Joba 16 - Tshwa Bible

Joba a Mamula Elifaze.

¹ Zonake Joba i lo hlamula, aku:

² Kanyingi nzi zwile timhaka ta kunghaho; Nwentlhe mu vachaveleli va nga vuniko nchumu.

³ A magezu ya hava ma ta mbhela rini ke? Xi ngava xini xi ku tiyisako hlomulweni wa wena ke?

⁴ Na minawu nzi wa ta wulawula kukotisa nwina; Loku mu wa hi wutshanwini ga mina, Nzi wa ta mu tatela timhaka, Nzi mu zivizela hloko ya mina.

⁵ Zonake nzi wa ta mu tiyiseta hi nomu wa mina, Ni milomu ya mina yi wa ta mu tangalisa hlomulweni wa nwina.

⁶ Hambu loku nzi wulawula a kubayiseka ka mina a ku hunguki, Hambu loku nzi miyela nzi vuneka hi yini?

⁷ Kanilezi makunu i nzi rerile; Wena u hangalasile yontlhe a yindlu ya mina.

⁸ U nzi khomile hi hlokiselelo, gi nga wukustumunyu ga ku nzi vukela; A kuwonza ka mina ku yimile mahlweni ka mina, ku nzi kecara.

⁹ I nzi hanzulele zangeni yakwe: A getsela meno yakwe hehla ka mina, Ni nala wa mina wa nzi tlhava hi mahlo.

¹⁰ Vona va ahlamisile milomu yabye va nzi vukela; Hi ku nzi rukatela va nzi bile a rama ga mina, Va tsombene khatiginwe va nzi vukela.

¹¹ Nungungulu i nzi nyikele mandleni ya va nga lulamangiko, A nzi hoxa mandleni ya vakubiha.

¹² Nzi wa hi kuruleni, kanilezi i nzi hlukutile: I nzi khomile hi nhamu a nzi pswhandlasa fufanyi; I lo nzi yimisa kuva xipotiyelo xakwe.

¹³ A vanyamawure vakwe va nzi ranzele, Yena wa panza a tiswa ta mina, a nga ti neneki; Wa chulula a nyongwa ya mina lahasi.

¹⁴ Wa nzi bhoxa timbanga yinwe hehla ka yinwani, A tsutsumela ka mina khwatsi i nhenha.

¹⁵ Nzi rungele nguwo ya sakwa hehla ka hlonge ya mina, Nzi reletile a limhonzo la mina tshurini.

¹⁶ A nghohe ya mina yi tsutsumbele hi kurila, Ni nzhuti wa kufa wu laha ka tisiyi ta mina.

¹⁷ Hambu lezo a ku na kubiha mandleni ya mina: A mukombelo wa mina wu basile.

¹⁸ Wena misava, u nga khubhunyeti a nkhata wa mina, A kurila ka mina ngha ku nga kumi wutshamu go humula.

¹⁹ Languta, ni lezi a kustumunyu ya mina yi le tilweni; A muwulawuleli wa mina i le wutshanwini ga le hehla.

²⁰ A vanghana va mina va nzi monya; A mahlo ya mina ma halata mihloti ka Nungungulu,

²¹ Lezaku a ta nzi yimela mahlweni ka wutsumbu gakwe, Ni ku yimela nʼwana wa munhu ka muakelane wakwe.

²² Hakuva loku ku hunzile malembe matsongwani, Nzi ta famba hi ndlela leyi nzi to kala nzi nga ha wuyi ha yona.