Joba 14 - Tshwa Bible

¹ A munhu loyi a pswelweko hi wasati, A masiku yakwe matsongwani, na tele hi zikarato.

² Wa mila kukotisa xitsangi, zonake a wuna; Wa nyamalala kukotisa nzhuti, a nga have kona. Maheb. 13:14

³ Xana u vulula mahlo kasi ku languta a wa kunghahi? Hi mina loyi u nzi yisako kulamulweni zinwe na wena!

⁴ Himani a nga humesako a xilo xo basa hi ka xilo xi nga basangiko ke? Ge hambu ni munwe.

⁵ Loku masiku yakwe ma hlayilwe, ni tsengo wa tihweti takwe wu tibyiwa hi wena, U mu vekele mimbhingano leyi a nga zi kotiko ku yi tlula;

⁶ Susa a mahlo ya wena kakwe, u mu nyika xikhati xa kuhumula, Kasi a tsaka hi siku gakwe ku fanana ni munhu a tholilweko,

⁷ Hakuva ku kona kutsumba ka sinya, Lezaku yi ta hluka kambe loku yi tsemiwa, Ni mahluke ya yona ma nga ta vumaleka.

⁸ Hambu loku a mitsu ya yona yi khosahala lomu misaveni, Ni xivo xa yona xifa tshurini;

⁹ Kanilezi loku yizwa mati yi ta vuka, Yi phaka tiravi khwatsi i sinya yiswa.

¹⁰ Kanilezi loku a munhu afa, i mbhelelwa hi ntamu; Ina, loku a nyikela moya wakwe, a ngava kwihi ke?

¹¹ Khwatsi hi mati ma mbheleleko mativeni, Ni congo wu pswhako, wu cakamela;

¹² Zinghaho ni munhu, wa etlela a nga ha vuki: Kala matilo ma nga have kona, cima a nga ta vuka; Ge hambu ku khindlimuswa wurongweni gakwe.

¹³ O, loku ku wo khwatsi wa nzi fihla le Xeoli, U nzi veka kufihlaleni kala a zanga ya wena yi hunza; Ni loku ku wo khwatsi wa nzi vekela xikhati, lexi u ta nga nzi alakanya ha xona!

¹⁴ Loku ku wo khwatsi a munhu a fileko wa tlhela a hanya kambe, Xikhatini xa mina xontlhe xi yimisilweko nzi wa ta rinzela, Kala kuta a kutlhatlhiswa ka mina.

¹⁵ U wa ta vitana, mina nzi ku hlamula; U wa tava ni lixuve hi ntiro wa mandla ya wena.

¹⁶ Makunu wa hlaya wukanzihelo ga mina; U xiyisisa a xionho xa mina.

¹⁷ A zihambunyeto za mina zi lemilwe lomu kwameni, Wa veka xifungo ka zigoho za mina.

¹⁸ Hizinene, loku a xitsunga xiwa xa mbhela, Ni ribye ga susiwa wutshanwini ga gona;

¹⁹ A mati maga maribye, Ma khulunga, ma kukuleta a tshuri wa misava; Zinghaho wena wa daya kutsumba ka munhu.

²⁰ Wena wa mu vukela kala yena a hunza; Wena wa hunzula a nghohe yakwe, u mu tlhelisa.

²¹ A vana vakwe loku va kuma wudzunzo, yena a nga zi tivi; Hambu loku va tsongahatiwa, yena a nga va alakanyi.

²² A nyama yakwe yazwa kubayisa ka yona yoce, Ni muhefemulo wakwe wu tiva ntsena a hlomulo wa wona wutsumbu.