Joba 18 - Tshwa Bible

A kuwulawula ka Bildade.

¹ Zonake i lo hlamula Bildade, a muXuhi, aku:

² Kala rini na ma ha wulawula lezo ke? Pimisisani, zonake hi ta wulawula.

³ Hikuyini hi hlayiwako kota zihari, Ni kuva hi nga hlazekangi mahlweni ka nwina ke?

⁴ Wena loyi u ti hanzulako hi zanga ya wena; A misava yi ta tsikiwa hi kota ya wena ke? Ni ribye gi susiwa wutshanweni ga gona ke?

⁵ Ina, a kuwonekela ka loyi wa kubiha ku ta timiwa; Ni langavi ga nzilo wakwe gi nga ta ngangamela.

⁶ A kuwonekela ku ta hunzuka ku maha munyama lomu ndlwini yakwe; Ni kandiya yi nga hehla kakwe yi ta timeka.

⁷ A zikanzihelo za ntamu wakwe zi ta hlonganiswa, Ni xikungo xakwe xi ta mu wisa.

⁸ Hakuva a mikonzo yakwe yi ta phasiwa lizingeni, I ta famba hehla ka ziyo;

⁹ Ni tlhamu wu ta mu phasa hi xirenze; A tizinga li ta mu khoma.

¹⁰ A ziyo gi fihlilwe misaveni mahlweni kakwe; Ni tlhamu wu mu rinzele le ndleleni.

¹¹ A kutshisa ku ta mu chavisa ma tlhelweni wontihe; Ku ta mu hlongolisa ni kwihi a yako kona. Jer. 46:5

¹² Ni ntamu wakwe wu ta mbhetiwa hi ndlala; Ni khombo gi ta mu rinzela reveni gakwe.

¹³ Wubabyi gi taga a hlonge yakwe; Ni matewula ya lufo ma taga ziro zakwe.

¹⁴ I ta susiwa tendeni gakwe legi a gi tsumbako; A yiswa hosini yi chavisekako.

¹⁵ A tendeni gakwe ku ta tshama lava va nga hiko vakwe, Ni sulufa yi ta tlhatlhekela hehla ka wuakelo gakwe.

¹⁶ A mitsu yakwe yi ta oma lomu hasi; Ni le hehla a maravi yakwe ma ta tsemiwa.

¹⁷ A nga ha ta alakanyiwa laha misaveni; A nga ta kuva na vito lomu tikweni.

¹⁸ I ta humeswa kuwonekeleni aya munyameni; A hlongolwa misaveni yontlhe.

¹⁹ Cima a nga ta kuva na nʼwana hambu zukulu lomu tikweni ga ka kabye; Ku nga ta sala ni munwe wuakelweni gakwe. 2 Tih. 10:11, 17

²⁰ Lava va tshamako Mupela-gambo va ta hlamaliswa hi kubiwa kakwe; Ni vanhu va le Mutsuwuka-gambo va ta rurumela.

²¹ Hakunene, a wa kunghaho hi muti wa vakubiha; Gi maha lezo a wutshamu ga loyi a nga tiviko Nungungulu.