va hi kule, va nga mu tivi, va lo tlakusa magezu yabye, va rila; va lo hanzula tinguwo tabye, va xwanyela khuma hehla ka tihloko tabye gi tsutsusela tilweni.

¹³ Zonake va lo tshama zinwe naye lahasi, ntlhanu wa masiku ni mambiri ni ntlhanu wa wusiku ni gimbiri, na ku nga hi kona a wulako gezu kakwe, hi ku wona lezaku a kuhlokiswa kakwe ku wa hi ka hombe nguvu. Rom. 12:15