Joba 1 - Tshwa Bible

A makhombo ya Joba.

¹ Ku wa hi kona a munhu wo kari le tikweni ga Uzi, a vito a nga hi Joba; i wa hi munhu a nga wa mbhelele kululameni, loyi a nga chava Nungungulu, a nyenya kubiha.

² I wa belekile varisanyana va ntlhanu ni vambiri ni vanhanyana vanharu.

³ Ni tshomba yakwe yi wa hi 7,000 wa tiyivu, ni 3,000 wa makameli, ni 500 wa mipatswa ya tikuzi, ni 500 va mapswele ya timbongola, ni maanza yo tala; hikwalaho a munhu oye i wa hi wa hombe ka vontlhe vanhu va le tikweni ga Mutsuwuka-gambo.

⁴ A vana vakwe va wa hi ni mukhuwo wo mahelana mibuzo siku ni siku lomu ndlwini ka munwe ni munwani; va wa ramba ni vamakabye vabye va vanharu a ku taga ni kunwa zinwe navo.

⁵ Loku va hetile mibuzo yabye, Joba i wa va vitana a ta va basisa; a vuka ni mixo a ya nyikela munyikelo wa kuhiswa, maringano ni tsengo wabye vontlhe, hakuva Joba i waku: Kutani a vana va mina va onhile, va tsika Nungungulu lomu timbilwini tabye. Joba i wa maha lezo xontlhe xikhati.

⁶ Makunu a ka siku go kari a vana va Nungungulu va lo ya ti wonekelisa mahlweni ka Jehova, na Satani i wa hi xikari kabye.

⁷ Jehova i te ngalo ka Satani: Uta hi kwihi wena ke? Satani i lo hlamula Jehova, aku kakwe: Nzi huma hi kunzulanzuleni laha misaveni, nzi wa pepetseka ka yona. Pet. 5:8

⁸ Jehova aku ka Satani: U na nga wona nanza ga mina Joba ke? Hakuva a nga kona wa ku fana na yena laha misaveni, loyi a mbheleleko kululameni, loyi a chavako Nungungulu, a nyenya kubiha.

⁹ Zonake Satani a hlamula, aku: Kasi Joba o halahala a chava Nungungulu ke?

¹⁰ A hi lezi u mu vikelako, yena ni yindlu yakwe, ni zilo zontlhe zakwe ke? U katekisile a ntiro wa canja gakwe, ni mitlhambi yakwe yi lo anza laha tikweni.

¹¹ Kanilezi hi nga nawuluta a canja ga wena, u khumba zontlhe lezi a nga nazo, na yena i ta ku rukatela kuwoneni ka wena.

¹² Jehova aku ka Satani: Languta, zontlhe a nga nazo zi le ntanweni wa wena; ntsena lezaku u nga yisi a canja ga wena mirini wakwe. Zonake Satani i lo suka kuwoneni ka Jehova.

¹³ Hi siku go kari a vana va Joba va xinuna ni va xisati va waga ni kunwa lomu ndlwini ya nhonzwa yabye,

¹⁴ ku lota a ntsumi ka Joba, wu taku: A tikavi ti wa rima, a timbongolana tiga kusuhi na tona;

¹⁵ makunu a va ka Xeba va lo hi putsuketa, va teka zifuyo, va daya varisi hi tisupado; ku lo pona mina nzoce nzi ku byelako.

¹⁶ Laha na a ha wulawula, languta, ku lota wunwani, wu taku: A nzilo wa Nungungulu wu wile hi le tilweni, wu hisetela tiyivu ni varisi, wu va mbheta; ku lo pona mina nzoce nzi ku byelako.

¹⁷ Laha na a ha wulawula ku lota kambe wunwani, wu taku: A maKaldea ma ti avanyisile hi mintlawa minharu, va wela hehla ka makameli, va ma teka, va daya varisi hi tisupado; ku lo pona mina nzoce nzi ku byelako.

¹⁸ Laha na a ha simamisa ku wulawula, ku lota kambe wunwani, wu taku: A varisanyana va wena ni vanhanyana va wena va waga ni kunwa vinya lomu ndlwini ya nhonzwa yabye:

¹⁹ laho ku lota bhubhutsa ga hombe hi le xiwuleni, giba a mune wa magwitsi ya yindlu, yi wela hehla ka vona, yi va daya; ku lo pona mina nzoce nzi ku byelako.

²⁰ Zonake Joba i lo suka a yima, a hanzula tinguwo takwe, a halula hloko yakwe, a ti wisa lahasi a khongela, aku:

²¹ Nzi lo huma nzi nga hi na nchumu hi lomu rumbyini ga mamani, nzi ta tlhelela kona nzi nga hi na nchumu. Jehova i nzi nyikile, Jehova i tlhelile a teka; a gi dumiswe a vito gakwe! Mutsa. 5:14; 1 Tim. 6:7

²² A ka zontlhe lezo Joba a nga onhangi, ge hambu ku nyika nanzu ka Nungungulu.